58-гадовы Майк Тайсан рыхтуецца да бою з папулярным блогерам. Паядынак называюць боем мары

У ноч на 16 лістапада легенда боксу ў цяжкай вазе Майк Тайсан сустрэнецца на рынгу з байцом-блогерам Джэйкам Полам, Арганізатары назвалі бой «паядынкам мары», які здараецца раз у жыцці, піша Бі-бі-сі.

Бой адбудзецца на арэне AT&T Stadium у Арлінгтане ў амерыканскім Тэхасе. Былы абсалютны чэмпіён свету ў цяжкай вазе Тайсан выйдзе на рынг упершыню за 19 гадоў, і гэты выхад можа стаць апошнім. Зараз спартоўцу — 58 гадоў, а яго супернікам будзе малады 27-гадовы баец. Тайсан атрымае за бой 20 мільёнаў даляраў, а яго супернік — удвая больш.

Але справа не ў грошах. Легендарны спартовец заявіў, што гатовы памерці ў баі з Полам. «Для мяне гэта вельмі важна, калі я выйграю — я стану бессмяротным, — сказаў ён у трэйлеры да дакументальнага фільма Netflix пра бой. — Калі я выступлю дрэнна, я не хачу паміраць у бальніцы, я хачу памерці на рынгу».

Гэта першы баксёрскі бой, які транслюе відэасэрвіс Netflix. Паглядзець бой змогуць усе, хто мае падпіску на платформу.

Спартыўная камісія Тэхаса пагадзілася прызнаць спаборніцтва як прафесійны бой, і яго вынік будзе ўлічвацца ў залік абодвух спартсменаў. Але камісія дадала некалькі ўмоў з улікам веку Тайсана. Раўнды могуць працягвацца толькі дзве хвіліны, а бой не можа быць даўжэйшы за восем раўндаў.

Іншая важная дэталь — гэта памер пальчатак. У Тайсана і Пола будуць пальчаткі па 14 унцый (прыкладна 400 г), а не традыцыйныя — па 10 унцый, якія выкарыстоўваюцца ў прафесійным боксе. Накаўты дазволеныя, і пераможцу абвесцяць пасля васьмі раўндаў.

Шоу пачнецца а чацвертай ночы па мінскім часе 16 лістапада. Аднак сам бой паміж Тайсанам і Полам чакаецца не раней за пятаю раніцы.

Рэкорды Тайсана і Пола

Рэкорды Тайсана і Пола — гэта два розныя светы, калі не сказаць — два розныя адрэзкі часу.

Тайсан дэбютаваў у прафесійным спорце ў 1985 годзе, за 12 гадоў да нараджэння Пола. За 20-гадовую кар'еру Тайсан выйграў 50 баёў, прайграўшы толькі шэсць з 44 накаўтамі. Ён — наймаладзейшы чэмпіён свету ў цяжкай вазе. Ён атрымаў чэмпіёнскі пояс у 20 гадоў і стаў абсалютным чэмпіёнам свету ў 21.

Акрамя таго, ён — адзіны баксёр у гісторыі, якому ўдалося шэсць разоў запар абараняць тытул абсалютнага чэмпіёна свету.

Тайсан пакінуў рынг на піку сваёй кар'еры ў 2005 годзе пасля некалькіх параз. Але з таго часу правёў некалькі выставачных баёў, у тым ліку супраць Роя Джонса-малодшага ў 2020 годзе.

Але Джэйк Пол з'яўляецца фаварытам гэтага спаборніцтва па некалькіх прычынах.

Па-першае, ён больш чым у два разы маладзейшы за свайго суперніка. Полу 27 гадоў, нават калі гэта і азначае вялікую прагаліну ў досведзе. Ён пабудаваў сваю кар'еру на рынгу, стаўшы адным з самых вядомых карыстальнікаў YouTube у свеце. У 2018 годзе ён падхапіў трэнд боксу на YouTube, а ў 2020 годзе правёў свой першы прафесійны бой.

Пол біўся з многімі вядомымі спартсменамі, але многія з іх з'яўляюцца байцамі ММА (змяшаных баявых мастацтваў), якія ўпершыню спрабавалі сябе ў боксе. У яго 9 перамог у 10 баксёрскіх баях і адна параза ў баі з баксёрам і зоркай тэлешоу «Астравы кахання» Томі Ф'юры. У ліпені Пол у баксёрскім баі перамог былога байца UFC Майка Перы накаўтам у шостым раундзе.

Пол ніколі не біўся больш за восем раўндаў і мае сем спыненых баёў у сваім паслужным спісе. Для параўнання, Пол агульна правёў 52 раўнды, а Тайсан — 215.

• 4
• 0
• 1
• 3
• 0
• 0
• 0
• 0