Bieły dom admoviŭsia nakiroŭvać va Ukrainu amierykanskich śpiecyjalistaŭ pa absłuhoŭvańni F-16

Jak piša WSJ, Rada nacyjanalnaj biaśpieki ZŠA razhledzieła prapanovu ab adpraŭcy hramadzianskich padradčykaŭ va Ukrainu dla absłuhoŭvańnia źniščalnikaŭ F-16 i inšaj vajskovaj techniki. Adnak, jak adznačajuć krynicy haziety, vyviedvalnaja supolnaść i inšyja ŭdzielniki abmierkavańnia paličyli heta zanadta ryzykoŭnym na hety momant.

«Vyviedvalnaja supolnaść vykazała zaniepakojenaść pierśpiektyvaj taho, što Rasija nacelicca na amierykanskich padradčykaŭ va Ukrainie», — cytuje WSJ nienazvanaha amierykanskaha čynoŭnika.

Zrešty, administracyja nie vyklučyła adpraŭku amierykanskich padradčykaŭ u budučyni, ale, pavodle źviestak vydańnia, nie najbližejšym časam.

U materyjale adznačajecca, što zastajecca mahčymaść taho, što jak minimum častka zadač pa absłuhoŭvańni technałahična składanych vajskovych mašyn mohuć uziać na siabie krainy Jeŭropy.

Aficyjnych kamientaroŭ na hety kont pakul na było.

Pieradača samalotaŭ F-16 i navučańnie ŭkrainskich piłotaŭ užo daŭno źjaŭlałasia adnoj z najvažniejšych tem pieramoŭ Ukrainy i krain Zachadu ab dapamozie Kijevu ŭ adbićci rasijskaj ahresii. U kancy lipienia stała viadoma, što pieršaja partyja źniščalnikaŭ F-16 prybyła va Ukrainu.

Na hetym tydni ŭkrainskija vajskoŭcy paviedamili, što adzin z pastaŭlenych źniščalnikaŭ paciarpieŭ krušeńnie, a piłot, jaki kiravaŭ im, zahinuŭ. 30 žniŭnia ŭkrainskaje kamandavańnie pieradało amierykanskim partnioram papiaredni dakład ab krušeńni F-16.

U toj ža dzień prezident Ukrainy Uładzimir Zialenski svaim ukazam źniaŭ z pasady kamandujučaha Vajskova-pavietranymi siłami USU Mikołu Aleščuka. U videazvarocie Zialenski zajaviŭ, što jon «vyrašyŭ źmianić kamandujučaha VPS», kab umacavać vajskovaje kiraŭnictva Ukrainy.

Ministr abarony Ukrainy Rustem Umieraŭ, praŭda, asprečvaje toje, što adstaŭka Aleščuka źviazanaja z krušeńniem samalota F-16:

«Ja b, napeŭna, skazaŭ, što heta ratacyja. Heta dva asobnyja pytańni… Na hetym etapie ja b nie staŭ ich źviazvać», — zajaviŭ Umieraŭ u intervju CNN.

Pry hetym jon adznačyŭ:

«My analizujem toje, što adbyłosia. My taksama adkryli hetuju spravu dla našych partnioraŭ, tamu jany analizujuć i rasśledujuć razam z nami».

• 1
• 3
• 3
• 0
• 0
• 1
• 0
• 0