Huhł moža vydać historyju vašych pieramiaščeńniaŭ. Jak abaranić vaš Google-akaŭnt — padrabiazny hajd
Ci viedajecie vy, što ŭsia historyja vašych padarožžaŭ moža zachoŭvacca ŭnutry akaŭnta? A ci praviarali vobłaka Google, dzie mahli zastacca fotazdymki, jakija vy vydalali? I ci nadziejny vaš parol? Raspaviadajem pra niuansy abarony ekasistemy Google.
Źmiest artykuła (šukajcie patrebny vam punkt i hartajcie nižej):
- Jak stvaryć mocny parol;
- Naładka dvuchfaktarnaj aŭtentyfikacyi;
- Pravierka pryład i resursaŭ, jakija majuć dostup da akaŭnta;
- Pravierka parolaŭ, zachavanych u akaŭncie;
- Jak nie zachoŭvać historyju, asabliva — miescaznachodžańniaŭ i pošuku;
- Praviercie, jakimi źviestkami vy dzieliciesia i što bačna ŭ vašym akaŭncie;
- Jak pačyścić Google Photos i Google Drive;
- Jak pačyścić poštu.
Vykarystoŭvajcie mocny parol
Heta vielmi važna dla taho, kab abaranić vaš akaŭnt u Google i nie tolki. Kali karotka pra stvareńnie nadziejnych parolaŭ:
- Pad mocnym parolem my razumiejem taki parol, u jakim bolš za 12 simvałaŭ.
- Jon nie składzieny z realna isnujučych słovaŭ abo naboru ličbaŭ, źviazanych z vami (naprykład, u im niama vašaj daty naradžeńnia).
- Jon nie vykarystoŭvajecca nidzie, akramia vašaha Google-akaŭnta.
- Vy nie zachoŭvajecie jaho ŭ braŭziery, «natatkach» u vašym smartfonie, na listku kala noŭtbuka abo ŭ «zachavanych» paviedamleńniach u miesiendžarach abo sacsietkach.
Kali ŭ vas nie taki, to samy čas stvaryć taki parol. Dla taho, kab schiema pracavała, vam varta prydumać dla jaho asacyjacyju abo zachoŭvać jaho ŭ mieniedžary parolaŭ.
Kali vy chočacie jaho zapomnić, to, da prykładu, vy možacie abrać u jakaści asacyjacyi niejki vierš abo niepapularnuju prymaŭku. Taksama ŭ paroli musiać być vialikija i maleńkija litary — vy možacie vykarystać datu napisańnia tvora ŭ jakaści «kantrolnaha» naboru ličbaŭ.
Dla prykładu voźmiem vierš Maksima Tanka «He škadujcie, chłopcy, porachu…», napisany ŭ 1941-m hodzie. Jon hučyć tak:
He škadujcie, chłopcy, porachu,
kul haračych i hranataŭ.
Usie, kamu svaboda doraha,
padymajciesia na vorahaŭ,
na kataŭ!
Voźmiem ź jaho tolki pieršyja litary słoŭ (anhlijskaj łacinkaj), ale zachavajem znaki prypynku. U kancy kožnaj strafy (da čaćviortaj) pastavim ličbu z hoda napisańnia. Atrymajecca tak:
Ns,h,p,1kgig.9U,ksd,4pnv,1nk!
Ciapier, pakul vy pamiatajecie hety vierš, vy zdolejecie adnavić vaš parol, pry hetym jon davoli składany — u im zachavanyja i litary jak małyja, hetak i vialikija, jość jak ličby, hetak i znaki prypynku.
Vy možacie madyfikavać hetuju schiemu jak zaŭhodna (uziać radki ź luboj knihi i luboj staronki, pierastavić daty jak vy sami zachočacie abo prydumać inšyja ličby) abo prydumać svaje asacyjacyi — hałoŭnaje, kab łohika była nie vidavočnaj, ale dobra zrazumiełaj mienavita vam.
- Kali vy prydumali nadziejny parol i ŭpeŭnilisia, što zdolnyja jaho zapomnić, to źmianicie vaš stary parol ad akaŭnta. Dla hetaha adkryjcie staronku Google (abo prahramu Google na vašym smartfonie). U pravym vierchnim kucie naciśnicie na značak vašaha ŭlikovaha zapisu.
- Paśla naciśnicie «Kiravać Ulikovym zapisam Google».
- U mieniu, jakoje budzie źleva, abiarycie punkt «Biaśpieka».
- Pierajdzicie da punktu «Uvachod u Google» i naciśnicie na punkt «Parol».
- Dalej uviadzicie stary parol ad akaŭnta.
- Na staroncy, jakaja adkryjecca paśla, vy možacie ŭvieści novy parol. Kab pravieryć, što vy dakładna jaho zapomnili, uviadzicie jaho dvojčy.
Paśla źmieny parola rehularna ŭznaŭlajcie jaho ŭ pamiaci — tak mienšaja imaviernaść jaho zabycca. Lepš pamianiać jaho praź pieryjad, jaki vy vyznačycie sami (ale nie paźniej, čym praz hod).
Naładźcie dvuchfaktarnuju aŭtentyfikacyju (ale nie praz atrymańnie SMS)
Heta važna dla taho, kab navat u vypadku, kali vašym parolem niechta zavałodaje, jon nie zdoleje ŭvajści ŭ akaŭnt. SMS — nienadziejny sposab, asabliva kali vy ŭ Biełarusi (jość šmat sposabaŭ pierachopu SMS).
- Kab jaje naładzić, uvajdzicie ŭ nałady, u punkt «Biaśpieka» i abiarycie punkt «Dvuchetapnaje spraŭdžańnie» (šlach taki ž, jak i ŭ minułym punkcie). Taksama važna, kab vy ŭvajšli ŭ vaš akaŭnt prynamsi na adnoj mabilnaj pryładzie.
- Tut naciśnicie «Pačać» i ŭviadzicie parol ad akaŭnta jašče raz. Google prapanuje vam naładzić dvuchetapnuju aŭtentyfikacyju praz atrymańnie paviedamleńniaŭ na vaš telefon (kali adrazu prapanuje praz sms — naciśnicie «Pakazać dadatkovyja paramietry»). Naciśnicie «Praciahnuć».
- Paśla hetaha na ekranie źjaviacca reziervovyja kody. Lepš ich zachavać u nadziejnym miescy — kali vaš telefon budzie niedastupny, vam budzie prosta adnavić dostup da akaŭnta.
- Ciapier varta abrać sposab dla dvuchfaktarnaj aŭtentyfikacyi z dapamohaj hienieratara adnarazovych parolaŭ. Dla hetaha treba spampavać prahramu, jakaja budzie hienieryravać adnarazovyja paroli na vaš smartfon. Dla Android my raim prahramu andOTP, a dla iOS — Step Two (jany majuć bolš hnutkija nałady, čym Google Authenticator). Dalej naciśnicie «Prahrama Authenticator».
- Paśla hetaha na ekranie źjavicca QR-kod, jaki treba adskanavać prahramaj, jakaja hienieryruje adnarazovyja kody.
- Naciśnicie «Dalej». U poli, jakoje źjavicca, uviadzicie kod z prahramy. Ciapier vaša akno naładaŭ budzie vyhladać tak.
- Paśla hetaha dvajnaja aŭtentyfikacyja budzie ŭklučanaja, a ŭ prahramie hienieracyi adnarazovych kodaŭ ich možna hienieravać navat bieź internetu.
Praviercie pryłady i resursy, jakija majuć dostup da akaŭnta
Časta my zabyvajemsia, jakim pryładam, resursam i prahramam dali dostup da akaŭnta. Heta niebiaśpiečna, bo nieviadoma, da kaho mohuć patrapić hetyja pryłady, a prahramy i resursy mohuć być uzłamanyja.
- U naładach uvajdzicie ŭ punkt «Biaśpieka». Spuściciesia da punktu «Vašy pryłady». Naciśnicie na punkt.
- Paśla hetaha adkryjecca śpis pryładaŭ, ź jakich vy załahinienyja ŭ vaš Google-akaŭnt.
- Kali vy bačycie tam nieznajomuju pryładu, to naciśnicie na jaje. Google pakaža vam nazvu pryłady i rehijon, ź jakoha jana była aktyŭnaja ŭ apošni raz.
- Kali vy nie paznajacie pryładu dahetul, to vyłahińcie jaje z vašaha akaŭnta. Kab heta zrabić naciśnicie «Vyjści» i paćvierdzicie dziejańnie, jašče raz nacisnuŭšy «Vyjści».
- Paśla viartajciesia ŭ mieniu «Biaśpieka». Źnizu jość punkt «Uvachod na inšyja veb-sajty» — naciśnicie na jaho.
- U aknie, jakoje adkryjecca, źvierchu budzie punkt «Staronnija prahramy z dostupam da vašaha ŭlikovaha zapisu» (kali ŭ vas takija jość). Praviercie, kab tam nie było ničoha lišniaha.
- Pry naciskańni na kožnuju z prahramaŭ u śpisie Google pakaža vam, jaki adras prahramy, jakoj vy dali dostup, i da čaho mienavita jana maje dostup. Kali vy chočacie vydalić prahramu — naciśnicie «Vydalić dostup» i paćvierdzicie dziejańnie.
- Trochu nižej, u punkcie «Uvachod praz Google», jość śpis usich sajtaŭ i resursaŭ, na jakija vy załahinienyja praz Google-akaŭnt.
- Pierahlańcie śpis i prybiarycie adtul usie resursy i prahramy, jakimi vy nie karystajeciesia. Dla hetaha naciśnicie na niejkuju z prahramaŭ — vam adkryjecca akno, u jakim budzie pakazany adras resursa, jakomu vy dali dostup i kali vy dali hety dostup, a taksama jakuju infarmacyju akaŭnta moža bačyć resurs.
- Kab zabrać u resursu dostup da vašaj infarmacyi, naciśnicie «Vydalić dostup» i paćvierdzicie dziejańnie, nacisnuŭšy «Ok».
Pierapraviercie paroli, zachavanyja ŭ vašym akaŭncie Google
Časta my zachoŭvajem paroli ŭ akaŭncie — heta zručna, bo dazvalaje ich nie zapaminać. Ale heta niebiaśpiečna, bo kali niechta atrymaje dostup da akaŭnta, to atrymaje i dostup da ŭsich siervisaŭ, da jakich my zachavali parol.
- Kab pravieryć, jakija paroli zachavanyja ŭ akaŭncie, viarniciesia ŭ mieniu «Uvachod u Google». Znajdzicie tam «Mieniedžar parolaŭ» i naciśnicie na jaho.
U našym vypadku zachavanyja dva paroli. Vydalim adzin ź ich — dla hetaha treba jaho nacisnuć, a paśla ŭvieści parol ad akaŭnta.
Dalej vam adkryjecca vaš parol — jaho možna pierahlanuć, a taksama padredahavać. Kab jaho vydalić, naciśnicie «Vydalić» i paćvierdzicie dziejańnie.
Padumajcie, ci varta zachoŭvać historyju, asabliva — miescaznachodžańniaŭ i pošuku
Samo pa sabie zachavańnie historyi zroblenaje dla taho, kab prapanavać vam bolš relevantnyja pasłuhi i tavary. Ale ŭ vypadku, kali niechta atrymaje dostup da vašaha akaŭnta, to jon moža atrymać poŭnuju historyju vašych dziejańniaŭ z akaŭntam, a taksama historyju pošuku i vašych pieramiaščeńniaŭ.
- Kab vyklučyć historyju miescaznachodžańniaŭ, uvajdzicie ŭ nałady i pierajdzicie ŭ punkt «Danyja i pryvatnaść».
- Spuściciesia da punktu «Nałady historyi». Naciśnicie «Historyja miescaznachodžańniaŭ».
- Spačatku naciśnicie «Vyklučyć».
- Paćvierdzicie dziejańnie, nacisnuŭšy «Prypynić».
- Paśla hetaha možna vydalić historyju miescaznachodžańniaŭ. Naciśnicie «Kiravać historyjaj». Adkryjecca staronka kartaŭ, na jakoj buduć pakazanyja zachavanyja kropki miescaznachodžańnia. Naciśnicie na simvał šaściareńki (adkryvaje akno naładaŭ).
- Naciśnicie «Vydalić historyju miescaznachodžańniaŭ». Paćvierdzicie vydaleńnie historyi.
- Kab vydalić historyju pošuku i vykarystańnia servisaŭ, viarniciesia ŭ mianiu «Nałady historyi». Naciśnicie «Dziejańni ŭ internecie i ŭ prahramach».
- Naciśnicie «Vyklučyć», kab adkryłasia akno, u jakim vy možacie adklučyć zachavańnie dziejańniaŭ. Naciśnicie «Prypynić».
- Paćvierdzicie dziejańnie i viarniciesia nazad, u punkt «Dziejańni ŭ internecie i prahramach». Naciśnicie «Kiravać usioj historyjaj dziejańniaŭ u internecie i prahramach».
- U mieniu, jakoje adkryłasia, naciśnicie «Vydalić» — heta dazvolić vam vydalić vašy raniejšyja dziejańni. Naciśnicie «Za ŭvieś čas».
- Paśla hetaha adkryjecca akno, u jakim pakažacca, historyju vykarystańnia čaho mienavita vy vydalajecie. Abiarycie ŭsie (kali jany nie abranyja napačatku).
- Naciśnicie «Dalej». U nastupnym mieniu vam pakaža, jakija mienavita dziejańni vy ździajśniali ŭ prahramach.
- Naciśnicie «Vydalić». Paśla hetaha vypłyvie finalnaje akno, jakoje paviedamić vam pra toje, što vydaleńnie skončanaje. Viarniciesia ŭ punkt mieniu «Danyja i pryvatnaść».
- Ciapier vy možacie adklučyć piersanalizacyju rekłamy i pošuku — tearetyčna, jany taksama mohuć być niebiaśpiečnymi. Dla hetaha viarniciesia ŭ mieniu «Danyja i kanfidencyjalnaść» i dahartajcie da punktu «Piersanalizavanaja rekłama». Naciśnicie na punkt «Moj centr rekłamy».
- Paśla vy možacie nacisnuć na punkt «Uklučana» i vyklučyć piersanalizavanuju rekłamu.
- Paśla paćvierdžańnia Google skaža vam, što piersanalizavanaj rekłamy bolš niama.
- Kab vyklučyć piersanalizavanyja vyniki pošuku, viarniciesia nazad i abiarycie punkt «Piersanalnyja vyniki ŭ Pošuku». Dla ich vyklučeńnia naciśnicie na paŭzunok pravaruč ad frazy «Pakazvać piersanalnyja vyniki».
- Ciapier vyniki pošuku nie buduć pryviazanymi da vas, a vam nie buduć prapanoŭvać pošukavyja zapyty, zasnavanyja na vašych cikaŭnaściach.
Praviercie, jakimi źviestkami vy dzieliciesia i što bačna ŭ vašym akaŭncie
Časta my zabyvajem, što mienavita zapisana ŭ Google-akaŭncie i što z hetaha dastupna publična — kali vy dajecie dostup niejkaj prahramie ci sajtu da vašych «Źviestkaŭ profilu», to jana bačyć usie hetyja danyja.
- Viarniciesia nazad u mieniu «Danyja i kanfidencyjalnaść» i dahartajcie da punkta «Źviestki, jakija vy možacie abahulvać ź inšymi karystalnikami». Nacinicie punkt «Profil».
- Źviarnicie ŭvahu na toje, ci nie dzieliciesia vy z usimi achvotnymi, da prykładu, dataj vašaha naradžeńnia abo inšym źviestkami (heta možna naładzić, kali nacisnuć na punkt). Nielha zabaranić inšym bačyš vaš E-mail i psieŭdanim na Google — inačaj stasunki praz servis stanuć niemahčymymi. Usiu astatniuju infarmacyju pra vas možna zabaranić bačyć inšym (abo vydalić, abo zapisać tudy falšyvuju).
- Ciapier viarniciesia nazad i pierahlańcie punkt mieniu «Abahulvańnie hieadanych». Praviercie, kab vy nie abahulvali ich ź lišnimi servisami abo ludźmi.
Pačyścicie Google Photos i Google Drive
U hetych servisach časta zachoŭvajecca šmat źviestak, pra jakija vy mahli zabycca — u tym liku i foty, jakija vy chacieli b vydalić.
- Spačatku zajdzicie ŭ vaš akaŭnt Google Photos (na Android heta prahrama «Fota»). Pierahladzicie vašy fota va ŭkładcy «Fota».
Vydalicie tyja, zachoŭvać jakija niebiaśpiečna. Dla hetaha vydzielicie ich i naciśnicie na simvał «śmietnicy».
- Paśla hetaha ŭvajdzicie va ŭkładku «Archiŭ». Pahladzicie, ci niama niečaha niebiaśpiečnaha tam. Dalej uvajdzicie va ŭkładku «Śmietnica». Naciśnicie «Ačyścić śmietnicu» i paćvierdzicie dziejańnie — ciapier usie fota adtul buduć biezzvarotna vydalenyja.
Jak nadziejna vyčyścić foty z vašych smartfonaŭ — padrabiazny hajd
- Dalej uvajdzicie ŭ vaš Google Drive (na smartfonach ź sistemaj android — prahrama «Dysk»). Pahladzicie, što jość na vašym vobłaku i što z hetaha moža być niebiaśpiečnym. Praviercie taksama tečku «Dastupnyja mnie» — tam vas mohuć padpilnoŭvać niečakanyja siurpryzy.
- Paśla vydaleńnia zajdzicie ŭ «Śmietnicu». Naciśnicie «Ačyścić śmietnicu». Paćvierdzicie dziejańnie, nacisnuŭšy «Vydalić nazaŭsiody».
Ciapier fajły z vašaha dysku vydalenyja biezzvarotna.
Pačyścicie Gmail
Uzhadajcie, što moža być u vašaj pošcie z taho, što moža stvaryć vam niebiaśpieku.
- Vydalicie listy. Usie vydalenyja listy z Gmail pieramiaščajucca ŭ «Śmietnicu». Zajdzicie ŭ jaje.
- Naciśnicie «Ačyścić śmietnicu».
Paćvierdzicie dziejańnie. Ciapier niebiaśpiečnyja listy vydalenyja nazaŭsiody.
«Naša Niva» — bastyjon biełaruščyny
PADTRYMAĆBiełaruskija śpiecsłužby kupili na imia Ramana Pratasieviča dva aŭtamabili ŭ Polščy. Našto?6
Kamientary