«Skazaŭ chłopčyku, što bačyć u im akciorskija danyja». Viadomaha minskaha artysta sudziać pa piaci artykułach za piedafiliju
Imavierna, padčas śledstva vypłyli strašnyja padrabiaznaści — u spravie Ivana Ščatko jość abvinavačvańnie ŭ zhvałtavańni małaletniaha i arhanizacyja dziciačaj prastytucyi. Pa spravie taksama prachodzić 22-hadovy siabar artysta. Abodvum moža pahražać da 25 hadoŭ turmy.
Ivanu Ščatko 47 hadoŭ. Naradziŭsia ŭ horadzie Kiraŭsku Mahiloŭskaj vobłaści. Paśla škoły advučyŭsia ŭ techničnym kaledžy ŭ svaim rajonie, a paśla ŭ Mahiloŭskaj vučelni kultury, jakuju skončyŭ u 1998 hodzie. U 2004 skončyŭ Biełaruskuju dziaržaŭnuju akademiju mastactvaŭ.
Zdymacca ŭ kino pačaŭ u 2001 hodzie, tady ž pajšoŭ pracavać u Biełaruski dziaržaŭny maładziožny teatr.
Zdymaŭsia ŭ asnoŭnym u rasijskich dy biełaruskich prajektach — piratechnik u sieryjale «Trukač», Rusłan u sieryjale «Kube», Piatrovič u davoli bujnym rasijskim prajekcie «Sałdacik».
Hraŭ jon navat rolu staršyni ŭ filmie «Žyvie Biełaruś».
Ahułam Ščatko źniaŭsia bolš čym u 50 filmach i sieryjałach, adyhraŭ dziasiatki śpiektaklaŭ. U kancy 2020 atrymaŭ miedal Francyska Skaryny.
Jahony padzielnik — 22-hadovy Mikita Jurkievič. Jon minčuk, paru hadoŭ tamu šukaŭ pracu roznarabočym. Telehram-akaŭnt Jurkieviča jość u tematyčnych čatach intymnych znajomstvaŭ. Pryčym, padobna, hety akaŭnt vykarystoŭvali i siłaviki, bo jon byŭ anłajn u krasaviku 2024 hoda.
Zhodna ź pieršasnaj infarmacyjaj ź milicejskaha telehram-kanała, Ščatko paznajomiŭsia z 14-hadovym chłopcam, jaki žyŭ pobač. Skazaŭ, što ŭ chłopca dobryja akciorskija zadatki i što chacieŭ by dapamahčy jamu z karjeraj. Paśla hetaha paznajomiŭ chłopca ź Jurkievičam, i jany razam stali zaprašać chłopca da siabie, kab zajmacca ź im seksam.
Padazronuju pierapisku zaŭvažyli baćki. Jany raspytali padletka i vyśvietliłasia, što jon pierapisvajecca z susiedam. Tady paviedamili pra heta ŭ milicyju. MUS prosić baćkoŭ być bolš uvažlivymi da svaich dziaciej i raspaviadać im pra toje, jak pavodzić siabie z darosłymi, a taksama raspaviadać im pra piedafiłaŭ.
Abodvuch mužčyn vinavaciać pa piaci artykułach — «arhanizacyja abo vykarystańnie dziciačaj prastytucyi abo arhanizacyja prastytucyi arhanizavanaj hrupaj» (č. 1 i č. 2 art. 171 KK), «raspusnyja dziejańni, ździejśnienyja hrupaj asobaŭ abo asobaj, na jakuju ŭskładzienyja abaviazki pa hadavańni abo ŭtrymańni niepaŭnaletniaha» (č. 1 i 2 art. 168 KK), «uciahnieńnie niepaŭnaletniaha ŭ ździajśnieńnie ciažkaha abo asabliva ciažkaha złačynstva abo ŭ arhanizavanuju hrupu» (č. 3 art. 172), «hvałtoŭnyja dziejańni seksualnaha charaktaru da zaviedama małaletniaha abo jakija paciahnuli ciažkija nastupstvy» (č. 2 i č. 3 art. 167 KK), «stvareńnie porna ź niepaŭnaletnimi» (č. 2 art. 343-1 KK).
Padrabiaznaści spravy nieviadomyja, ale vidać, što padčas śledstva vyśvietlilisia niejkija dadatkovyja akaličnaści spravy, tamu abvinavačańni stali našmat bolš žorstkimi.
Sudziać mužčyn u sudzie Zavadskoha rajona Minska. Maksimalnaje pakarańnie pa artykułach, jakija im zakidajuć — 25 hadoŭ turmy.
«Naša Niva» — bastyjon biełaruščyny
PADTRYMAĆKitaj paprasiŭ Biełaruś narmalizavać adnosiny z Polščaj — krynica3
Kamientary
Sudziačy pa Biełarusi ŭ asnoŭnym nieadekvat - piedafiły, prezidenty i tp.