Bolš čym $2000 za «kvadrat». Dzie znachodziacca i kolki kaštujuć elitnyja kvatery ŭ Hrodnie
Zakryty dvor, terasy, vid na histaryčny centr… Pahladzieli, jak vyhladaje i pa jakich cenach pradajecca žytło ŭ elitnych damach Hrodna.
Elitny daŭhabud pobač z rynkam i vakzałam
Adzin z elitnych damoŭ u Hrodnie znachodzicca ŭ niepasrednaj blizkaści da histaryčnaha centra pa adrasie vuł. Parachavaja, 9.
Jaho pačali budavać u 2006 hodzie, ale nieŭzabavie budaŭnictva zastoparyłasia. Dolščyki čatyry hady nie mahli atrymać svaje kvatery. Zakančvać budaŭnictva daviałosia miascovym uładam. Dom byŭ hatovy tolki ŭ 2011 hodzie.
Paralelna z hetym, u traŭni 2011 hoda, na dyrektara firmy STAA «Kansient», jakaja budavała dom, zaviali kryminalnuju spravu. Praz amal 2,5 hoda jaho prysudzili da troch hadoŭ pazbaŭleńnia voli z kanfiskacyjaj majomaści. Usiaho pa spravie prachodziła 200 paciarpiełych.
Na siońnia ŭ elitnym domie pradajecca kala 10 kvater. Adna ź ich — samaja darahaja z vystaŭlenych na prodaž u Hrodnie.
Za pientchaus biez unutranaha azdableńnia ahulnaj płoščaj 324 m² prosiać 450 tysiač dalaraŭ.
Kvatera ŭ prodažy jak minimum ź minułaha leta. Cana za hod nie źmianiłasia. Tamu vyhladaje, što haspadar nie śpiašajecca pazbaŭlacca ad jaje.
Jak i rabić tam ramont, bo dom zdadzieny bolš za 10 hadoŭ tamu, a ŭ kvatery dahetul hołyja ścieny.
Heta, darečy, nie adzinaja kvatera biez ramontu, jakuju tut pradajuć. Za čatyrochpakajoŭku na 155 m² prosiać 129 500 dalaraŭ. U abjavie paznačana, što pry žadańni z adnoj kvatery možna zrabić dźvie.
Samaja tannaja kvatera ŭ domie — adnapakajoŭka ahulnaj płoščaj 65 m². Prosiać za jaje 61 tysiaču dalaraŭ.
«Aŭtentyčnaja kvatera ŭ centry Hrodna. Prastornaja i ŭtulnaja, z dobrym ramontam i meblaj. Jość kamora (u dadzieny momant abstalavana pad spalniu). Vialiki sumieščany sanvuzieł», — havorycca ŭ apisańni.
Tym nie mienš, u sučasnych pakupnikoŭ da elitarnaści doma mohuć uźniknuć pytańni. U krokavaj dasiažnaści — aŭtavakzał i centralny rynak. Abiedźvie łakacyi ŭ niepasrednaj blizkaści da doma naŭrad ci možna nazvać plusam.
Mała pavierchaŭ i zakrytaja terytoryja
Padobna, što z časam haradžanie i dyviełapiery zrazumieli, što pa-sapraŭdnamu elitnaje žytło nie musić być šmatpaviarchovym. Usio čaściej sučasnyja damy, jakija pazicyjanujucca jak kłas premium, majuć tolki 5-7 pavierchaŭ.
Inšy elitny dom u Hrodnie znachodzicca pa adrasie vuł. Śviardłova, 12.
U im pradajucca adrazu dźvie kvatery. Abodva varyjanty biez azdableńnia, ale z vychadam na terasu.
Za adnapakajovuju kvateru płoščaj 52 m² prosiać 60 tysiač dalaraŭ. Z žyłoha pamiaškańnia jość vychad na terasu płoščaj 35 m².
Druhaja kvatera biez cany. Jana taksama biez ramontu i ź vielizarnaj ułasnaj terasaj płoščaj 44 «kvadraty». Sama kvatera maje płošču 145 m².
Adrazu dva elitnyja damy mieściacca na vulicy Budzionaha. Abodva majuć zakrytyja dvary i padziemny parkinh. Na Budzionaha, 28 ciapier kvater u prodažy niama, a voś u domie numar 30, jaki tolki niadaŭna pabudavali, prapanujuć dźvie kvatery biez azdableńnia.
Za adnapakajoŭku ahulnaj płoščaj 40 m² prosiać $47 900. Za dvuchpakajoŭku płoščaj 79 m² vystavili canu $97 000. Abiedźvie kvatery majuć hołyja ścieny, mieściacca jany na apošnim piatym paviersie. Na dachu doma jość zona adpačynku dla žycharoŭ.
Jašče adzin elitny dom u Hrodnie znachodzicca na vuł. Citova, 14. Ciapier tam u prodažy 5 kvater.
Samyja tannyja — adnapakajoŭki biez ramontu z ahulnaj płoščaj 43 i 49 m². Prosiać za ich 65 000 i 66 500 dalaraŭ adpaviedna.
U hetym ža domie pradajecca dvuchpakajoŭka z dyzajnierskim ramontam, meblaj i technikaj. Prosiać za jaje 129 900 dalaraŭ. Ahulnaja płošča žytła — 64 m². Heta kala $2030 za 1m².
Status elitnaha hetamu domu prydajuć nie tolki zakrytaja dvarovaja terytoryja, padziemny parkinh, zona adpačynku na dachu. Tut jość spartyŭnaja zała i pralnia dla žycharoŭ. Na fonie inšych «elitak» hety dom vyłučaje jaho łakacyja.
Hety 7-paviarchovik mieścicca ŭ cichim miescy. Dom staić unutry dvara, tamu vokny nie vychodziać na šumnyja vulicy, a z častki kvater adkryvajecca vid na histaryčny centr horada.
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki13
Kamientary
Dizajnier, biary nie hladzia