U Hiermanii pamior navukoviec Michaił Jeramiec. Jon naradziŭsia ŭ Pinsku
16 listapada na 75-m hodzie žyćcia pamior Michaił Jeramiec — vydatny biełaruski vučony, jaki pracavaŭ u halinie fiziki vysokich ciskaŭ i zvyšpravodnaści. Jon pajšoŭ z žyćcia paśla praciahłaj chvaroby ŭ Majncy, dzie z 2001 hoda ŭznačalvaŭ daśledčuju hrupu ŭ Instytucie chimii Maksa Płanka, paviedamlaje sajt «Biełaruś i śviet».
Michaił Jeramiec naradziŭsia 3 studzienia 1949 hoda ŭ Pinsku. Jon skončyŭ tam siaredniuju škołu №3, paśla čaho praciahnuŭ navučańnie ŭ Maskoŭskim inžynierna-fizičnym instytucie.
U dalejšym jaho navukovaja karjera była źviazana z daśledavańniami ŭ Rasii, Francyi, Vialikabrytanii, Japonii i ZŠA. Z 2001 hoda jon asieŭ u Hiermanii, dzie praciahnuŭ svaju pracu ŭ Instytucie chimii Maksa Płanka.
Jeramiec i jaho kamanda dasiahnuli mnostva praryŭnych vynikaŭ u halinie fiziki vysokich ciskaŭ i zvyšpravodnaści, u tym liku adkryćcia novych faz i ŭłaścivaściej takich elemientaŭ, jak vadarod, azot i natryj.
Siarod ich dasiahnieńniaŭ — pieratvareńnie hidrydu siery ŭ zvyšpravadnik pry tempieratury -73 hradusy Celsija, a hidrydu łantanu — pry -23 hradusach.
Taksama daśledčyckaja hrupa Jeramca pieratvaryła azot u ćviordy palimier, padobny na ałmaz, i pakazała, što pad ekstremalnym ciskam natryj stanovicca prazrystym, a vadarod pieratvarajecca ŭ mietał.
Michaił Ivanavič byŭ udastojeny mnohich uznaharod, u tym liku załatoj miedali imia Uha Fana, premii Biernda Matyjasa, premii Džejmsa Makhrodzi, a taksama zvańnia hanarovaha doktara Lejpcyhskaha ŭniviersiteta.
U 2015 hodzie časopis Nature ŭklučyŭ jaho ŭ śpis dziesiaci vučonych, jakija zrabili značny ŭkład u raźvićcio suśvietnaj navuki.
Były aficer, vyžyŭ u strašnym bai. Chto toj kalinoviec Vieramiejčyk, jakoha Vjetnam addaŭ biełaruskamu KDB?32
Kamientary