Vyjšaŭ «Hładyjatar 2». Adny hledačy jaho raznosiać, inšyja ŭ zachapleńni — voś čamu
Zdymać sikveł viadomych filmaŭ — ryzyka, a kali havorka pra sikveły kultavych stužak, hetaja ryzyka ŭzrastaje ŭ šmat razoŭ. Tym nie mienš Rydli Skot pajšoŭ na toje, kab pradstavić nam «Hładyjatara 2» praz čverć stahodździa paśla pieršaj stužki.
Prajšło 16 hadoŭ paśla śmierci impieratara Marka Aŭrelija — adnaho z hierojaŭ pieršaha «Hładyjatara», fiłosafa i adnaho ź piaci tak zvanych dobrych impierataraŭ Ryma. Novyja kiraŭniki impieryi — braty Hieta i Karakała, tyrany i karupcyjaniery, jakich dabrabyt rymlan cikavić našmat mienš za ŭłasnyja zabavy.
I ŭ takich umovach Rym praciahvaje pašyracca. Bravy trybun Akacyj (Piedra Paskal) zavajoŭvaje dla impieryi krepaść u afrykanskaj Numidyi i biare ŭ pałon tamtejšych vajskoŭcaŭ, u tym liku svajho numidyjskaha kalehu Chana. Razam ź inšymi numidyjcami Chana traplaje ŭ niavolnictva, dzie handlar niavolnikami Makryn zaŭvažaje jaho šalony charaktar i vyrašaje zrabić z Chana hładyjatara.
Paźniej my daviedvajemsia, što dla Chana pryjezd u Rym — nasamreč viartańnie dachaty. Za abliččam śmiełaha numidyjca chavajecca Łucyj (Poł Mieskał), syn Łucyły, siastry byłoha impieratara Kamoda, i Maksimusa — taho samaha hładyjatara ź pieršaj častki, hieroja Raseła Krou. Chłopiec poŭny žadańnia adpomścić Akacyju, ale daviedvajecca, što toj — muž jaho maci, dy i ŭ Łucyja-Chana źjaŭlajucca bolš istotnyja prablemy.
Takuju historyju nam pradstaviŭ Rydli Skot. Jaje ŭvasableńnie kaštavała šalonych hrošaj — pa roznych danych, heta ad 210 miljonaŭ da 310 miljonaŭ dalaraŭ. Pytańniaŭ pra toje, kudy pajšli hrošy, u vas nie ŭźniknie — zhadajem chacia b scenu, dzie arena Kalizieja zapoŭnienaja vadoj, dzie płavajuć akuły, a kamandy hładyjataraŭ zmahajucca pamiž saboj na karablach. Viadoma, u «Hładyjatary 2» chapaje šykoŭnych batalnych scen.
Adznačym akciorskuju pracu Denzieła Vašynhtona. Vašynhton, najbolš viadomy pa rolach u bajevikach i trylerach, uvasobiŭ u «Hładyjatary 2» Makryna — handlara niavolnikami i intryhana, dy ledź nie pierajhraŭ u hetaj roli druhoha płanu hałoŭnych zorak stužki. Jaho Makryn — sapraŭdy dvudušnaja asoba i jarki antahanist Łucyja, ale pry tym jon spakojny i charyzmatyčny, pa-svojmu mocny. Złodziej ź jaho dakładna ŭdaŭsia.
Sam Łucyj — piersanaž inšaha płanu, jon poŭny vysakarodnaści, ale pry hetym jaho nie nazavieš zusim adnabakovym — źviarnicie ŭvahu, jak jon pavodzić siabie pry pieršaj sustrečy z maci. Łucyj demanstruje čystyja emocyi, nie abciažaranyja nijakimi haniebnymi pamknieńniami: kali jon złujecca ci adčuvaje hnieŭ, kali jon choča pomsty — usio heta vyklikanaje niespraviadlivaściu da jaho, jaho blizkich i Rymu, a nie žadańniami atrymać niešta dla siabie.
Praz 25 hadoŭ paśla minułaj stužki Rydli Skot znoŭ stvaryŭ historyju pra absalutnuju maralnuju čyściniu i jaje sutyknieńnie z absalutnym złom — sioleta heta zło ŭ asobie Makryna i dvuch prydurkavatych impierataraŭ-bratoŭ. Kamuści takija vobrazy mohuć padacca zanadta sproščanymi i navat płoskimi. Ale što drennaha ŭ tym, što ŭ kino znoŭ źjavilisia pierakanaŭčyja ideały?
Jak i ŭ vypadku ź minułym filmam, ad sioletniaha «Hładyjatara 2» nie davodzicca čakać poŭnaj histaryčnaj dakładnaści, ale ŭsio ž možna prasačyć peŭnyja paraleli z historyjaj. Łucyj Vier, syn Łucyły, nasamreč isnavaŭ, ale pamior u dziacinstvie, pra nienavisnaha jamu trybuna Akacyja historyki ŭvohule nie čuli.
Hieta i Karakała sapraŭdy kiravali Rymam i zastalisia nie lepšymi jaho impieratarami ŭ historyi, ale paśla śmierci Hiety Karakała kiravaŭ impieryjaj jašče šeść hadoŭ, i paśla hetaha na jaho miescy źjaviŭsia toj samy chitry Makryn. A praź niekalki impierataraŭ paśla jaho Rymam staŭ kiravać Maksimin I, adzin ź vierahodnych pratatypaŭ hładyjatara Maksimusa. Jaho, Maksimusa, u novaj stužcy zhadvajuć nieadnojčy, i adzin ź jaje samych pryhožych momantaŭ — toj, kali nam pakazvajuć mahiłu hieroja Raseła Krou. Jašče adzin histaryčny fakt — u Kaliziei nasamreč ładzili marskija bai, praŭda, zdarałasia heta tolki niekalki razoŭ za ŭvieś čas isnavańnia impieryi.
Zrešty, my lubim sahu pra hładyjataraŭ nie tolki za ŭroki historyi — kaštoŭnaść tvoraŭ Rydli Skota ŭ ich maštabie, vidoviščnaści i takim uzroŭni maralnaha pafasu, jaki redka sustrenieš u sučasnym kino. Rejtynhi filma na bujnych kinaplacoŭkach — 7,1/10 na resursie IMDb i 75% na Rotten Tomatoes. Zbory filma za pieršy ŭik-end skłali $87 miljonaŭ, i heta dobry pakazčyk, tym bolš što stužka pakul nie vyjšła ŭ ZŠA, dzie jaje dakładna čakajuć.
Ale jość i chvala niezadavolenaści. Zhadajem, naprykład, krytyka Patryka Śmita z brytanskaj Independent — jon apisvaje svaje ŭražańni ad filma jak rasčaravańnie i razdražnieńnie: «Hładyjatar 2» Skota zdajecca na dziva paśpiešlivym, kučaj niedapracavanych idej i lanivych adsyłak da aryhinalnaha hieroja Krou 2000 hoda». Krytyki taksama źviartajuć uvahu, što šlach Łucyja na hładyjatarskuju arenu paŭtaraje šlach jaho baćki, to-bok Rydli Skot nie znajšoŭ dla sikveła niejkaj navatarskaj idei.
Raznosili novy film tyja krytyki, kamu važna było paraŭnać jaho ź pieršaj karcinaj. Tak, «Hładyjatar 2» nie prapanuje ničoha navatarskaha ŭ paraŭnańni ź pieršym filmam, i Poł Mieskal — nie Raseł Krou. Novaja stužka naŭrad ci stanie takoj ža kultavaj, jak papiaredniaja (chacia pabačym), i «Hładyjatar 2» nie pakidaje paśla siabie doŭhaha prysmaku.
Ale heta adnaznačna adzin ź jarkich filmaŭ hoda, jakomu ŭžo ciapier pradrakajuć «Oskar» dla Denzeła Vašynhtana za rolu druhoha płanu.
«Naša Niva» — bastyjon biełaruščyny
PADTRYMAĆHajdukievič uziaŭ novy ŭzrovień chamstva — prapanavaŭ znajści žančyn, jakija aceniać, ci jaho člen byŭ na dykpiku11
Kamientary