Як «Карчма 1863» у Вільні змагаецца з «сапраўднай мафіяй» скаржнікаў. Новы «ТОК» — з артыстам Іллёй Ясінскім
У новым выпуску ТОКу саўладальнік аднаго з самых беларускіх месцаў Вільні — Карчмы 1863 — Ілля Ясінскі расказаў пра скаргі на ўстанову і тое, як рост увагі ў Літве да «ліцвінізму» паўплываў на працу ўстановы.
Па словах Іллі, з ростам увагі ў Літве да «ліцвінізму» іх сацыяльны бізнес ператварыўся ў «сапраўдную вайнушку».
Калі да гэтага даводзілася сутыкацца з людзьмі, якія пісалі скаргі проста таму, што ім не падабаецца, што вакол шмат устаноў, якія ствараюць шум і перашкаджаюць жыхарам, то з ростам увагі да ліцвінізму на іх установу пачалі пісаць скаргі адносна мовы абслугоўвання.
У «Карчму 1863» прыходзіла інспекцыя. «У нас ёсць афіцыянты, якія валодаюць на розным узроўні літоўскай. Ёсць адзін беларус, хлопчык-студэнт, які проста з нуля ўсё вывучыў і супер размаўляе. Інспекцыя паглядзела, сказала што рабіць», — расказвае Ясінскі.
Пазней пачаліся скаргі ў працоўную інспекцыю. Па словах Іллі, праверка выявіла аднаго чалавека, які не быў афіцыйна ўладкаваны. Ён прыйшоў на другі дзень пасля сумоўя паглядзець, як арганізавана праца на кухні, каб вырашыць, ці падыходзіць яму. У выніку быў выпісаны штраф.
Ясінскі згадвае, што даводзілася вырашаць праблемы і з жыхарамі дома, у якім знаходзіцца «Карчма». Суседзі скардзіліся на вентыляцыю ўстановы. Па іх словах, калі яна працуе, то ў іх кватэру «сыплецца попел». У выніку давялося выклікаць спецыяльныя службы, якія за «нармальныя грошы» прачысцілі вентыляцыю.
«Усё праверылі, усё зрабілі. Усё шыкоўна. Прыходзіць суседка і кажа: «А вы яе не ўключайце, каб яна не грымела. Ок. Мы не ўключаем. Прыходзіць месяц-два. Суседзі пішуць скаргу (і гэта жанчына таксама), што ідзе пах ад дранікаў. Прыходзіць інспекцыя і загадвае, каб вентыляцыя была заўсёды ўключана. Мы ўключаем. Прыходзіць суседка са скаргамі на шум. Мы гаворым, што вы напісалі скаргу, прыехала інспекцыя загадала ўключыць. Усё там нармальна. Па нормах. Ок. Яна перастала прыходзіць», — згадвае Ілля.
Але апошнім часам, адзначае Ясінскі, колькасць скаргаў павялічылася. Прычым, па яго словах, яны накіраваны не на тое, каб «дамагчыся справядлівасці ці палепшыць нешта, а проста каб было дрэнна».
Мужчына заўважае, што ствараецца ўражанне, што ў горадзе дзейнічае «сапраўдная мафія»: «людзі паміж сабою размаўляюць і хваляцца, колькі хто зачыніў кавярняў, колькі скаргаў напісаў».
Глядзіце цалкам:
Судзяць гендырэктара БелАЗа. Пагражае да 15 гадоў8
Каментары
Але налепкі са сцягам ЕЗ ды прыпіска слова "Europos" да назвы кожнай установы пачынаючы ад універсітэтаў, заканчваючы вулічнымі прыбіральнямі, ня вельмі на штосьці ўплываюць, шчыра кажучы. Мянтальнасць тая самая.