U BDU nazvali śpiecyjalnaści z samym vialikim konkursam — 19 čałaviek na miesca
«Pavodle ŭsich pakazčykaŭ nabor na dzionnuju biudžetnuju formu ŭ BDU pabiŭ letašnija rekordy», — kažuć va ŭniviersitecie.
![](http://d3kcf2pe5t7rrb.cloudfront.net/img/w840d4webp1/photos/stock/_20190521_bun-1284-wpqb4.jpg.webp)
Pra pieršyja vyniki pryjomnaj kampanii raspavioŭ rektar VNU Andrej Karol. Ahulny konkurs skłaŭ 1,6 čałavieka na miesca pry płanie pryjomu 2519 na hramadzianskija śpiecyjalnaści, što na 405 biudžetnych miescaŭ bolš, čym letaś, paviedamlaje pres-słužba ŭniviersiteta.
Učora a 18.00 zaviaršyŭsia pryjom dakumientaŭ na biudžetnuju formu navučańnia i na śpiecyjalnaści płatnaj formy, pa jakich pravodziacca ŭnutranyja vyprabavańni. Padača dakumientaŭ na vajskovy fakultet zavieršycca 19 lipienia.
«U BDU całkam zakryty biudžet. Padadziena 4008 zajaŭ, što na 459 bolš za letašni pakazčyk», — padkreśliŭ Andrej Karol.
Siarod pryniatych dakumientaŭ 83 zajavy ad pieramožcaŭ mižnarodnych i respublikanskich alimpijad, letaś — 79. «Usiaho biez ekzamienaŭ my zaličym 428 abituryjentaŭ, što składaje 17% ad kantrolnych ličbaŭ pryjomu i amal u 1,5 razy pieravyšaje ličby minułaj pryjomnaj kampanii», — raspavioŭ Andrej Karol. Ź jaho słoŭ, mnohija abituryjenty hetaj katehoryi tłumačyli svoj vybar BDU jaho vysokim imidžam i rejtynhavymi pazicyjami.
Ad ahulnaj kolkaści tych, chto padaŭ dakumienty, 27% skłali miedalisty. «Usiaho sioleta padadziena takich zajaŭ 1067, u 2023 hodzie — 895», — adznačyŭ rektar. Akramia taho, z ahulnaj kolkaści tych, chto padaŭ dakumienty, 1674 skončyli licei i himnazii.
«Štohod u BDU prychodziać vypuskniki z vysokim uzroŭniem padrychtavanaści. U nas 80% abituryjentaŭ, jakija ŭdzielničajuć u ahulnym konkursie, majuć sumarny bał vyšej za 300. Hetaja ličba stabilnaja na praciahu apošnich dvuch hadoŭ, što pakazvaje na śviadomy vybar BDU i matyvavanaść moładzi vučycca mienavita ŭ BDU. Pa 100-balnych vynikach u nas taksama radujuć pakazčyki. Sioleta ŭ BDU padadziena 469 100-balnych siertyfikataŭ. Samaja vialikaja kolkaść pa hramadaznaŭstvie — 116 i matematycy — 107», — raspavioŭ rektar.
Najbolš vysoki konkurs skłaŭsia na śpiecyjalnaści «hrafičny dyzajn i multymiedyjadyzajn» — 19 čałaviek na miesca;
«dyzajn kaściumu i tekstylu» — 8,5 čałavieka na miesca; «dyzajn pradmietna-prastoravaha asiarodździa» — 7,6 čałavieka na miesca.
Andrej Karol adznačyŭ, što vyras konkurs i na zavočnaj biudžetnaj formie navučańnia. Tut jon skłaŭ 2,5 čałavieka na miesca, letaś — 1,7. Pry płanie pryjomu 104 miescy padadziena 258 zajaŭ.
Na skaročany termin navučańnia dakumienty pryniaty ad 208 abituryjentaŭ pry płanie pryjomu 66. Konkurs skłaŭ 3,2 čałavieka na miesca. Najbolš vysoki konkurs skłaŭsia na nastupnych śpiecyjalnaściach: «miedyka-bijałahičnaja sprava» (na skaročany termin navučańnia dla vypusknikoŭ siarednie-śpiecyjalnych ustanoŭ adukacyi) — 3,5 čałavieka na miesca; «pravaznaŭstva» (na skaročany termin navučańnia dla vypusknikoŭ SSUA) — 2,8 čałavieka na miesca; «kiravańnie dakumientami» (na skaročany termin navučańnia dla vypusknikoŭ USSA) — 3,9 čałavieka na miesca.
Praca pryjomnaj kamisii jašče praciahvajecca: «U nas idzie padača dakumientaŭ ad płatnikaŭ. I ŭžo pa hetaj linii nazirajecca rost prachadnych bałaŭ i adznačajecca jakasnaja padrychtoŭka našych abituryjentaŭ».
Pryjom dakumientaŭ na płatnuju formu navučańnia ŭ BDU praciahniecca da 1 žniŭnia.
Kamientary