З Польшчы з пачатку года дэпартавалі дзевяць беларусаў, якім адмовілі ў міжнароднай абароне
Большасць беларусаў, якія просяць міжнародную абарону ў Польшчы, атрымліваюць згоду. З пачатку 2024 года каля 2100 беларусаў атрымалі абарону, адмовілі толькі 109, а дзевяць з іх дэпартавалі, піша Белсат.
Польскае выданне Oko.press апублікавала статыстыку ад памежнікаў аб наданні замежнікам міжнароднай абароны. Паводле гэтай статыстыкі, у 2023 годзе па міжнародную абарону (статус уцекача або дадатковую абарону) у Польшчы звярталіся звыш 9 тысяч чалавек. Станоўчае рашэнне атрымала палова, з іх 2,9 тысячы — грамадзяне Беларусі, 1,1 тысячы — Украіны.
Ад пачатку 2024 года да канца верасня заявы на міжнародную абарону падала ўжо больш чалавек, чым за цэлы мінулы год: 12,3 тысячы. З іх 4,5 тысячы чалавек — грамадзяне Украіны, 2,9 тысячы — Беларусі.
Заявы падавалі таксама грамадзяне трэціх краінаў, якія пераходзілі беларуска-польскую мяжу. Статус уцекача прасілі 441 чалавек з Эрытрэі, 431 з Самалі, 419 з Эфіопіі, 389 з Сірыі і 198 з Афганістана — колькі з іх прыйшло менавіта з Беларусі, не ўдакладняецца, але грамадзян гэтых краінаў найчасцей лавілі на спробах незаконнага пераходу беларуска-польскай мяжы.
Ухвалілі за гэты год 4,8 тысячы заяваў на міжнародную абарону, у тым ліку 2,3 тысячы — ад грамадзян Украіны, 2,1 тысячы — Беларусі.
Менавіта статус уцекача, а не дадатковую абарону (якую просяць і выдаюць часцей), прасілі ў Польшчы ў 2023 годзе 64 чалавекі, станоўчыя рашэнні атрымалі 5, адмоўныя — 34, пакінулі без разгляду 29 заяваў. З пачатку 2024 года статус уцекача прасілі 83 замежнікі, 16 атрымалі адмову, 35 справаў пакінулі без разгляду.
Невялікую частку тых, хто атрымлівае адмовы, дэпартуюць. З 1 студзеня па 29 кастрычніка 2024 года з Польшчы дэпартавалі 18 чалавек у Расію, 9 у Беларусь, 5 у Грузію, 2 у Таджыкістан, па адным ва Узбекістан і Украіну. Рэшта тых, каму адмовілі, магла самастойна пакінуць Польшчу, аспрэчыць адмову або знайсці іншы шлях легалізацыі.
Брат удавы Зельцара: Кадэбісты ішлі ў кватэру па мяне10
Каментары