Vyniesieny prysud pa zabojstvie žonki błohiera Čudziancova

26 studzienia ŭ Minskim haradskim sudzie abvieščany prysud pa spravie žycharki stalicy Vijalety Kamaj, pryznanaj vinavataj u zabojstvie z asablivaj žorstkaściu svajoj najlepšaj siabroŭki Viktoryi Čudziancovaj — žonki błohiera i biełaruskaha žurnalista Uładzimira Čudziancova.

Pavialičyć

Žančyna asudžanaja da 13 hadoŭ pazbaŭleńnia voli. Razam ź joj asudžanyja dva jaje pryjacieli, jakija dapamahali chavać ślady złačynstva.

Zabojstva było ŭčyniena ŭ noč z 6 na 7 červienia minułaha hoda.

Jak raskazaŭ BiełaPAN Uładzimir Čudziancoŭ, u šlubie ź Viktoryjaj jany byli z 2005 hoda i niekalki hadoŭ «pražyli duša ŭ dušu». Potym žančyna raptam pačała vypivać i za paru hadoŭ pieratvaryłasia ŭ «surjoznaha ałkaholika». Dvojčy jaje kadziravali, adpraŭlali ŭ ŁPP, kali nie było inšaha vyjścia. Heta nie dapamahło. Praź niekalki hadoŭ Čudziancoŭ źjechaŭ ad žonki, ale jany nie razvodzilisia, časam sustrakalisia, padtrymlivali adnosiny. Za niekalki hadoŭ žančyna «prapiła», jak vykazaŭsia Čudziancoŭ, dźvie kvatery, što naležali joj. Apošniuju — u śniežni 2014 hoda. Paśla prodažu Viktoryja pazyčyła svajoj najlepšaj siabroŭcy Vijalecie 15 tysiač dalaraŭ, jakija toj byli nibyta nieabchodnyja dla kampiensacyi dziaržavie raschodaŭ na ŭtrymańnie dziciaci pavodle dekreta №18. 

Apošni raz Čudziancoŭ vychodziŭ na suviaź z žonkaj pa telefonie ŭ krasaviku 2016 hoda, kali ŭ jaje skončyŭsia druhi termin u ŁPP. A 7 červienia da jaho pryjšli supracoŭniki milicyi, ad jakich jon daviedaŭsia ab zabojstvie Viktoryi. Čudziancoŭ trapiŭ pad padazreńnie, adnak, pakul jaho praviarali na palihrafie, apieratyŭniki raskryli złačynstva i zatrymali najlepšuju siabroŭku zahinułaj.

Vyśvietliłasia, što žančyny niekalki dzion pili ŭ haściach u pryjaciela, u domie na vulicy Adojeŭskaha, niedaloka ad doma, dzie žyvie Čudziancoŭ. Padčas svarki Kamaj naniesła Čudziancovaj 14 udaraŭ nažom.

Varta adznačyć, što na śledstvie haspadar kvatery raspaviadaŭ, što złamaŭ nos Čudziancovaj, adnak heta nijak nie było kvalifikavana. Hety čałaviek u vyniku pakarany abmiežavańniem voli. Praŭda, u sudzie naniasieńnie cialesnych paškodžańniaŭ, jakija mielisia ŭ zahinułaj, jon užo admaŭlaŭ. Padčas zabojstva mužčyna byŭ u prybiralni.

Paśla zabojstva Kamaj paklikała na dapamohu jašče adnaho pryjaciela, i dvoje mužčyn vynieśli zahornuty ŭ pled trup i pakinuli jaho ŭ kustach pad bałkonam adnaho z susiednich damoŭ. Pry hetym Čudziancoŭ miarkuje, što pieršapačatkova cieła płanavali padkinuć jamu pad bałkon, ale pakolki kampanija była pjanaja, damy jany pierabłytali ci nie dajšli litaralna 15 mietraŭ.

• 0
• 0
• 0
• 0
• 0
• 0