«A ci budzie stvorany resurs nakštałt Tut.by?» Što prapahandysty kažuć biełarusam na sustrečach i jakija pytańni im zadajuć ludzi
Paśla vybaraŭ 2020 hoda prapahandystaŭ stali čaściej puskać u narod. Jany pravodziać pryjomy hramadzian, sustrečy sa studentami i kalektyvami. Pahladzieli, što adbyvałasia na takich sustrečach u apošnija miesiacy. Pytańni, jakija zadajuć prapahandystam, časam davoli niečakanyja.
Ksienija Lebiedzieva
Čaściej za ŭsio sustrakacca ź ludźmi lubić prapahandystka Ksienija Lebiedzieva. Tak, naprykład, u siaredzinie maja temu infarmacyjnaj biaśpieki jana abmiarkoŭvała za «kruhłym stałom» u Viciebsku.
Pa słovach Lebiedzievaj, na sustrečy ludzi raskazvali pra prablemu kamunikacyi z čynoŭnikami.
«Heta kali prablemu ŭźnimajuć źnizu, a jana ŭ siaredzinie nie vyrašajecca, vyšej nie idzie, zvarotnaj suviazi taksama niama, a kali jość, to heta adpiska», — napisała prapahandystka ŭ sacyjalnych sietkach.
Jašče adna vysnova, jakuju zrabiła Lebiedzieva paśla sustrečy: u abłasnych, rajonnych miedyja nie ŭźnimajecca prablemnaja tematyka.
Chtości z prysutnych zadaŭ pytańnie: «A ci budzie stvorany ŭ krainie resurs nakštałt staroha Tut.by?»
«Ludziej najpierš cikavić miesca, dzie možna pačytać pra padziei ŭ krainie, afišy, niejkija pobytavyja momanty, intervju z čynoŭnikami, dzie ŭsio skancentravana na adnoj placoŭcy, — razvažaje Lebiedzieva, nie zhadvajučy, što hetyja niezaležnyja placoŭki źniščyli ŭłady. — Hałoŭnaje pieražyvańnie, što hetuju nišu zojmie destruktyŭ, nie siońnia, dyk zaŭtra».
Źviarnuła ŭvahu prapahandystka i na toje, što čynoŭniki ŭ intervju nie chočuć adkazvać na vostryja pytańni.
«Hučyć: «Davajcie prapuścim». Siońnia prapuścim, zaŭtra svaju viersiju prapanuje ŭmoŭny Łatuška. Na pierśpiektyvu dumać ciažka. Nie žadajuć. A ŭ vyniku častka elektaratu skaža, što va ŭsim vinavaty Baćka, jak heta było ŭ 2020 hodzie», — robić vysnovu prapahandystka.
Taksama ŭ mai Lebiedzieva pryjazdžała na sustreču z moładździu ŭ Mazyrski dziaržaŭny muzykalny kaledž.
Takija razmovy prapahandysty ładziać u ramkach prajekta «Začietnyj razhovor», jaki padajecca jak infarmacyjna-aśvietnicki. Jon byŭ stvorany BRSM.
Ksienija Lebiedzieva raskazała navučencam pra svaju kamandziroŭku na Danbas i pra dośvied, jaki jana atrymała ŭ hetaj pajezdcy.
«Adčuć kaštoŭnaść biełaruskaj stabilnaści možna tolki paśla šumu snaradaŭ nad hałavoj. Ale vučycca lepš na dośviedzie inšych. Nam nie patrebny dośvied Ukrainy. I ja nie chaču takoha dla svajoj krainy», — pryvodzić jaje słovy miascovaja rajonka.
Pytańni, jakija zadavali z zały, byli pra źniešniepalityčnuju situacyju. Jak rapartuje rajonka, cikavilisia ŭdzielniki, «jakim čynam i jakimi srodkami viadziecca infarmacyjnaja vajna, jakaja rola srodkaŭ masavaj infarmacyi ŭ sučasnych realijach, jak adroźnić dakładnuju navinu ad fejkavaj, što moža zrabić moładź dla zachavańnia miru va ŭsim śviecie».
Ryhor Azaronak
U krasaviku taki ž samy «Začiotnyj razhovor» pravodziŭ Ryhor Azaronak va ŭniviersitecie fizkultury dla pieršaha i druhoha kursaŭ.
Jak paviedamlała łukašenkaŭskaja hazieta, mnohija na sustrečy zhadali fota, «dzie naš sałdat unutranych vojskaŭ pakazvaje na čałavieka, jaki lažyć, i dalej iduć kamientary, što heta siłavik-hvałtaŭnik».
«Jak vyjaviłasia, nichto z prysutnych studentaŭ nie bačyŭ poŭnaha videa, paśla prahladu jakoha stanaviłasia jasna, što čałaviek u formie nasamreč prosta dapamahaŭ adciahnuć pjanaha z-pad aŭtazaka. Čamu fejkavaje fota tyražavałasia, a videa, jakoje vykryvała jaho, niama? Śpikiery patłumačyli: častkova tamu, što bolšaja častka publiki lubić smažanyja naviny i viadziecca na chajp», — piša «SB. Biełaruś siehodnia». U rečaisnaści miedyja publikavali i videa taho momantu, a mužčyna, što lažaŭ na ziamli, Jaŭhien Zaičkin nie moh aprytomnieć paśla źbićcia.
Ryhor Azaronak pytaŭsia ŭ prysutnych: nie kryŭdna im, što «pomniki vašym ziemlakam, našym prodkam-hierojam znosiać?»
«Apahańvajuć pamiać pra ludziej, jakija ačyścili Jeŭropu ad fašysckaj čumy? A tam nie vielmi zmahalisia. Francyja, adna z apor demakratyi, miesiaca nie pratrymałasia», — kazaŭ jon, pierakručvajučy historyju. Niahledziačy na toje, što ŭrad Francyi pajšoŭ na pieramovy ź niemcami, častka francuzaŭ na čale z hienierałam Šarlem de Holem arhanizavała ruch supracivu.
U adkaz — cišynia.
Tady Azaronak pacikaviŭsia ŭ prysutnych chłopcaŭ, chto hatovy iści dobraachvotnikam abaraniać radzimu, «kali raptam na nas napaduć z boku Polščy ci Ukrainy».
U adkaz padniaŭ ruku adzin chłopiec.
«Płanaŭ šmat — pracavać, stvaryć siamju, — kaža inšy student. — Urešcie žyć chočacca».
Andrej Mukavozčyk
Sioleta ŭ mai Mukavozčyk sustreŭsia z navučencami Biełaruskaha kaledža pramysłovaści i budmateryjałaŭ.
«Začiotnyj razhovor» nie mocna adroźnivaŭsia ad inšych sustreč vyšej: z temami dla «dyskusij» prapahandysty nie zamaročvajucca.
Mukavozčyk raskazvaŭ moładzi pra nacyjanalnuju biaśpieku, raźmiaščeńnie jadziernaj zbroi ŭ Biełarusi, prablemu narkamanii, sacyjalnuju padtrymku siemjaŭ, toje, jak adroźnić praŭdu ad fejkaŭ i jak infarmacyja siońnia źmianiaje śviet.
«Hetyja ŭsie Telegram-kanały kažuć, što Biełaruś drennaja, što tam usio razrabavana — bambaschovišča. Heta ŭsio fejki, ja ŭ hetym nie sumniavajusia. Naohuł naša kanfierencyja prajšła paśpiachova, mnie ŭsio spadabałasia», — zrabiŭ vysnovu paśla sustrečy navučeniec kaledža Anton Čarapan.
Razam z hałoŭnym redaktaram łukašenkaŭskaj «SB. Biełaruś siehodnia» Dźmitryjem Žukom Mukavozčyk sustrakaŭsia z «aktyvam» u Łahojsku.
Tam jany prapanavali abmierkavać tyja pytańni, jakija chvalujuć siońnia žycharoŭ krainy, i padzialilisia svaimi dumkami pra padziei, jakija adbyvajucca ŭ Biełarusi i vakoł jaje, jak piša miascovaja rajonka.
Udzielnikaŭ razmovy cikaviła, «jaki ciapierašni status takoj asoby, jak Kastuś Kalinoŭski».
Ale tut adkaz Andreja Mukavozčyka rajonka nie pryvodzić, tolki Dźmitryja Žuka.
«Ja liču, što nie treba kidacca z boku ŭ bok, — kaža jon. — Robiačy kahości spačatku hierojem, a potym voraham ci naadvarot. Miarkuju, pravilna prosta ŭsprymać jaho isnavańnie jak histaryčny fakt.
A hałoŭny ŭrok u tym, kab zadumacca, što i čym my chočam zamianić. Mirnaje žyćcio na revalucyjnyja pieravaroty? Sacyjalnyja zavajovy na zakony dzikaha rynku? Siamiejnyja kaštoŭnaści na abiaźličanyja stasunki? Hety pieralik možna praciahvać. Pytańnie ŭ tym, ci treba nam usio heta. Dumaju, adkaz razvažnaha čałavieka pradkazalny».
Ihar Tur
Z prapahandystam ładzili «dyjałohavuju placoŭku» ŭ Krupskim lashasie.
Miascovaja rajonka sucha paviedamlaje, što z prysutnymi Ihar Tur abmiarkoŭvaŭ hramadska-palityčnuju situacyju ŭ krainie.
U hetym kantekście havorka išła pra «mietodyku pracy ekstremisckich telehram-kanałaŭ, pravakavańni karystalnikaŭ na łajki i kamientary, vyryvańnie sensaŭ z kantekstu».
Taksama razmaŭlali pra ekanomiku. Ihar Tur pierakonvaŭ prysutnych, kab jany nie daviarali analitykam, jakija vystupajuć u niezaležnych miedyja.
«Heta nie tamu, što jany drennyja analityki, a tamu, što ŭ ich niedastatkova vyčarpalnaj infarmacyi. Dla taho, kab zrabić jakasny analiz, nieabchodna prapracavać uvieś masiŭ infarmacyi, a takoj mahčymaści ŭ ich niama. U vyniku atrymlivajecca nie analityka, a fantastyka», — kaža jon.
Chtości z zały zadaŭ pytańnie pra sučasnuju moładź. Voś tolki składana zrazumieć, na jakoje kankretnaje pytańnie adkazvaŭ Tur, bo miascovaja rajonka jaho nie pryvodzić.
«Patryjatyzm — heta adekvatnaje razumieńnie i honar za pieravahi svajoj krainy. Pieravah, biezumoŭna, šmat. Ale nielha stvarać iluzornuju karcinu, treba abmiarkoŭvać prablemy i šukać šlachi ich vyrašeńnia. My cudoŭnyja, ale nie biespamyłkova idealnyja», — kaža jon.
Čytajcie taksama:
Što biełarusy dumajuć pra raźmiaščeńnie ŭ krainie jadziernaj zbroi?
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki25
Kamientary
tak on žie užie jesť
točka.baj
čie im jeŝie nado ?
rab dołžien čitať tolko orko novosti pro očieriednuju sotniu povieržiennych chajmarsov/ patriotov i 10 000 sołdat NATO za priedyduŝije 26 minut