Napad CHAMAS na Izrail. Pa ŭsioj terytoryi krainy ŭviedziena nadzvyčajnaje stanovišča
Ataka CHAMAS u subotu ranicaj stała najbujniejšaj za apošnija hady. Z 6:29 u centry i na poŭdni Izraila byli čutnyja sireny, jakija papiaredžvajuć ab rakietnych abstrełach, i vybuchi. Adnačasova z rakietnym abstrełam uzbrojenyja bajeviki zmahli pierasiekčy miažu Izraila na niekalkich učastkach i zachapić siem haradkoŭ i pasiołkaŭ. Ministr abarony Izraila abviaściŭ pra masavy pryzyŭ reziervistaŭ.
Armija abarony Izraila pryviedzienaja ŭ bajavuju hatoŭnaść u adkaz na rakietny abstreł z boku siektara Haza i praniknieńnie bajevikoŭ u pamiežnyja rajony, piša RBK.
Ministr abarony Joaŭ Hałant abviaściŭ pra masavy pryzyŭ reziervistaŭ.
Vajskoŭcy zaklikali žycharoŭ paŭdniovych i centralnych rajonaŭ zastavacca ŭ schoviščach. «Načalnik Hienieralnaha štaba pravodzić acenku situacyi i zaćviardžaje płany praciahu dziejańniaŭ CACHAŁ», — havorycca ŭ zajavie armii.
U pieršapačatkovaj spravazdačy Armii abarony Izraila (CACHAŁ) havaryłasia, što niekalki terarystaŭ pranikła na izrailskuju terytoryju ź siektara Haza.
«Žycharoŭ rajona, jaki prylahaje da siektara Haza, paprasili zastavacca ŭ svaich damach», — havorycca ŭ zajavie armii.
Zatym CACHAŁ zajaviŭ: «Izrailcianie pa ŭsioj krainie pračnulisia ad huku siren i rakietnaha abstrełu CHAMAS z Hazy hetaj ranicaj. My budziem abaraniacca».
Kancylaryja premjer-ministra Izraila Bińjamina Nietańjachu paviedamiła, što pavinna adbycca sustreča kiraŭnikoŭ słužbaŭ biaśpieki.
Masiravany abstreł Izraila praciahvajecca z 7 ranicy pa miascovym časie (supadaje ź minskim); ułady ŭskłali adkaznaść na paleścinski isłamiscki ruch CHAMAS. Niekalki čałaviek atrymali ranieńni, adna žančyna pamierła.
Ruch CHAMAS abviaściŭ pra pačatak vajennaj apieracyi suprać Izraila pad nazvaj «Pavodka Al-Aksa».
U svajoj zajavie Muchamied ad-Dejf, kiraŭnik vajennaha kryła CHAMAS, abvinavaciŭ izrailski bok u akupacyi i «nieadnarazovych uvarvańniach u miačeć Al-Aksa».
Pa śćviardžeńni CHAMAS, pa izrailskich pazicyjach było vypuščana bolš za 5 tysiač rakiet i snaradaŭ.
***
10:24
Ministr abarony Izraila zajaviŭ, što ruch CHAMAS abviaściŭ jaho krainie vajnu, izrailskija vojski viaduć bai z praciŭnikam.
11:00
CACHAŁ nazvaŭ apieracyju ŭ Hazie «Žaleznyja miačy»
«Dziasiatki źniščalnikaŭ VPS ciapier atakujuć celi terarystyčnaj arhanizacyi CHAMAS u siektary Haza», — havorycca ŭ zajavie Armii Izraila.
CACHAŁ zafiksavaŭ bolš za 2200 zapuskaŭ rakiet pa terytoryi Izraila.
Balnica «Saroka» paviedamlaje pra 80 paranienych roznaj stupieni ciažkaści. Niekatoryja z paciarpiełych znachodziacca «ŭ vielmi ciažkim stanie», havorycca ŭ zajavie miedycynskaha centra.
U svaju čarhu bajeviki CHAMAS publikujuć videa zachoplenych u pałon izrailcianaŭ. Śćviardžajecca, što ŭ pałon papali kala 35 čałaviek. Akramia taho, CHAMAS publikuje kadry z zachoplenaj izrailskaj vajskovaj bazy, dzie vajskoŭcaŭ rasstralali ŭ kazarmie, kali jany spali.
11:30
Bajeviki CHAMAS uvajšli ŭ izrailskija harady Aškiełon i Sderot
Aškiełon znachodzicca na bierazie Mižziemnaha mora za 7 km ad miažy siektara Haza.
Žychary vykładvajuć videa, jak u subotu ranicaj isłamisty patrulujuć z aŭtamatami płošču ŭ centry horada. Taksama źjaŭlajucca kadry bajevikoŭ na vulicach izrailskaha horada Sderot za 3 km ad Hazy.
«Raniej takoha maštabnaha napadu CHAMAS na Izrail nikoli nie było. Terarysty zachapili centr izrailskaha horada Aškiełon (7 km na poŭnač ad Haza) paśla praryvu ź siektara. Sderot taksama, miarkujučy pa ŭsim, častkova znachodzicca pad kantrolem CHAMAS. Heta aznačaje vajnu», — piša vajskovy analityk BILD Juljan Repkie.
11:45
Armija abarony Izraila paćvierdziła, što CHAMAS zachapiŭ siem izrailskich haradkoŭ i pasiołkaŭ kala siektara Haza
Na karcie pakazana, jak bajeviki pranikli na terytoryju Izraila.
12:15
Premjer-ministr Izraila Bińjamin Nietańjachu vystupiŭ sa zvarotam nakont apošnich padziej
Jon zajaviŭ: «Hramadzianie Izraila, my ŭ stanie vajny. Nie apieracyi, nie pierastrełki. Vajny».
Jon zapeŭniŭ, što CHAMAS «zapłacić» za siońniašni napad.
Nietanijahu paviedamiŭ, što rasparadziŭsia «začyścić pamiežnyja nasielenyja punkty ad terarystaŭ» i «pravieści mabilizacyju reziervistaŭ».
Kiraŭnik urada zaklikaŭ hramadzian Izraila padparadkoŭvacca ukazańniem armii i kiravańnia tyłam, piša newsru.co.il.
12:45
Bajeviki CHAMAS źniščyli izrailski tank Merkava Mk4, skinuŭšy bojeprypasy z drona
Raniej Merkava Mk4 ŭ Izraili nazyvali samym nieźniščalnym tankam. Za miažu jaho nie pradavali.
12:51
Papiarednija źviestki ab achviarach
U Izraili zabityja nia mienš za 22 čałavieki, kala 300 paranienych.
Kolkaść zachoplenych izrailcian, jakich vyvieźli ŭ Hazu, nieviadomaja. Krynicy ŭ Hazie zajaŭlali pra 35 pałonnych.
Ale hetyja źviestki nie paćvierdžanyja kančatkova i nie źjaŭlajucca aficyjnymi, piša newsru.co.il.
13:44
Na ŭsioj terytoryi Izraila ŭviedziena nadzvyčajnaje stanovišča
Ministr nacyjanalnaj biaśpieki Itamar Ben-Hvir adznačaje, što ŭviadzieńnie režymu nadzvyčajnaha stanovišča daść palicyi dadatkovyja paŭnamoctvy.
Taksama pryniata rašeńnie ab pryzyvie dobraachvotnikaŭ-palicejskich.
14:47
Armija abarony Izraila (CACHAŁ) praciahvaje praviadzieńnie apieracyi «Žaleznyja miačy», nanosiačy ŭdary pa vajennych abjektach u siektary Haza.
CACHAŁ zajaŭlaje, što na hety momant atakavanyja 17 vajennych kompleksaŭ i čatyry apieratyŭnyja štaby CHAMAS u roznych rajonach siektara Haza.
Tym časam rakietnyja abstreły z Hazy praciahvajucca, piša newsru.co.il.
Aleksijevič ŭ TOKu: Kali vy admoviciesia čytać Čechava i Dastajeŭskaha, to ŭpadziecie ŭ pravincyjnaść11
Kamientary