U 35 hadoŭ staŭ hienierałam, stvaryŭ adnu z najlepšych raźviedak śvietu. Što viadoma pra kiraŭnika HUR Ukrainy Budanava?

Novaje pakaleńnie

Ukrainski raźviedčyk naradziŭsia 4 studzienia 1986 hoda ŭ Kijevie. U 21-hadovym uzroście Budanaŭ skončyŭ Adeski instytut suchaputnych vojskaŭ. Paśla čaho pačaŭ vajennuju karjeru sa słužby ŭ śpiecnazie Hałoŭnaha ŭpraŭleńnia raźviedki Ministerstva abarony Ukrainy (HUR), dzie zajmaŭ roznyja pasady.

Kali SSSR razvaliŭsia, Budanavu było ŭsiaho 5 hadoŭ. Jon źjaŭlajecca pradstaŭnikom novaha pakaleńnia ŭkrainskich vajskoŭcaŭ, jakija abapirajucca na zachodni, a nie saviecki dośvied. Kali Zialenski pryznačyŭ Budanava, ukrainskaha prezidenta krytykavali za toje, što na takuju surjoznuju pasadu jon pryznačyŭ na toj momant 34-hadovaha čałavieka. Ustupiŭšy na pasadu, jon zaniaŭsia naładžvańniem suviaziaŭ sa śpiecsłužbami Złučanych Štataŭ i Turcyi i zasiarodziŭsia na tym, kab zrabić raźviedvalnuju słužbu Ukrainy mienš ijerarchičnaj, bolš hnutkaj i haryzantalnaj.

Pasada Budanava klučavaja. Biez atrymańnia infarmacyi ad zachodnich sajuźnikaŭ (za heta adkazvaŭ Budanaŭ) Ukrainie było b našmat składaniej supraćstajać vorahu. 

Prajšoŭ Danbas i atrymaŭ ciažkaje ranieńnie

Kirył Budanaŭ udzielničaŭ u bajavych dziejańniach na Danbasie ŭ 2014 hodzie, kali Rasija napała na Ukrainu. Na froncie jon atrymaŭ niekalki ranieńniaŭ, adno ź jakich ciažkaje.

Viadoma, što jon pravioŭ śpiecapieracyju ŭ Armiansku ŭ akupavanym Krymie ŭ 2016 hodzie.

Ukrainskija ŚMI paviedamlali, što Kirył Budanaŭ moh słužyć pad kamandavańniem kamandzira 10-ha asobnaha atrada śpiecyjalnaha pryznačeńnia, načalnika śpiecyjalnaha reziervu Hałoŭnaha upraŭleńnia raźviedki Ministerstva abarony Ukrainy Ukrainy Maksima Šapavała, jaki letam 2017 hoda trahična zahinuŭ u vyniku padryvu mašyny, spłanavanaha rasijskimi śpiecsłužbami.

Pieražyŭ zamach

Budanaŭ i sam staŭ cellu rasijskich dyviersantaŭ jašče ŭ 2019 hodzie. U noč na 4 krasavika 2019 hoda ŭ Kijevie ŭzarvali aŭtamabil Chevrolet Evanda. 

Pavialičyć

Aŭtamabil raźviedčyka sprabavaŭ padarvać rasijanin z dakumientami na imia Alaksieja Łamaka. Jon ustalavaŭ minu pad mašynaj, adnak padčas hetaha jana zdetanavała. U vyniku niaŭdałaha zamachu SBU ŭdałosia zatrymać cełuju hrupu dyviersantaŭ, jakija arhanizoŭvali zamach na Budanava.

U 2020-m Budanava pryznačyli namieśnikam dyrektara Departamienta Słužby zamiežnaj raźviedki.

U tym ža hodzie prezident Ukrainy Uładzimir Zialenski pryznačyŭ Kiryła Budanava načalnikam HUR. 

Užo ŭ žniŭni 2021 hoda Budanaŭ atrymaŭ voinskaje zvańnie bryhadnaha hienierała, a ŭ krasaviku 2022 hoda — hienierał-majora. 

Karystajecca davieram Zialenskaha

Kirył Budanaŭ — prafiesijny vajskoviec, jaki ŭdzielničaŭ u bajavych dziejańniach i paśpieŭ papracavać u śpiecsłužbach,— pryncypovym čynam adroźnivajecca ad inšych pradstaŭnikoŭ akružeńnia Uładzimira Zialenskaha, mnohija ź jakich pryjšli na dziaržaŭnyja pasady (u tym liku ŭ siłavych strukturach) z šou-biznesu abo hramadzianskaj słužby.

Jašče ŭ 2021 hodzie vielmi dakładna sprahnazavaŭ nastup Rasii 

Kirył Budanaŭ jašče ŭ listapadzie 2021 hoda zajaviŭ, što Rasija rychtuje ŭvarvańnie va Ukrainu. Budanaŭ havaryŭ, što jano moža adbycca ŭ kancy studzienia — pačatku lutaha (pamyliŭsia na niekalki tydniaŭ). Padobny acenak prytrymlivalisia i amierykancy. Nahadajem, u toj momant Maskva nieadnarazova chłusiła, što płanaŭ ŭvarvańnia va Ukrainu ŭ jaje niama.

Pavialičyć

Budanaŭ prahnazavaŭ, što napad Rasii pačniecca z artyleryjskich i avijacyjnych udaraŭ, a taksama vysadki marskoha desantu ŭ rajonie Adesy i Maryupala. Taksama, jak kazaŭ Budanaŭ, nastup budzie vieścisia z terytoryi Biełarusi.

Hienierał mierkavaŭ, što pierad vajnoj budzie pravodzicca apieracyja pa destabilizacyi Ukrainy z metaj prymusić jaje nasielnictva nie akazvać supraciŭ.

«Jany chočuć arhanizoŭvać mitynhi i akcyi pratestu, kab pakazać, što ludzi vystupajuć suprać ułady», — kazaŭ Budanaŭ. 

«Jany chočuć, kab situacyja va Ukrainie ŭvieś čas horšała, i damahčysia, kab sami ŭkraincy źmianili ŭładu. Kali im heta nie ŭdasca, u spravu ŭstupić armija», — zajaŭlaŭ Budanaŭ.

Padobnaja acenka situacyi ad kiraŭnika ŭkrainskaj raźviedki akazałasia davoli dakładnaj, chacia rasijanie i nie realizavali ŭsio zadumanaje. 

Nie padbiraje słovaŭ adnosna Rasii

U adroźnieńnie ad palityčnaha kiraŭnictva krainy, jakoje jašče časam padbiraje słovy, Budanaŭ pra Rasiju vykazvajecca rezka. Jon adkryta kaža, što meta Rasii — źniščeńnie Ukrainy, nazyvaje hetuju krainu «monstram ź jadziernym dručkom» i nie vieryć u toje, što rasijanie mohuć i chočuć niešta źmianić. 

Pavialičyć

Pratesnych nastrojaŭ u Rasii, kaža Budanaŭ, čakać nie varta. Ni sankcyi, ni straty ad vajny ich nie cikaviać. Nad ludźmi pravodziłasia doŭhaja prapahandysckaja praca. Jany pra ŭsio viedajuć i padtrymlivajuć dziejańni Pucina, miarkuje ŭkrainski hienierał.

«Adkryjcie ich pablik, kamientary pačytajcie, što jany tam pišuć. Heta ž nie piša Pucin ci Patrušaŭ, nie», — kaža Budanaŭ. 

Roznyja ŭkrainskija palityki pa-roznamu hladziać na toje, što možna ličyć pieramohaj u vajnie. Dla kahości pieramoha — rasijskija vojski, adkinutyja na miežy 24 lutaha. Dla inšych — deakupacyja ŭsiaho Danbasu, a dla niekatorych — uklučna z Krymam.

Budanaŭ zajaŭlaje, što vajna budzie praciahvacca da poŭnaha vyzvaleńnia ŭkrainskich terytoryj, u mižnarodna pryznanych miežach 1991 hoda. 

«Ja nie viedaju nijakich miež, akramia miež 1991 hoda», — skazaŭ hienierał, majučy na ŭvazie hod, kali Ukraina zdabyła niezaležnaść.

«Chto moža prymusić Ukrainu zamarozić kanflikt? Heta vajna ŭsich ukraincaŭ, i kali niechta ŭ śviecie dumaje, što moža dyktavać Ukrainie ŭmovy, u jakich jana moža ci nie moža abaraniacca, — surjozna pamylajecca», — dadaŭ Kirył Budanaŭ.

Adkazvajučy na pytańnie žurnalista brytanskaj haziety Financial Times ab formach baraćby suprać Rasii, kiraŭnik ukrainskaj vajskovaj havaryŭ pra partyzanskuju vajnu na akupavanych terytoryjach, u pryvatnaści zhadaŭšy padryŭ aŭtamabilaŭ pradstaŭnikoŭ administracyi ŭ Chiersonskaj vobłaści. Pa jaho słovach, napady «pravodzilisia, pravodziacca i buduć pravodzicca ŭ Rasii i ŭ mnohich inšych miescach».

Adnym z klučavych kampanientaŭ pracy Budanava była arhanizacyja partyzanskich atradaŭ, jakija zastalisia ŭ tyle rasijan i palujuć na miascovych zdradnikaŭ-kałabarantaŭ. 

Ulapaŭsia ŭ niepryjemny skandał

Ukrainskija žurnalisty ŭ 2021 hodzie vyśvietlili, što Budanaŭ žyŭ u adnym budynku sa skandalna viadomym namieśnikam kiraŭnika MUS Ukrainy Alaksandram Hahiłašvili. 

Skandał byŭ u tym, što ŭ Hahiłašvili byŭ dziejučy rasijski pašpart i padatkovy numar i raniej jon navat pracavaŭ pamočnikam deputata rasijskaj Dumy Mikałaja Vałujeva. 

Žurnalisty vyśvietlili, što Budanavy i Hahiłašvili siabrujuć siemjami. Sam Hahiłašvili navat vykładvaŭ sumiesnyja foty z Budanavym, zroblenyja ŭ žniŭni 2021 hoda. 

Pavialičyć

Budanaŭ pryznaŭ, što žyŭ u pamiaškańni Hahiłašvili, bo ŭ jahonaj kvatery byŭ ramont. Ale sumiesny pobyt hałoŭnaha vajennaha raźviedčyka Ukrainy i hramadzianina Rasii vyklikaŭ tady šmat pytańniaŭ. 

Hahiłašvili svaju pasadu straciŭ, na karjery Budanava skandał nie adbiŭsia.

Dziorzkaść i pracazdolnaść

Unikalnaje spałučeńnie dziorzkaści i pracazdolnaści zrabili Budanava idealnym kiraŭnikom raźviedki vajennaha času. I hetaja raźviedka — pra rolu sajuźnikaŭ u hetym možna spračacca — raz za razam pieramahaje rasijskuju.

• 209
• 17
• 17
• 20
• 12
• 37