95% čałaviek prahałasavali na refierendumie za ŭklučeńnie dźviuch tracin Hajany ŭ skład Vieniesueły
Prezident Nikałas Madura zajaviŭ, što razam z hierojem nacyjanalna-vyzvalenčaj baraćby Simonam Balivaram Vieniesueła «pojdzie vyzvalać Hajanu-Esekiba».
Na kansultatyŭnym refierendumie bolš za 95% hramadzian stanoŭča adkazali na ŭsie piać pytańniaŭ i vykazalisia za admovu ad Paryžskaha arbitražnaha rašeńnia traciejskaha suda 1899 hoda i za niepryznańnie jurysdykcyi Mižnarodnaha suda AAN dla vyrašeńnia terytaryjalnaj sprečki z Hajanaj, a taksama za «supraćdziejańnie niezakonnamu rasparadžeńniu Hajanaj nie delimitavanym ź Vieniesuełaj marskim šelfam».
95% i 93% udzielnikaŭ refierendumu prahałasavali za stvareńnie štata Hajany-Esekiba i jaho ŭklučeńnie ŭ skład Vieniesueły z davańniem vieniesuelskich dakumientaŭ hramadzianam, jakija pražyvajuć na hetaj terytoryi.
U refierendumie ŭziali ŭdzieł 10 554 320 čałaviek, abo bolš za 50% hramadzian, jakija majuć prava hołasu, paviedamiŭ staršynia Nacyjanalnaj vybarčaj rady Ełvis Amarosa.
Prezident Nikałas Madura pavinšavaŭ vieniesuelski narod ź pieramohaj na refierendumie.
«Niachaj žyvie pieramoha vieniesuelskaha naroda! Niachaj žyvie kansultatyŭny refierendum!» — abviaściŭ jon na mitynhu na płoščy imia Balivara ŭ centry Karakasa, jaki tranślavaŭsia pa ŭsich kanałach vieniesuelskaha telebačańnia.
«My zrabili pieršyja kroki na novym histaryčnym etapie, kab zmahacca za toje, što naležyć nam i viarnuć toje, što było pakinuta nam vyzvalicielami — Hajanu-Esekiba». — padkreśliŭ Madura.
«Heta pieršyja kroki na šlachu da nacyjanalnaha adzinstva», — dadaŭ prezident.
Madura adznačyŭ, što amierykanskaja kampanija ExxonMobil i ŭrad ZŠA vydatkavali šmat hrošaj, kab «sabatavać refierendum, ale jon adbyŭsia ź vialikim pośpiecham».
Prezident Vieniesueły dadaŭ, što «adziny pieramožca na refierendumie — heta narod Vieniesueły i suvierenitet Vieniesueły, a prajhrali ŭrad Hajany, ExxonMobil i impieryja ZŠA».
Madura padkreśliŭ, što razam z hierojem nacyjanalna-vyzvalenčaj baraćby Simonam Balivaram Vieniesueła «pojdzie vyzvalać Hajanu-Esekiba».
Čytajcie taksama:
Narastaje napružanaść miž Vieniesuełaj i Hajanaj. Ci mahčymaja novaja vajna?
Pamiatajecie pravakatara i danosčyka Jaŭhiena Kakojtu? Jon ciapier taksama palitviazień13
Kamientary