ЕС хоча распаўсюдзіць на Telegram абмежаванні, уведзеныя супраць інтэрнэт-гігантаў Apple, Google і Facebook
Кіраўнікі месенджара запэўніваюць, што ў краінах ЕС месенджарам карыстаюцца «толькі» 41 млн чалавек.
Папулярны месенджар Telegram можа трапіць пад дзеянне нядаўна прынятага закона ЕС, які ўводзіць абмежаванні на публікацыю кантэнту буйнымі інтэрнэт-платформамі, а таксама абавязвае іх самастойна праводзіць мадэрацыю апублікаваных матэрыялаў, піша Бі-бі-сі.
Закон DSA, які ўступіў у сілу з новага 2024 года, закліканы звесці да мінімуму распаўсюджванне ў сетцы незаконных і шкоднасных матэрыялаў, уключаючы тэорыі змоў і масавыя дэзінфармацыйныя кампаніі, за кошт раскручвання папулярнасці фэйкавых навін, чым — па словах еўрапейскіх заканадаўцаў — асабліва актыўна займаюцца расійскія і кітайскія «фабрыкі троляў».
Мінулай восенню Еўракамісія пайменна назвала інтэрнэт-гігантаў, якім за невыкананне ўстаноўленых абмежаванняў пагражаюць гіганцкія штрафы (да 6% гадавой выручкі) — і нават поўнае адлучэнне ад адзінага еўрапейскага рынку.
Telegram у апублікаваны тады спіс не ўвайшоў — на той падставе, што фармальна правілы DSA распаўсюджваюцца толькі на «вельмі буйныя онлайн-платформы», якія налічваюць у Еўропе не менш за 45 млн карыстальнікаў.
Адміністрацыя Telegram запэўнівае, што ў краінах ЕС месенджарам карыстаюцца «толькі» 41 млн чалавек.
Зрэшты, заявам гэтым еўрапейскія заканадаўцы не вельмі вераць — асабліва ўлічваючы той факт, што ў Telegram поўна інфармацыйных і забаўляльных каналаў, за якімі можна проста сачыць, ня абменьваючыся пры гэтым тэкставымі паведамленнямі — і, магчыма, не ўваходзячы ў прадстаўленую статыстыку.
Прадстаўнік Еўрапейскай камісіі заявіў, што вывучае методыку падліку карыстальнікаў Telegram і працягвае сачыць за сітуацыяй на інфармацыйным рынку
Як паказваюць вынікі шматлікіх пракурорскіх праверак, менавіта Telegram пракрамлёўскія акаўнты выкарыстоўваюць часцей за ўсё для вядзення інфармацыйных войнаў па самых розных падставах — няхай гэта будзе вайна ва Украіне, міграцыйны крызіс і змены глабальнага клімату.
Акрамя таго, апошнім часам супрацоўнікі расейскай выведкі сталі выкарыстоўваць гэты месенджар яшчэ і для вярбоўкі агентаў за мяжой.
«Мы прытрымліваемся таго пункту гледжання, што Telegram — досыць вялікая платформа, каб прад'яўляць да яе тыя ж патрабаванні, як да Facebook, X і YouTube, — заявіла ў пачатку месяца прэм'ер-міністр Эстоніі Кая Калас. — Ён безумоўна трапляе пад вызначэнне вельмі буйной інтэрнэт-пляцоўкі».
Прэм'ер папрасіла Еўракамісію не занадта давяраць лічбам, прадастаўленым кіраўніцтвам Telegram, і правесці незалежную ацэнку памеру яго аўдыторыі.
Прадстаўнік Telegram запэўніў, што для распаўсюджвання дэзынфармацыі месенджар як раз страшна неэфектыўны, паколькі яго праца не абапіраецца на алгарытмы.
Ён таксама паабяцаў, што неўзабаве ў супрацоўнікаў праваахоўных органаў з'явіцца асобны інструмент для верыфікацыі Telegram-пастоў: па яго словах, праца па яго стварэнні ў кампаніі амаль завершана.
Судзяць гендырэктара БелАЗа. Пагражае да 15 гадоў8
Каментары