«24 lutaha a 5-j ranicy byŭ pieršy pusk». Rasijski apieratar «Iskandera» raspavioŭ, jak ź Biełarusi abstrelvali rakietami Ukrainu

Były rasijski apieratar rakietnaha kompleksu «Iskander» pa imieni Kamil, jaki dezierciravaŭ z vojska, niadaŭna raspavioŭ vydańniu «Novaja hazieta Jevropa» pra svoj udzieł u masavych rakietnych abstrełach Ukrainy z terytoryi Biełarusi. 

Pa słovach byłoha vajskoŭca, jaho rakietnuju bryhadu z Ułan-Ude adpravili na vučeńni ŭ Biełaruś jašče ŭ kancy 2021 hoda, adnak ni ŭ jakich vučeńniach, jak śćviardžaje Kamil, jaho bryhada nie ŭdzielničała, a adrazu ž raźmiaściłasia «na terytoryi biełaruskaha artyleryjskaha palihona», dzie čakała dalejšych ukazańniaŭ.

Sami ŭkazańni nie prymusili siabie doŭha čakać, užo praz paru miesiacaŭ ranicaj 24 lutaha bryhadzie «Iskanderaŭ» byŭ dadzieny zahad stralać pa vajskovych i cyvilnych abjektach Ukrainy.

«24 lutaha a 5-j ranicy byŭ zrobleny pieršy pusk — rakieta majho «Iskandera» palacieła kudyści na poŭdzień. Tak my zrazumieli, što pačałasia vajna. Bolšaść maich tavaryšaŭ pa słužbie jaje padtrymali, a kali bačyli fatahrafii razbureńniaŭ va ŭkrainskich haradach, to śpichvali ŭsio na dziejańni samich kijeŭskich uład. Ale ja pa fatahrafijach zrazumieŭ, što staŭ saŭdzielnikam złačynstvaŭ. Ja byŭ u šoku», — apisvaje svaje ŭspaminy Kamil.

Jak adznačaje były vajskoviec, u jaho bryhadzie było kala 15 puskavych ustanovak, ź jakich za ŭvieś čas ich znachodžańnia ŭ Biełarusi było vypuščana 80—90 rakiet u bok Ukrainy. 

U Biełarusi znachodzilisia jany paŭhoda z momantu pačatku vajny, paśla čaho Kamila i ŭsich jaho tavaryšaŭ pa słužbie adpuścili ŭ adpačynak dadomu. Užo tady Kamil vyrašyŭ uciačy z Uzbrojenych sił, kab bolš nie traplać na front. Na hetaje rašeńnie ŭ tym liku paŭpłyvaŭ jahony brat z vyraznaj antyvajennaj pazicyjaj. 

U vyniku były vajskoviec znoŭ viarnuŭsia ŭ Biełaruś, kab užo adtul vylecieć u Kazachstan. Adnak biełaruskija mytniki ŭčuli niešta niadobraje.

«Było vielmi niebiaśpiečna źjazdžać, bo ja mieŭ dopusk da sakretnaj infarmacyi, tamu ja vyrašyŭ jechać u Kazachstan nie naŭprost, a praź Biełaruś. Pry hetym užo ŭ minskim aeraporcie mytniki niešta zapadozryli: aktyŭna dahladali rečy, bo vyjavili maju vajskovuju prypisku da Ułan-Ude. Adnak mianie ŭ vyniku prapuścili, i ciapier ja ŭ biaśpiecy», — dzielicca Kamil.

Nahadajem, što dniami Fiederacyja amierykanskich navukoŭcaŭ vyjaviła budaŭnictva novaha anhara dla rasijskich «Iskanderaŭ» u Asipovičach, dzie ciapier skancentravana niekalki tysiač najmitaŭ PVK «Vahnier», jakija praciahvajuć prybyvać u Biełaruś pa damoŭlenaści z kiraŭnictvam Rasii.

• 12
• 1
• 2
• 1
• 3
• 60