«Jana pahražała mnie fizična, napadała seksualna». Alaksandr Rybak skardzicca na stałkierku
Śpiavak śćviardžaje, što fanatka stvaraje falšyvyja akaŭnty tysiačami, zryvaje jaho kancerty i psuje žyćcio jahonym siabram, kaleham i navat susiedziam.
Prykładna hod tamu ŭ tyktoku źjaviłasia videa, u jakim 25-hadovaja dziaŭčyna abvinavaciła pieramožcu «Jeŭrabačańnia-2009» u tym, što jon byccam by źniaŭ intymnaje videa bieź jaje zhody i pahražaŭ jaho abnarodavać, a taksama nazyvaŭ jaje eskortnicaj.
U inšym videa jana śćviardžała, što paznajomiłasia z Rybakom bolš za 12 hadoŭ tamu ŭ Małdovie, adkul jana rodam. Paźniej dziaŭčyna pracavała adnoj z pradziusarak klipa na pieśniu Rybaka Memories i, pavodle jaje słoŭ, arhanizavała źjaŭleńnie Rybaka ŭ dvuch telešou.
Pa słovach dziaŭčyny, jana źviarnułasia da śpievaka pa dapamohu. 6 sakavika 2023 hoda jany sustrelisia. Padčas sustrečy Rybak vyrašyŭ źniać pryvatnaje videa, na jakim «vidać jaje cieła i hrudzi». Dziaŭčyna abvinavaciła śpievaka ŭ pahrozach i źniavahach na jaje adras.
Na hety momant tyja videa vydalenyja z tyktoku.
Sam Alaksandr tady publična adreahavaŭ na davoli surjoznyja abvinavačvańni i ahučyŭ svaju viersiju ŭ instahramie. Pa słovach śpievaka, na praciahu hoda jaho damahałasia dziaŭčyna, ź jakoj spačatku jon mieŭ siabroŭskija adnosiny. Rybak «ź niekatorych pryčyn» nie nazyvaŭ jaje imia i davodziŭ: «Kab było jasna, my ź joj byli kalehami i navat siabrami, pierš čym jana zachapiłasia mnoj i pačała hetyja emacyjnyja i fizičnyja damahańni».
Alaksandr Rybak śćviardžaŭ, što «nikoli ničym joj nie «pahražaŭ». Prosta skazaŭ, što paviedamlu pra jaje ŭ palicyju (što i zrabiŭ)».
Rybak charaktaryzavaŭ dziaŭčynu jak psichična chvoraha čałavieka i adznačaŭ, što doŭha nikomu nie raskazvaŭ pra situacyju, bo bajaŭsia, što jana moža nanieści škodu sabie ci kamu-niebudź jašče.
«Ale ciapier, kali jana pačała raspaŭsiudžvać pra mianie čutki ŭ tyktoku, mianie heta bolš nie chvaluje, ja nie mahu zastavacca na miescy. Hetaja žančyna była apantanaja mnoj bolš za hod, a z taho času, jak ja skazaŭ joj u studzieni: «Kali łaska, pierastań sačyć za mnoj», — usio stała značna horš», — napisaŭ śpiavak na svajoj staroncy ŭ instahramie.
Ciapier Alaksandr Rybak vyrašyŭ raskazać, ci źmianiłasia niešta ŭ hetaj historyi za hod. Vyśvietliłasia, što ničoha. Pa słovach artysta, taja dziaŭčyna praciahvaje psavać jaho žyćcio.
— Ja sutyknuŭsia z manipulacyjami, pieraśledam, pahrozami vybuchu na maich kancertach, uzłomam maich akaŭntaŭ. Jana pieraśledavała mianie ŭ roznych štatach, pahražała mnie fizična, napadała na mianie seksualna, emacyjna, mientalna, stałkieryła maich susiedziaŭ.
Śpiavak taksama abvinavačvaje stałkierku, imia jakoj nie nazyvaje, što jana stvaryła tysiačy akaŭntaŭ, kab raspaŭsiudžvać pra jaho plotki, a taksama rabiła fejkavyja niudsy inšych žančyn. Alaksandr śćviardžaje, što nastojlivaja dziaŭčyna ihnaruje rašeńni suda, jakija zabaraniajuć joj nabližacca da artysta.
Rybak raskazaŭ, što na praciahu dvuch hadoŭ sprabavaŭ paźbiahać dziaŭčynu, ihnaravać jaje. Ale praz toje, što jana psuje žyćcio jahonym siabram, kaleham, nastaŭnikam (asabliva tym, chto žyvie ŭ ZŠA), jon vyrašyŭ pakinuć svoj dom u harach u Łos-Andželesie i viarnuŭsia ŭ Narviehiju, jakuju ličyć bolš biaśpiečnaj dla siabie.
— Moža, kali-niebudź ja raskažu vam usio. Moža, i nie. Ale zaraz ja prosta chaču viarnuć svajo žyćcio i atrymlivać asałodu ad biaśpieki i svabody. Vialiki dziakuj za vašu padtrymku, asabliva ŭ apošni hod, jana značyła dla mianie šmat.
U dopisie Alaksandr paprasiŭ svaich fanataŭ nijak nie pravakavać stałkierku.
— Ja razumieju, što dziakujučy hetamu videa jana atrymaje ŭvahu, jakuju choča. Ale heta datyčyć nie tolki mianie, mnie treba raspaŭsiudzić infarmacyju pra prablemy, ź jakimi maje siabry sutykajucca ŭžo doŭhi čas.
Alaksandr tehnuŭ svaich siabroŭ, jakim, pa jaho słovach, stałkierka najbolš naškodziła, raspaŭsiudžvajučy fejkavyja historyi. Artyst paprasiŭ ihnaravać lubyja plotki, jakija datyčać hetych ludziej. U śpis trapili muzyki z roznych krain, pradstaŭniki tvorčych prafiesij i navat pramoŭtar Alaksandra Rybaka.
Niekatoryja z hetych ludziej užo taksama publična vykazalisia z hetaj nahody.
Naprykład, śpiavačka Desi G ŭ storys pakazała, ź jakim vielizarnym stosam razdrukavanych listoŭ z pahrozami ad stałkierki Alaksandra Rybaka idzie ŭ sud. Artystka śćviardžaje, što paśla taho, jak jaje aficyjnyja pradstaŭniki pasprabavali ŭručyć jurydyčnyja dakumienty stałkiercy, taja adkinuła papiery, dastała hazavy bałončyk i raspyliła jaho ŭ tvary ludziam.
Artystka Vieronika Frej raskazała, što z 16 červienia atrymała kuču listoŭ ad nieznajomki. Taja patrabavała dasłać joj niejkuju zajavu z chłuśnioj. U advarotnym vypadku stałkierka pahražała apublikavać falšyvyja abvinavačvańni suprać dziaŭčyny ŭ internecie — i vykanała svaje pahrozy.
Łaren Bičynh, ekśpiertka pa antykryzisnym kiravańni, zasnavalnica ahienctva Honest London, raskazała, što stałkierka Rybaka adpraŭlała listy jaje supracoŭnikam, klijentam, lektaram i žurnalistam, ź jakimi Łaren supracoŭničaje, i navat čynoŭnikam. Pa słovach žančyny, pieraśledvalnica raspaŭsiudžvała pra jaje ahidnuju chłuśniu.
— Ja patraciła šmat hadzin na toje, kab adpravić elektronnyja listy z prabačeńniami. Ja asabista atrymała sotni listoŭ ad stałkierki. A kali ŭličyć usie astatnija, jakija jana dasyłała ludziam, źviazanym sa mnoj, to listoŭ, mabyć, tysiačy.
Łaren paviedamiła, što robić usio mahčymaje ŭ ramkach zakona, kab spynić dziaŭčynu, ź jakoj navat nie znajomaja.
Kamientary