Ajcišnik staŭ «pahrozaj biaśpiecy» ŭ Litvie z-za pracy na BiełAES pa raźmierkavańni
Vydańnie Devby.io piša pra jašče adnu historyju anulavańnia DNŽ u Litvie dla biełarusaŭ, jakaja ŭskładniajecca tym, što ŭ dziaciej skončylisia biełaruskija pašparty, a prajaznyja dakumienty im nie vydali.
Ciapier IT-śpiecyjalist ź Biełarusi Leanid, jaki pražyŭ ź siamjoj bolš za dva hady ŭ Vilni, šukaje rašeńnie, jak i dzie žyć dalej. Na minułym tydni Litva pryznała jaho «pahrozaj nacyjanalnaj biaśpiecy», u vyniku čaho anulavali jahony dazvoł na žycharstva (DNŽ). Zvyčajnaja na siońnia situacyja ŭskładniajecca tym, što viarnucca ŭ Biełaruś siamja nie moža, i prablema nie tolki ŭ hetym.
U čym zaklučajecca «pahroza»
Jak raskazaŭ vydańniu sam Leanid, jon pa adukacyi fizik, vypusknik BDU, i ŭ 2015 hodzie pa raźmierkavańni trapiŭ na BiełAES, dzie faktyčna adpracavaŭ dva hady. U 2017 hodzie ŭ jaho naradziłasia dačka, i jon na try hady pajšoŭ u dekretny adpačynak. Paśla dekretu, viasnoj 2020 hoda, jon zvolniŭsia z AES i pierajšoŭ u IT. U studzieni 2022 hoda Leanid pryniaŭ prapanovu ad litoŭskaj kampanii i pierajechaŭ ź siamjoj u Vilniu.
Usio išło dobra: siniaja kartka, kvatera pobač sa škołaj i siekcyjami dla dziaciej (ich užo dvoje), žonka taksama znajšła pracu ŭ IT. Jak i inšyja mihranty ź Biełarusi, Leanid u 2022 hodzie zapoŭniŭ ankietu pra minułyja raboty i dobrasumlenna paznačyŭ pracu na AES. U 2023 hodzie historyi anulavańnia DNŽ tych biełarusaŭ, jakija słužyli ŭ vojsku pa kantrakcie abo pracavali na stratehičnych abjektach Biełarusi ci Rasii, vyklikali zaniepakojenaść, ale da Leanida tady nie było pretenzij. Prablema ŭźnikła niečakana.
Zdavałasia, što pahroza minuła
U lutym 2024 hoda ŭ dziaciej skončyŭsia termin DNŽ, a ŭ mai 2024-ha — biełaruskich pašpartoŭ. Baćki źviarnulisia ŭ Departamient mihracyi (Mihrys) i pradstavili dokazy taho, što jany nie mohuć pajechać u Biełaruś dla abmienu dakumientaŭ. U vyniku dzieciam vydali novyja kartki, jakija dziejničali da 2025 hoda, kali zakančvałasia i siniaja kartka Leanida.
«U 2023 hodzie my mocna pieražyvali, ale kali nam praciahnuli dziciačyja DNŽ, my supakoilisia», — kaža Leanid.
Ale nie
Praź niekalki miesiacaŭ paśla hetaha darosłyja padali zajaŭku na prajaznyja dakumienty dla dziaciej, ale zamiest ich praz 3,5 miesiaca Leanid atrymaŭ paviedamleńnie ab anulavańni svajho DNŽ z-za pracy na BiełAES, što robić jaho «pahrozaj nacyjanalnaj biaśpiecy Litvy». U dadatak jon atrymaŭ zabaronu na ŭjezd u krainu.
Z-za taho, što žonka i dzieci afarmlalisia razam ź Leanidam «pryčepam», ich DNŽ taksama anulavali.
Siamja pavinna pakinuć Litvu ŭ najbližejšy čas. U Biełaruś viarnucca jany nie mohuć, a pierajechać u inšyja krainy pakul mohuć tolki darosłyja (ich pašparty jašče dziejničajuć), ale bieź dziaciej.
Mahčymyja rašeńni
«Zrazumieła, što bieź dziaciej my nikudy nie pajedziem, — kaža Leanid. — Zaraz my kansultujemsia ź jurystami i NKA, kab vyznačyć dalejšyja kroki. Mahčyma, budziem padavać u sud, ale čakać rašeńnia suda ŭ Litvie mnie, vierahodna, nie dazvolać. Idealny varyjant — padacca na novy DNŽ dla siamji, a sam Leanid moh by pracavać z treciaj krainy i sprabavać viarnucca paśla vyjhryšu ŭ sudzie».
Ciapier siamja atrymlivaje supiarečlivuju infarmacyju ad jurystaŭ: ad «paśpiachovych apielacyj nie było» da «takija spravy možna vyrašyć».
Mahčyma, Leanidu daviadziecca padavacca na mižnarodnuju abaronu.
Ličby, ad jakich strašna. Bolš za 280 tysiač biełarusaŭ atrymali dazvoły na žyćcio ŭ ES u 2023. Bolš tolki va ŭkraincaŭ
Padličyli, kolki biełarusaŭ žyvie ŭ Polščy i Litvie
Litva idzie na sastupki: dazvolić zajazdžać na biełaruskich numarach, kali haspadar za rulom i maje DNŽ abo vizu Litvy
Rašeńnie ab anulavańni DNŽ u Litvie bolš nie prypyniajecca pry abskardžańni ŭ sudzie. Čałaviek musić vyjechać z krainy
Bort Łukašenki z-za techničnych prablem viarnuŭsia ŭ Minsk bieź jaho16
Kamientary