Беларуска з ЗША напісала, што хоча адправіць дачку у Мінск, таму што ў «Амерыцы няма такіх утульных дзіцячых садочкаў» — і панеслася
Дзіўная спрэчка на сотні каментароў у фэйсбук-суполцы «Беларусы ЗША. Разам лягчэй» пачалася з банальнага пытання, як цяпер праходзяць беларускую мяжу, а скончылася гісторыяй пра цудоўную ваду ў Савецкім раёне сталіцы, пасля якой можна хутка зацяжарыць.
Беларуска, якая з 12 гадоў жыве ў ЗША, напісала такі пост:
«Хочам адправіць бабулю ў Беларусь, каб яна аддала наша дзіця ў дзіцячы садок у Беларусі. У Амерыцы няма такіх утульных дзіцячых садоў і няма магчымасці вывучыць рускую мову на такім узроўні, як у рускамоўным асяроддзі. Бачым тут шмат эмігрантаў, чые дзеці вельмі дрэнна ведаюць мову роднай краіны. Потым яны вырастаюць і ўвогуле памятаюць толькі некалькі фраз. Мне страшна нават падумаць, што мая родная дачка не будзе пісаць і размаўляць на добрай рускай мове. Як цяпер сітуацыя з перасячэннем мяжы? Па-ранейшаму строгі допыт? Неяк боязна, раптам да чаго-небудзь прычэпяцца. Мы ж з Амерыкі едзем…»
Пытанне выклікала такую актыўную дыскусію, што адзін з каментатараў нават пажартаваў:
«Я сапраўды падафігеў а 6 раніцы − пад 300 каментаў! Напэўна, думаю, нехта зноў напісаў «Белоруссия».
Шмат хто напісаў, што іх не вельмі хвалюе той момант, што дзіця ў ЗША не будзе ведаць рускую мову — і што адпраўляць маленькую дзяўчынку ад бацькоў на іншы край планеты (нават калі гаворка ідзе пра радзіму) толькі з-за таго, што ў Беларусі іншыя дзіцячыя садочкі, дзіўна.
Але ж аўтарка пакрыўдзілася і паспрабавала пераканаць аўдыторыю ў тым, што адукацыя ў былых сацыялістычных краінах нашмат лепшая, а дзеці, якія прыехалі з Беларусі, Расіі ці Украіны, больш паспяховыя за тых, хто нарадзіўся ў ЗША.
У якасці прыкладу яна прыводзіць уласную гісторыю. Сцвярджае, што калі ва ўзросце 12 гадоў яна прыехала ў ЗША, то ў амерыканскай школе быццам бы сказалі, што яе веды па фізіцы, хіміі, біялогіі, матэматыцы на ўзроўні першага курса мясцовага каледжа. А вось англійская мова, нягледзячы на элітную мінскую гімназію і рэпетытара, была такой, што на ўрокі гэтай мовы прыходзілася хадзіць разам з першакласнікамі. Але ж, падкрэслівае аўтарка допісу, цяпер у яе граматыка нашмат лепшая, чым у карэнных амерыканцаў.
«Таму што працавітасць, канцэнтрацыя ўвагі, аналіз, крытычнае мысленне і іншыя навыкі, якія не даюць у амерыканскай школе, былі закладзеныя менавіта ў беларускай школе», — падсумавала яна.
Пры гэтым рускую мову жанчына лічыць вельмі складанай і кажа, што яе рэальна вывучыць выключна ў «асяроддзі пражывання рускамоўных».
Дарэчы, знайшліся беларусы ў ЗША, якія таксама хвалююцца праз тое, што незразумела, як размаўляць дзецям са сваякамі ў Беларусі, калі тыя не ведаюць англійскую мову.
Беларускія дзіцячыя садочкі ўвогуле выкліваюць у жанчыны захапленне:
«Дзіцячыя садкі цяпер у Мінску настолькі на высокім узроўні, што ні ў якое параўнанне не ідуць з амерыканскімі, дзе дзеці спяць на падлозе і ядуць халодную ежу, якую ім даюць з сабой бацькі. А колькі тут каштуюць гурткі і факультатывы, якія ў Беларусі па-ранейшаму бясплатныя ці каштуюць чыста сімвалічна. Акрамя таго, гвалт у амерыканскіх садах больш моцны, чым у беларускіх. Чытайце. Садкі, дзе дзеці спяць у ложках і ядуць гарачую ежу, ёсць толькі ў буйных гарадах і каштуюць ад 2 тысяч даляраў у месяц і вышэй».
Нехта палічыў, што гэта жлобства — шкадаваць на камфорт свайго дзіцяці 2 тысячы даляраў. А нехта наадварот абвінаваціў у крывадушнасці тых, хто не гатовы адпраўляць дзіця далёка ад бацькоў — хай нават дзеля самых выдатных дзіцячых садкоў у свеце. Таму што ў ЗША няма працяглага дэкрэтнага водпуску і многія мамы вяртаюцца на працу, калі дзіцяці ўсяго 3 месяцы — а малым займаюцца тыя ж бабулі або няні. То-бок у любым выпадку шмат часу бавіць з сынам ці дачкой не атрымліваецца.
Але скончыліся разважанні аўтаркі допісу вельмі нечакана: яна вырашыла распавесці, як яе сяброўка, якая шмат гадоў не магла зацяжарыць у ЗША, раптам зацяжарыла пасля таго, як… папіла ваду з-пад крана ў Савецкім раёне Мінска ды падыхала паветрам, насычаным кіслародам (бо Беларусь — гэта лёгкія Еўропы).
«Першае дзіця яна нарадзіла ў Амерыцы, а другое ў Мінску. Кажа, што розніцу адчула толькі ў кошце. Цяпер жыве ў Мінску. Двое дзяцей ходзяць у мінскія яслі і дзіцячы садок. У ЗША пакуль вяртацца не плануе».
Невядома чаму, але аўтарка ці адміністратары суполкі выдалілі допіс. Але хтосьці з тых, каго найбольш уразілі разважанні дамы, ужо зноў апублікаваў скрыншоты — і бурнае абмеркаванне аднавілася. Цяпер там ужо 340 новых каментарыяў.
Бондарава абрынулася на музей Янкі Купалы і мастака Сушу14
Каментары