«Краскі», Merry Poppins, «Топлес»: што цяпер са спявачкамі папулярных у нулявых гёрлс-бэндаў? 

«Краскі»

«Оранжевое солнце», «Старшый брат», «А он не знает ничего» − на кожнай школьнай дыскатэцы беларускія школьнікі нулявых упрошвалі паставіць гэтыя хіты. Гурт «Краскі» з’явіўся ў 2001 годзе і амаль адразу здабыў папулярнасць, а яго салістка Аксана Кавалеўская стала кумірам для дзяўчынак не толькі ў Беларусі, але і за яе межамі.

Павялічыць

За 2001-2002 гады «Краскі» далі 172 канцэрты, пасля чаго калектыў вырашыў скараць расійскую эстраду. У 2003 году здарыўся скандал. Тады спявачка знайшла пірацкія дыскі са сваімі песнямі ў адной з дзяржаўных крам, а канцэртны дырэктар гурта запатрабаваў разабрацца з пытаннем парушэння аўтарскіх правоў. У хуткім часе ў мінскі офіс гурта ўварваліся сілавікі, а прадстаўнікоў групы абвінавацілі ў вымагальніцтве. Пасля гэтага «Краскі» канчаткова з’ехалі ў Маскву.

У 2006 годзе напярэдадні выбараў прэзідэнта ў Беларусі гурт падтрымаў Аляксандра Мілінкевіча. «Краскі» распаўсюдзілі зварот:

«Мы не па чутках ведаем, што такое рэжым Лукашэнкі. Мы змушаныя былі бегчы спачатку ў Нямеччыну, потым у Расію, а затым у ЗША. Але рэальнасць больш жорсткая, чым нам бы таго жадалася, і ўся надзея зараз толькі на вас і нашу агульную перамогу!».

Праз некалькі гадоў у інтэрв’ю «Нашай Ніве» Аксана Кавалеўская ад усяго адмаўлялася. Вось што яна казала: «Я заўсёды падтрымлівала Аляксандра Рыгоравіча Лукашэнку. Тое, як мяне імкнуліся выставіць, было толькі піяр-ходам, абсалютна не ўзгодненым са мной асабіста!».

У 2006 годзе Кавалеўская сышла з гурта — яна была цяжарная другім сынам, але яшчэ да родаў разышлася з мужам Аляксеем Воранавым, які быў прадзюсарам «Красок». Яе месца ў гурце займалі іншыя дзяўчыны, але папулярнасць патрохі сыходзіла.

Павялічыць

Сама ж Аксана пачала выступаць сольна. Але ж ніводны з новых трэкаў не заляцеў, як бы сказалі б у 2024, у трэнды. Бачачы гэта, артыстка пачала спяваць свае хіты нулявых. Расійскія СМІ пісалі аб тым, што былы муж спрабаваў забараніць Кавалеўскай карыстацца рэпертуарам «Красак», але, здаецца, у яго нічога не атрымалася. Бо Аксана і сёння спявае ў розных клубах (і канечне, на рэтра «супердыскатэках») «Оранжевое солнце».

Жанчына жыве ў Маскве, але яе даволі часта запрашаюць на дні горада ў розныя месцы Расіі. Калі меркаваць па райдары, які ёсць у агульным доступе, то ў мінулым годзе запрасіць Кавалеўскую на нейкае мерапрыемства каштавала ад 3 тысяч долараў.

Дарэчы, у 2020 годзе Аксана Кавалеўская збіралася выступіць на праўладным канцэрце 8 жніўня ў Брэсце, але ў выніку адмовілася (як і шмат іншых спевакоў).

Merry Poppins

Дзве сястры — Алеся і Марына Берулавы — спачатку разам спявалі ў рок-гурце «Мантана». Але ў 2004 годзе скончыўся іх кантракт са студыяй «Саюз». Дзяўчыны адправіліся ў Японію зарабіць грошай. Там яны захапіліся стылем японскай моды Gothic & Lolita і музычным напрамкам сінці-поп. Вярнуўшыся ў Мінск, сёстры стварылі сінці-поп-гурт Merry Poppins.

Павялічыць

Здаецца, у спявачак усё добра атрымлівалася: яны выступалі ў розных краінах (нават да Японіі дабраліся), атрымлівалі музычныя ўзнагароды, здымаліся для эратычных фотасесій мужчынскіх журналаў Maxim, Penthouse і Playboy. Між іншым, вікіпедыя з гонарам інфармуе, што Merry Poppins стаў першым беларускім музычным гуртом, надрукаваным у Playboy — артысткам прысвяцілі ажно восем старонак.

У 2008 годзе выйшаў студыйны альбом, які запісвалі 4 гады ў студыях Мінска і Масквы. Але ў апошні момант яго назву змянілі з заяўленага «Батэрфляй» на Do svidania. Алеся Берулава пракамэнтавала гэта так: «Нейкі асаблівы падтэкст у змене назвы шукаць не трэба. Проста мы вернемся, калі вецер пераменіцца!». Адразу пасля гэтага гурт перастаў існаваць.

Пазней Алеся тлумачыла «Нашай Ніве» тое рашэнне проста: хацелася сысці на піку. Яна таксама адказала, чаму ў свой час вырашыла з’ехаць з Беларусі ў Расію:

«На жаль, у 2006 годзе так склалася сітуацыя ў Беларусі, што там мне стала няўтульна. Не праз людзей, мае самыя любімыя людзі — гэта якраз беларусы. Складана было нечым займацца, расці. Нейкі застой быццам бы пачаўся. Можа, таму, што ўлада не мянялася? Не ведаю, я ў гэтым не надта разбіраюся. Але я адчувала: што вось сцяна, а вось столь − і ўсё. Далей Дажынкі, кліпчык за пару тысяч, бо за 15 тысяч здымаць — так і не адаб'еш… Вось такія нейкія цяжкасці пачаліся».

Павялічыць

У 2016 годзе Алеся заявіла аб адраджэнні групы «Мантана». У адным з інтэрв’ю жанчына распавяла, што новыя музыканты самі адшукалі яе і ўгаварылі выступаць разам, сцвярджаючы, што выраслі на яе песнях.

У 2020 годзе артыстка назірала за тым, што адбывалася ў Беларусі: «У мяне нават была сапраўдная дэпрэсія: чалавек пяць маіх сяброў пабывалі ў турме. Для мяне гэта ўсё было вельмі сумна і трывожна, страшна і горка, і да гэтага часу я вельмі хвалююся з-за таго, што там адбываецца. Неяк вельмі… нават не верыцца, што ўсё гэта адбывалася насамрэч і што да гэтага часу «вісіць» усё. Я тэлефанавала сваім сябрам стала, пыталася: жывыя? І калі я бачу, як дзіця саджаюць, як чалавека прымушаюць нешта казаць на камеру… у мяне гэта выклікае жах. І збянтэжанасць».

Літаральна некалькі дзён таму «Мантана» анансавала вялікі канцэрт у Маскве 15 лютага: у праграме заяўленыя найлепшыя песні за апошнія 25 гадоў, а таксама зусім новыя кампазіцыі.

Алеся Бярулава таксама працуе і як гештальт-тэрапеўтка. Цікавасць да псіхалогіі ў жанчыны з'явілася ў той час, калі яна была замужам за вядомым музыкантам Сяргеем Міхалком.

«Хоць у яго з другога альбома пачаліся цяжкасці з алкаголем, але затое з гэтага пачалася мая псіхалагічная дзейнасць. Спачатку я на ім трэніравалася, − казала Алеся ў інтэрв'ю «Нашай Ніве». — Проста вельмі шмат з ім займалася, важдалася, старалася неяк адвучыць яго піць. У выніку ўсё атрымалася, вось толькі, на жаль, усе мае пачуцці на гэта і сышлі».

Павялічыць

Марына Бярулава зараз таксама працуе ў Маскве як псіхалагіня, арт-тэрапеўтка і цялесна-арыентаваная тэрапеўтка. Працуе з тэмамі адносін, эмацыйнай залежнасці, праблемамі ў сэксе, трывогай і страхам.

«Топлес»

У 2005 годзе ў Беларусі з’явілася «свая «Виагра» − менавіта так пазіцыяніравалі гурт «Топлес». Але ж трэба адзначыць, што з гэтым папулярным гуртом вельмі любіць параўноўваць любы беларускі гёрлс-бэнд.

Павялічыць

Дарэчы, у 2023 год «Топлес» у чарговы раз адрадзіўся. За ўсю гісторыю яго салісткамі былі больш за 15 дзяўчат. І шмат з іх хто змог уладкаваць асабістае жыццё — жартавалі нават, што «Топлес» − гэта фабрыка нявест. Артысты, бізнэсмены і спартсмены забіралі вакалістак замуж.

Чаго вартая толькі гісторыя кахання Анастасіі Касянковай і футбаліста Аляксандра Глеба. А пазнаёміліся яны падчас эратычнай фотасесіі. Маладую спявачку і вядомага спартсмена нейкім цудам угаварылі зрабіць даволі адкрытыя здымкі для спартыўнай газеты «Прессбол». Раман развіваўся настолькі імкліва, што ўжо на трэцім спатканні Глеб зрабіў прапанову рукі і сэрцы. Пара ўпотай схадзіла ў ЗАГС і яшчэ год хавала ад усіх навіну аб вяселлі.

Сям’я праіснавала каля сямі гадоў, а потым развялася. Плеткары казалі, што Аляксандр марыў пра жонку, якая будзе нараджаць дзяцей і варыць баршчы, а Анастасію злавала роль дадатка да зорнага футбаліста.

У 2017 годзе Анастасія знайшла эратычны спосаб нагадаць пра сябе публіцы і апублікавала ў сацсетках відэа, дзе яна ў даволі адкрытым топе спрабуе касіць траву ручной касой. Яно хутка разляцелася па медыя.

Павялічыць

Цяпер яна вядзе менш медыйны лад жыцця і нават выдаліла старонку ў інстаграме. У мінулым годзе з’явілася інфармацыя, што Анастасія замужам за беларускім арганізатарам канцэртаў Паўлам Багдановічам. А працуе яна ў сферы турбізнэсу.

Павялічыць

Вольга Вайняловіч пачала будаваць кар’еру мадэлі яшчэ калі вучылася ў школе. Але потым усё ж вырашыла, што бачыць сябе спявачкай. Яна паспяхова прайшла кастынг у новы гурт «Топлес» — і прыкладна ў той жа час пазнаёмілася з комікам Вадзімам Галыгіным. Галыгін у той момант яшчэ быў жанаты, таму, згодна з афіцыйнай версіяй, адносіны ў яго з гарачай спявачкай пачаліся толькі пасля разводу. У 2010 годзе шоумэн зрабіў даволі эфектную прапанову рукі і сэрца: яна прагучала са сцэны фестывалю Comedy Club у Турцыі.

У выніку Вольга стала трэцяй жонкай Галыгіна. У пары двое дзяцей. Вольга час ад часу з’яўлялася ў нейкіх шоу на ТНТ. Але зараз выдаткоўвае ўсе сілы і час на клопат пра мужа і сыноў. Па старой звычцы расійскія СМІ пазначаюць яе ў артыкулах як свецкую львіцу.

Павялічыць

А вось ветэранкай калектыву можна лічыць Святлану Ліс. Яна з’явілася ў «Топлес» у 2009 годзе. Але потым прызналася, што ў яе не атрымалася перамагчы боязь сцэны, таму яна ў выніку стала прадзюсаркай і зараз займаецца якраз прадзюсіраваннем гурта «Топлес». У дадзены момант калектыў зноў шукае «стройную дзяўчыну, якая спявае».

Павялічыць

• 15
• 1
• 14
• 36
• 5
• 5
• 16
• 0