«Hałoŭnaje, jak skazaŭ kiraŭnik dziaržavy, — «raździavacca i rabić». Chto taki Mikita Palakievič — novy tvar ANT
U łukašenkaŭskich ŚMI redka, ale źjaŭlajucca novyja asoby. Chtości idzie tudy adpracoŭvać raźmierkavańnie paśla ŭniviersiteta, inšym padabajecca žyćcio ŭ łukašenkaŭskim asiarodździ. Televiadučy ANT Mikita Palakievič jakraz z apošnich.
Chłopcu 21 hod. Sioleta Palakievič skončyŭ fakultet žurnalistyki BDU pa śpiecyjalnaści «Žurnalistyka mižnarodnaja».
Ciapier jon viadzie «Našy naviny» na ANT. I heta jaho śviadomy vybar. Na žurfaku Mikita Palakievič vučyŭsia na płatnym adździaleńni, jon nie maje raźmierkavańnia, jakoje źjaŭlajecca abaviazkovym dla biudžetnikaŭ.
Pracavać na ANT Mikita Palakievič maryŭ jašče ź pieršaha kursa ŭniviersiteta. Mienavita tady, u 2018-m, jon trapiŭ na kanał na praktyku. Chutka chłopiec staŭ karespandentam, a paśla jaho pavysili da televiadučaha.
«Stać viadučym — heta toje, da čaho ja išoŭ doŭhi čas.
Viedajecie, na sumoŭjach pytajucca: «Kim vy bačycie siabie praź piać hadoŭ?» Dyk voś, ja baču siabie jak minimum viadučym aŭtarskaj prahramy i «Słavianskaha bazaru ŭ Viciebsku», — dzialiŭsia płanami Palakievič u intrevju dziaržaŭnamu ŚMI.
Taksama chłopiec razvažaŭ pra svaju pracu. U jaho vyklikaje ździŭleńnie, čamu siońnia ŭ słova «prapahanda» ŭkładajuć niehatyŭny sens.
«Prapahandavać — značyć tranślavać kurs dziaržavy, jaje viektary i pryjarytety raźvićcia, a taksama ideały i kaštoŭnaści. Ja nie padbuchtorvaju z ekrana da raźviazvańnia vajny i nie raskazvaju padletkam, što narkotyki — heta dobra.
Ja tranśluju dziaržaŭny paradak dnia, a nie farmuju jaho. Heta i misija, i sens hetaj prafiesii», — kazaŭ jon.
Jašče ŭ studenctvie Palakievič aktyŭna braŭ udzieł u pracy Maładziovaha parłamienta, letam 2020-ha jon staŭ namieśnikam staršyni parłamienta Jahora Makareviča.
Padčas pracy ŭ parłamiencie Mikita Palakievič zaśviaciŭ pobač z Natallaj Kačanavaj. Sioleta jana ŭručyła jamu padziaku «pa vynikach pracy».
«Hałoŭnaje, jak skazaŭ kiraŭnik dziaržavy, — «raździavacca i rabić». U krainie stvorany ŭsie ŭmovy dla raźvićcia moładzi. Skažu banalna, ale pośpiech u žyćci zaležyć tolki ad ciabie samoha. Ustań z kanapy i pačni dziejničać», — raiŭ moładzi Palakievič.
Pra što raskazvaje hledačam televiadučy Mikita Palakievič?
Z ekranaŭ prapahandyst časta raspaŭsiudžvaje fejki pra Ukrainu, apraŭdvaje impieryjalistyčnuju vajnu i rasčlanieńnie suvierennaj dziaržavy.
«Suprać mirnaha nasielnictva vykarystoŭvajuć nataŭskaje ŭzbrajeńnie, — paviedamlaŭ Palakievič hledačam. — Šerah pravakacyj i ŭ inšych abłaściach. Adnak sproby sarvać refierendum pakul nie mieli pośpiechu. Tolki zredku vybarčyja ŭčastki evakujujuć u bambaschovišča. Siaredniaja jaŭka pa respublikach Danbasa, Chiersonskaj i Zaparožskaj abłaściach pieravysiła 20 adsotkaŭ».
«Sproby zadušyć Saviecki Sajuz i krainy postsavieckaj prastory — heta dakładnaja i vyvieranaja stratehija NATA, jakaja realizavałasia ciaham 70 hadoŭ. Usie ciapierašnija dziejańni aljansu varta razhladać vyklučna pahroźliva», — dyktarskim hołasam zapeŭnivaje chłopiec.
ANT farmalna ličycca dziaržaŭnym telekanałam, ale dziejničaje jak pryvatny łukašenkaŭski resurs. Infarmacyja padajecca adnaboka, ci to na ŭnutrybiełaruskija temy, ci to na temy mižnarodnaha žyćcia i toj ža vajny va Ukrainie. Choć dziaržaŭny ŚMI pa aznačeńni pavinien byŭ by adlustroŭvać roznyja pazicyi, jakija isnujuć u hramadstvie.
Hanarycca Mikita Palakievič svajoj kamandziroŭkaj razam z «biełaruskimi miratvorcami» ŭ Kazachstan u studzieni 2022-ha. Padčas pratestaŭ u Ałmaty jon vioŭ repartaž ź miesca padziej.
Nie saromiejecca Palakievič vykarystoŭvać i vidavočnyja prapahandysckija naratyvy: raskazvaje pra «niaprosty čas» u 2020-m, kali «žmieńka psieŭdapatryjotaŭ pasprabavała ŭskałychnuć biełarusaŭ».
«Sučasny patryjatyzm — heta nie tolki i nie stolki pramovy za trybunaj, choć ab surjoznych rečach siońnia havaryli šmat, heta jašče i adčuvańnie niejkaha adzinstva. Kali adzin za ŭsich, i ŭsie — za krainu. Niaprosty čas byŭ, ale Biełaruś vystajała, praciahvaje trymać udar — infarmacyjny i sankcyjny, u tym liku i dziakujučy tym ludziam, jakija sabralisia na Forum patryjatyčnych sił.
U adnym, mabyć, sychodziacca patryjoty — šlachoŭ moža być mnostva, ale jany nie pavinny zavieści krainu ŭ tupik ci ŭ biezdań. A ryzyka, i my heta pamiatajem, 2 hady nazad była, kali žmieńka psieŭdapatryjotaŭ pasprabavała ŭskałychnuć biełarusaŭ. Nie vyjšła!» — rapartavaŭ jon.
Kamientary
A jak prafiesijnamu prapahandystu jamu varta viedać, što zaraz jak raz u Haazie pačali sudzić redaktara "Radyjo tysiačy pahorkaŭ", jakoje prapahandavała hienacyd pradstaŭnikoŭ adnaho ź plamionaŭ Ruandy zusim niadaŭna. To bok - prapahandysty adkazvajuć i za toje, što transiujuć złačynnyja naratyvy, naroŭni z tymi, chto čynić sami złačynstvy.
https://d3kcf2pe5t7rrb.cloudfront.net/301370