Дачка Гайдукевіча расказала сваю версію «падпалу» дома дэпутата
І згадала, як у 2020-м аднакласнікі трымаліся ўбаку ад яе.
![Лізавета Гайдукевіч Elizaveta Gaidukevich Елизавета Гайдукевич](http://d3kcf2pe5t7rrb.cloudfront.net/img/w840d4webp1/photos/z_2024_06/2-soixf.jpg.webp)
У новым выпуску ток-шоу «ДаНо» на СТБ прыняў удзел дэпутат Алег Гайдукевіч са сваёй дачкою Лізаветай. У пэўны момант згадалі пра «замах» на палітыка ў 2021-м.
Гайдукевіч заўважыў: «Мая дачка ведала — «мой бацька займаецца палітыкай», яна слухала. Але я думаю, у яе адбылося нейкае пераасэнсаванне ў той дзень, калі наш дом паспрабавалі падпаліць».
Сама Лізавета расказала пра падзею, якая адбылася ўлетку 2021 года, наступнае:
«У той дзень я начавала ў іншым доме. І ранкам я вярнулася дахаты. Зайшла ў дом, пабачыла — нейкі гар ёсць. Падумала: «Нармальна». Зайшла дахаты. Спакойна там пасядзела. Потым нешта мне ў галаву тыркнула — «неяк ненармальна».
Я пайшла аглядаць і бачу гэтыя бутэлькі. Я падумала, што, магчыма, нехта проста пажартаваў і вырашыў закінуць гэтыя бутэлькі».
Нагадаем, што той «падпал» КДБ выкарыстаў для аператыўнай гульні. Сям’ю Вайцяховічаў, якіх абвінавацілі ў гэтым, асудзілі на тэрміны ад 11 да 21 года пазбаўлення волі.
Дзяўчына таксама згадала пра падзеі 2020-га: «Я памятаю, мне бацькі па нядзелях не дазвалялі выходзіць у горад і сустракацца з сябрамі, бо мала што можа стацца».
Па словах дзяўчыны, тое, што яна дачка Гайдукевіча, «адыгрывала пэўную ролю» ў адносінах з аднакласнікамі.
«Многія падтрымлівалі апазіцыю. А так як мой бацька падтрымліваў прэзідэнта, то ад мяне шмат хто трымаўся ўбаку і стараўся не размаўляць. Пры мне палітычныя тэмы ў школе ўвогуле не падымалі».
Каментары