Ідзе ў адстаўку Вікторыя Нуланд — чыноўніца, дэманізаваная расійскай прапагандай
Намесніца дзяржаўнага сакратара ЗША па палітычных пытаннях Вікторыя Нуланд ідзе ў адстаўку, паведаміў дзяржсакратар Энтані Блінкен у заяве, апублікаванай на сайце Дзярждэпартамента ЗША 5 сакавіка.
«Вікторыя Нуланд паведаміла мне, што плануе ў найбліжэйшыя тыдні пакінуць пасаду намесніцы дзяржсакратара па палітычных пытаннях», — паведаміў Блінкен.
Ён падзякаваў сваёй намесніцы за працу і адзначыў, што Нуланд прабыла на дзяржслужбе «тры з паловай дзесяцігоддзі» і працавала пры шасці прэзідэнтах і дзесяці дзяржсакратарах ЗША.
«Яе намаганні былі незаменныя для супрацьстаяння поўнамаштабнаму ўварванню Пуціна ва Украіну, фармавання глабальнай кааліцыі для забеспячэння ягонай стратэгічнай паразы і аказання дапамогі Украіне ў дасягненні таго дня, калі яна зможа цвёрда стаць на ногі — дэмакратычна, эканамічна і ў вайсковых адносінах», — гаворыцца ў заяве.
Постаць Вікторыі Нуланд займае асаблівае месца ў сістэме расійскай антызаходняй прапаганды. У снежні 2013 года яна як прадстаўніца Дзярждэпартамента ЗША прыязджала ў Кіеў, дзе ў той час пачаўся Еўрамайдан, і там разам з тагачасным амерыканскім амбасадарам ва Украіне Джэфры Паетам частавала мітынгоўцаў сэндвічамі, булачкамі і піражкамі. Гэтыя прадукты ў інтэрпрэтацыі расійскіх прапагандыстаў ператварыліся ў «пячэнькі» і сталі для іх сімвалам таго, што змаганне ўкраінцаў за волю і незалежнасць нібыта праплачанае заходнімі «лялькаводамі».
Бондарава абрынулася на музей Янкі Купалы і мастака Сушу23
Каментары