«Zdradnik», «choča padmanuć KDB», «sprabuje viarnucca ŭ abojmu». Top-čynoŭniki pra rašeńnie Capkały kinuć vyklik Łukašenku
Rašeńnie pieršaha dyrektara PVT Valeryja Capkały bałatavacca ŭ prezidenty ŭžo narabiła šumu jak u hramadstvie, tak i ŭ kabinietach namienkłatury.
«Naša Niva» raspytała bujnych dziaržaŭnych dziejačaŭ i čynoŭnikaŭ siaredniaj ruki ab tym, što jany dumajuć pra taki krok Capkały.
Voś kampilacyja mierkavańniaŭ ludziej, jakija pracujuć u finansavaj, infarmacyjnaj, siłavoj i inšych śfierach dziaržaŭnaha kiravańnia. Jany padzialilisia svajoj pazicyjaj na ŭmovach ananimnaści — takija realii łukašenkaŭskaj sistemy.
«Zdradnik»
«Jon stolki hod karmiŭsia z ruk Łukašenki! A ciapier raptam «prazieryŭ» i ŭbačyŭ chiby? Heta nazyvajecca zdrada.
Voś u mianie niama maralnaha prava krytyvać Łukašenku i vybudavanuju sistemu. Jurydyčnaje prava jość, a maralnaha niama, bo ŭ mianie mohuć spytać: «Kali ty tak ličyš, to čamu ty ŭsie hetyja hody pobač maŭčaŭ, čym ty zajmaŭsia?»
U vypadku Capkały jość dva varyjanty — abo być z prezidentam da kanca, abo siadzieć na leciščy i nie vystupać. Da PVT spryčynilisia taksama Dobkin, Machaniok, Miaśnikovič, usio rabiłasia sa zhody i pry padtrymcy Łukašenki — jak jon tady moža kazać, što stvaryŭ jaho adzin?
Mnie bačycca heta tak — niejkija siły, jakim mulaje PVT, znajšli pakryŭdžanaha. I sprabujuć praź jaho supraćpastavić ajcišnikaŭ i Łukašenku, kab Łukašenka prymianiŭ represii i Park asłabieŭ».
«Choča padmanuć KDB»
«Mnie pakul ničoha nie jasna, treba čakać, pakul Capkała vystupić aficyjna. Ja dumaju, heta budzie paśla rehistracyi jaho kandydatam. Tut taki momant: samaje hałoŭnaje — heta chto budzie ŭ kamandzie; adzin čałaviek, chaj heta budzie navat nie Capkała, a Iłan Mask, ničoha nie zmoža. Patrebna kamanda ŭ 50 čałaviek.
I ja budu hladzieć na 20 najbolš nabližanych i razumieć, što heta budučy ŭrad. Aceńvać, chto pretenduje adkazvać za ekanomiku, za finansy, za pramysłovaść, i tady zrablu vysnovy.
Pakul ničoha hetaha nie vidać. I nie tolki žurnalistam i prostym ludziam cikava, chto ŭ kamandzie.
Heta cikava śpiecsłužbam, čyja zadača — zrabić usio, kab hetaja kamanda ŭ pryncypie nie sabrałasia, vyličyć jaje.
Tamu kali jon nie spojler, to łahična, što jon ciapier admoŭčvajecca i nie nazyvaje nijakich asob».
«Palityčny adździeł takoha b nie prydumaŭ»
«Pakul što ja naziraju «naviersie», chutčej, niehatyŭ da kroku Capkały. Kali razhladać jaho jak spojlera… Niaŭžo naš palityčny adździeł, jaki raniej byŭ zdatny tolki na kazackaha atamana i Karatkievič, zdolny prydumać Capkału i ryzyknuć?»
«Antyapazicyjanier Hajdukievič daremny suprać Capkały»
«Nastroi siarod kaleh paśla vyłučeńnia Capkały — zamiašalnictva. Pra jaho ŭžo ŭsie zabylisia! Krok sapraŭdy niespadziavany, pakul ničoha nie zrazumieła, dadumvajucca teoryi zmovy — rasijski, amierykanski, jeŭrapiejski kapitał i hetak dalej.
Ja čuŭ dumki, što suprać Capkały ciapier patrebny sapraŭdy spojler, bo zatočany suprać kłasičnaj apazicyi Hajdukievič Capkału prosta «nie vyviezie» ni intelektualna, ni charyzmatyčna.
Ale kali jon paŭtoryć los Kazulina, to heta naniasie krainie vialikuju škodu».
«Prosicca nazad»
«Razumny chłopiec, jakoha vykinuli i jaki nikomu nie patrebny. Mahčyma, heta navat nie sproba realizavać palityčnyja ambicyi, a sproba prosta nahadać pra siabie, kab viarnucca ŭ abojmu».
«Adčajny krok»
«Heta moža vyhladać realnaj sprobaj kinuć vyklik pa papiaredniaj damoŭlenaści ź niejkimi siłami, bo prosta tak takoje nie robicca.
Capkała — čałaviek vialikich ambicyj, moža być, navat z manijaj vieličy. Ajcišnik jaho kalibru hladzić na ludziej jak bujny chirurh-ankołah ci łaŭreat Nobiela pa fizicy: «Nu voś vy, kłapy, niešta tut mitusiciesia, a ja viedaju takoje, što vam niedasiažna».
Jon moh doŭha śpieć da takoha rašeńnia, razumiejučy pracesy ŭ Biełarusi, aceńvajučy mieniedžmient i bačačy, kudy ŭsio idzie. I voś daśpieŭ.
Cikava, darečy, što ŭ svoj čas Łukašenka im strašna hanaryŭsia, bo ŭ jahonaj kamandzie byli ludzi nakštałt Fiaduty i Kanaplova, a tut Capkała: «U mianie jość čałaviek, jaki ŭmieje havaryć pa-anhlijsku!».
Treba pačakać, jak buduć raźvivacca padziei, kali heta ŭsio ŭsurjoz, to Capkała, peŭna, pamiataje, što ŭ viedamstvie Valeryja Pałyča (Vakulčyka, staršyni KDB — «NN») na jaho vialikaja tečka z apisańniem pracesaŭ u rańnim PVT i ich vynikaŭ, a dla Łukašenki nie stała prablemaj pabić sukavataj pałkaj navat Čyža.
Ale Capkała, peŭna, dumaje, što kali sapraŭdy zapachnie smažanym, to ŭciače ŭ Štaty».
Kamientary