Što takoje Pokemon GO? Papularnaja hulnia ŭ pytańniach i adkazach

Pokemon GO

Krychu bolš za tydzień tamu japonski hulniavy hihant Nintendo vypuściŭ hulniu Pokemon GO. Jana stała adrazu ž šalona papularnaj va ŭsim śviecie, niahledziačy na toje, što aficyjny reliz adbyŭsia tolki ŭ ZŠA, Aŭstralii, Novaj Ziełandyi i Hiermanii.

«Naša Niva» vyrašyła vyśvietlić, u čym sakret papularnaści hetaj hulni i sabrała ŭsie samyja asnoŭnyja źviestki pra Pokemon GO.

Pakiemon — heta multsieryjał ci hulnia?

Pokemon — heta ceły vydumany hulniavy suśviet i vialikaja miedyjafranšyza japonskaj kampanii Nintendo. Pieršapačatkova pakiemony źjavilisia ŭ 1996 hodzie na prystaŭkach. Hulcy mahli vykarystoŭvać admysłovy kabiel dla suviazi kansolaŭ pamiž saboju dla abmienu pakiemonami. Na chvali papularnaści pačała źjaŭlacca i inšaja pradukcyja pad brendam «Pokemon»: multfilmy, anime-sieryjały, manha, knihi i inšyja miedyjatavary, jakija vychodziać i da našaha času. Na prastorach byłoha SSSR pik papularnaści pryjšoŭsia na pačatak XXI stahodździa, z vychadam multsieryjała.

U čym admietnaść mienavita hetaj viersii hulni?

Raniej Nintendo śpiecyjalizavałasia na vytvorčaści hulniaŭ dla ŭłasnych prystavak. Pokemon GO stała pieršaj hulnioj Nintendo dla sučasnych smartfonaŭ. Dadatak vykarystoŭvaje elemienty dapoŭnienaj realnaści: hulcy šukajuć pakiemonaŭ, schavanych u realnym śviecie. Telefony z dapamohaj hukavoha sihnału i vibracyi paviedamlajuć uładalnikam ab tym, što pobač schavany pakiemon. Meta hulni — znachodzić i treniravać pakiemonaŭ, kab potym udzielničać u bitvach z pakiemonami inšych hulcoŭ.

Pavialičyć

Dzie spampavać?

Hulać u Pokemon GO možna tolki na smartfonach na bazie Android (viersija 4.4 i vyšej) i iOS. Aficyjny reliz hulni adbyŭsia pakul tolki ŭ ZŠA, Aŭstralii, Novaj Ziełandyi i Hiermanii, ale nieaficyjna hulać u Pokemon GO možna i ŭ Biełarusi. Dla Android možna znajści vialikuju kolkaść ustanovačnych.apk fajłaŭ u internecie. Z iOS situacyja bolš składanaja. Kab hulać na Apple, treba stvarać novy «Apple ID» z rehijonam «New Zealand».

Vynik

Hulnia stała nastolki papularnaj, što moža całkam źmianić usprymańnie sučasnych kampjutarnych hulniaŭ. Palepšyła Pokemon GO i stanovišča Nintendo. U apošnija hady prystaŭki Nintendo hublali svaju pryvabnaść na fonie papularnaści XBOX i hulniaŭ na smartfonach. Paśla vychadu Pokemon Go akcyi Nintendo padaraželi bolš čym na 50%. Praz sutki paśla reliza hulnia zaniała pieršaje miesca ŭ amierykanskim App Store i Google Play u katehoryjach «biaspłatnyja hulni» i «top kasavych». Za dzień karystalniki pravodziać za hulnioj u Pokemon GO bolš času, čym u WhatsApp, Instagram, Snapchat i Facebook Messenger.

Isteryja sparadziła vialikuju kolkaść kurjoznych vypadkaŭ. Naprykład, supracoŭnica 10 kanała ŭ Sent-Piterśbierhu, štat Fłaryda, tak zachapiłasia pošukam pakiemonaŭ, što nie zaŭvažyła, jak prajšła pierad kamierami padčas prahnozu nadvorja.

Časam «pokiestopami» stanoviacca słavutaści (parki, muziei, pomniki), ale časta karystalniki vyjaŭlajuć pakiemonaŭ u samych niečakanych miescach: monstry mohuć chavacca ŭ carkvie, u stryp-kłubie, u palicejskim učastku.

Siarod inšaha, pakiemony pačali źjaŭlacca na terytoryi miemaryjałaŭ: pomnika achviaram teraktaŭ 11 vieraśnia ŭ Ńju-Jorku, muzieja Chałakostu ŭ Vašynhtonie, Arlinhtonskich nacyjanalnych mohiłak u Virhinii, byłoha kancentracyjnaha łahiera ŭ Aŭšvicy. Administracyi hetych i inšych miemaryjalnych kompleksaŭ užo źviarnulisia da stvaralnikaŭ hulni z prośbaj vydalić ich z Pokemon GO, a naviedvalnikaŭ prosiać ustrymacca ad łoŭli pakiemonaŭ na terytoryi miemaryjałaŭ.

U pierśpiektyvie papularnaściu hulni zmohuć skarystacca ŭładalniki kram, kaviarniaŭ i inšyja pradprymalniki. Hulnia nakiroŭvaje ludziej u miescy častaha źjaŭleńnia pakiemonaŭ. Kab pieratvaryć hetych ludziej u svaich pakupnikoŭ, treba pryvabić ich da siabie. Naprykład, raźmiaścić «pastku», jakaja na niekatory čas paskaraje źjaŭleńnie pakiemonaŭ.

U čym niebiaśpieka?

Niekatoryja hulcy ŭ Pokemon GO tak zasiarodžvajucca na hulniavym pracesie, što pierastajuć usprymać i zaŭvažać navakolle. Užo viadoma pra niekalki niaščasnych vypadkaŭ, kali ludzi nie hladzieli sabie pad nohi padčas hulni, padali i traŭmiravalisia.

Papularnaściu hulni pačali karystacca i złamyśniki. U štacie Misury (ZŠA) uzbrojenyja ludzi ładzili zasady kala pakiemonaŭ, schavanych u zakinutych miescach, i rabavali hulcoŭ, jakija ich šukali.

Budźcie aściarožnyja!

• 0
• 0
• 0
• 0
• 0
• 0