Što biełarusy dumajuć pra raźmiaščeńnie ŭ krainie jadziernaj zbroi? 

Analityčnaja spravazdača padrychtavanaja kamandaj ekśpiertaŭ, u jakuju ŭvajšli palityčnyja analityki Pavieł Śluńkin i Arciom Šrajbman, sacyjołahi Filip Bikanaŭ i Hienadź Koršunaŭ, ekanamist Leŭ Lvoŭski.

Jak było arhanizavana apytańnie

Apytańnie było pabudavana na bazie anłajn-paneli — servisu, jaki prapanoŭvaje biełarusam u internecie prajści apytańnie. U suviazi z hetym aŭtary spravazdačy adznačajuć, što atrymanyja vyniki nie pretendujuć na reprezientatyŭnaść hramadstva i ilustrujuć tolki trendy.

A taksama pakazvajuć tendencyi ŭnutry čatyroch hrup, na jakija było padzielena hramadstva dla apytańnia: zaŭziatyja prychilniki režymu, schilnyja jamu daviarać, schilnyja nie daviarać i zaŭziatyja praciŭniki.

Aŭtary adznačajuć, što siehmienty mocna adroźnivajucca pa sacyjalna-demahrafičnych prykmietach: siarod zaŭziatych praciŭnikaŭ značna bolš mužčyn, bolš adukavanych ludziej. Pradstaŭniki hetaha siehmienta čaściej pražyvajuć u Minsku i majuć bolš vysoki dachod.

Siarod pradstaŭnikoŭ zaŭziatych prychilnikaŭ režymu, naadvarot, bolš žančyn. Zaŭziatyja prychilniki mienš adukavanyja, majuć dachod nižejšy za siaredni.

Apytańnie pravodzicca kožnyja try miesiacy, tamu ekśpierty mohuć paraŭnać novyja vysnovy z papiarednimi (atrymanymi ŭ lutym-sakaviku), a taksama z samym pieršym apytańniem, praviedzienym u mai 2022 hoda.

Usprymańnie vajny i raźmiaščeńnia jadziernaj zbroi

Novaje apytańnie pakazała, što za apošnija try miesiacy adnosiny da vajny va ŭsich čatyroch siehmientach biełaruskaha hramadstva amal nie źmianilisia. Daśledavańnie vyjaviła niaznačny rost prychilnikaŭ udziełu armii Biełarusi ŭ vajnie na baku Rasii. Kali ŭ sakaviku takich było 5%, to ŭ mai — 8,7%. Pry hetym pieravažnaja bolšaść — amal 88% — ličyć, što biełaruskaja armija nie pavinna ŭdzielničać u vajnie ni na adnym z bakoŭ.

Pavialičyć

Adnosna raźmiaščeńnia jadziernaj zbroi daśledavańnie vyjaviła cikavuju zakanamiernaść. 

Navat siarod zaŭziatych prychilnikaŭ režymu, niahledziačy na naratyvy prapahandy, mienš za pałovu hatovyja skazać, što vitajuć raźmiaščeńnie rasijskaj jadziernaj zbroi ŭ Biełarusi, a ŭ siehmiencie schilnych daviarać uładam takich ludziej jašče mienš — kala traciny. Anałahična mienš za pałovu pradstaŭnikoŭ hetaha siehmienta hatovyja skazać, što nie ličać raźmiaščeńnie jadziernaj zbroi pahrozaj dla Biełarusi.

Pavialičyć

Ekśpierty adznačajuć, što vykazvańni pra važnaść raźmiaščeńnia jadziernaj zbroi, pra toje, što jana harantuje biaśpieku Biełarusi, — heta častka praŭładnaha infarmacyjnaha pola. 

Mahčyma, u budučyni, zaŭvažajuć ekśpierty, my ŭbačym rost padtrymki raźmiaščeńnia jadziernaj zbroi za košt siehmientaŭ, schilnych daviarać režymu, ale na hety momant pierśpiektyva raźmiaščeńnia jadziernaj zbroi pałochaje i nie zadavalniaje značnuju častku biełaruskaha hramadstva.

Raskoł u hramadstvie

Raniej na fonie vajny daśledčyki nazirali rost tych, chto hatovy daviarać uładzie. Z sakavika 2022-ha da sakavika 2023-ha ich dola pavialičyłasia z 58% da 66% siarod apytanych. Heta možna patłumačyć tym, što ŭ samoj Biełarusi niama vajny, a ŭzrovień žyćcia rezka nie pahoršyŭsia. Ale ŭ apošnim kvartale hety rost spyniŭsia.

U toj ža čas, jak adznačajuć ekśpierty, z kvartała ŭ kvartał jany nazirajuć prykmiety vostraha supraćstajańnia pamiž prychilnikami i praciŭnikami režymu Łukašenki. Abiedźvie palarnyja hrupy ŭsprymajuć adna adnu praz pryzmu palityčnych prykmiet i znachodziacca ŭ infarmacyjnych burbałkach.

Zaŭziatyja praciŭniki bolš hłyboka adčuvajuć prablemy ŭnutry krainy i nadajuć vialikaje značeńnie hramadzianskim kaštoŭnaściam. Jany imknucca da transfarmacyi krainy i pierabudovy sistemy. Asnoŭny kanflikt zaklučajecca ŭ tym, adznačajuć ekśpierty, što prychilniki ŭłady nie žadajuć takoj transfarmacyi.

Čytajcie jašče:

Novaje apytańnie pakazała, kolki biełarusaŭ padtrymlivaje vajnu i raźmiaščeńnie jadziernaj zbroi

Sacyjołahi dali śviežyja źviestki, kamu biełarusy daviarajuć i ci hatovyja žyć biez Rasii

Što dumajuć biełarusy pra rasijskuju mabilizacyju. Niečakanyja vyniki daśledavańnia

• 27
• 0
• 2
• 4
• 8
• 1
• 16
• 0