«Можам застацца без арміі і без Расіі». Прыгожын заявіў, што расійскія войскі адступаюць і нясуць вялізныя страты, але гэтая інфармацыя хаваецца
У той час, як падаецца, што ўкраінскі контрнаступ замарудзіўся і ідзе вельмі павольна, пра што гавораць і афіцыйныя асобы Украіны, кіраўнік ПВК «Вагнер» сцвярджае адваротнае і б'е ў званы.
Прыгожына папрасілі пракаментаваць сцвярджэнне намесніцы міністра абароны Украіны Ганны Маляр, што ўкраінскае контрнаступленне «ідзе па плане». У адказ ён выдаў ледзь не апакаліптычную для расійскіх войскаў карціну.
Звяртаючыся да сітуацыі ў Запарожскай вобласці, Прыгожын адзначае, што пад кантролем УСУ ўжо і Пяціхаткі, і паўночная частка Рабоціна, і Ураджайнае. УСУ таксама знаходзяцца «над Такмаком», пры гэтым у расіян нібыта няма ні ўзбраення, ні баепрыпасаў, а салдаты пішуць лісты камандаванню, што не маюць нават гранат і бранябойных патронаў, не кажучы пра больш сур'ёзныя сродкі.
УСУ, па словах Прыгожына, кіруюцца цяпер да Малочнага лімана непадалёк ад узбярэжжа Азоўскага мора, і калі ў іх усё атрымаецца, то ўкраінцы вернуць сабе большасць тэрыторый, акупаваных Расіяй.
З другога боку тым часам нібыта пачынаецца фарсіраванне Дняпра, у Голай Прыстані ўжо высадзіліся дыверсійна-разведвальныя групы, а хутка прыйдуць і рэгулярныя войскі.
Усе гэтыя звесткі, як сцвярджае Прыгожын, хаваюцца ад ваенкараў, «інфармацыя затыкаецца», «ідзе прамая здрада РФ». І ўсё гэта адбываецца на фоне страт, пры недахопе асабовага складу на 50—60%. У адзін дзень расіяне, маўляў, прачнуцца і даведаюцца, што ўкраінцы ўжо адбілі і Крым.
А кіраўніцтва «спецыяльнай ваеннай аперацыі», якую Прыгожын назваў «так званай», на ягоную думку, займаецца падтасоўкай фактаў для перадачы кіраўніцтву Крамля, яны «падманваюць вярхоўнага галоўнакамандуючага і расійскі народ».
Калі так будзе працягваецца, то, маўляў, «мы застанёмся без галоўнага — без Расіі».
А на ўчарашняй калегіі Мінабароны, як гнеўна наракае Прыгожын, тым часам абмяркоўвалася выстава, якую ладзяць сваякі Шайгу, і правядзенне вайсковага парада з удзелам вайсковых караблёў. Пры гэтым кіраўнік ПВК «Вагнер» згадаў пра лёс расійскага флагмана Чарнаморскага флоту «Масква».
Фактычна пацвярджае словы Прыгожына ў сваім свежым допісе і адзін з ваенкараў, які піша пад нікам «Трынаццаты»:
«На сённяшні дзень нашы байцы нясуць сур'ёзныя страты цяпер, фактычна кожны дзень па 6-7 чалавек двухсотых, сёння 4, і гэта толькі ў адным дэсантным палку. Днямі загінулі былыя зняволеныя, з трох сотняў у жывых засталося шасцёра, а калі падлічыць агульныя страты ўсіх падраздзяленняў, то вы проста нават не паверыце ў гэтыя лічбы.
Ідыёты, што носяцца з фотаздымкамі «падбітага леапарда», карэнным чынам не ўсведамляюць усяго таго, што дзеецца цяпер на фронце. Працэс ідзе, мы губляем населеныя пункты, баявыя дзеянні праходзяць у складанай мясцовасці…
Напэўна, людзі пачнуць прачынацца толькі тады, калі ўбачаць, што вакол усё больш партрэтаў з жалобнымі стужкамі, і большасць страт — гэта віна камандавання».
Яшын: Лукашэнка абменьвае палітвязняў на дэталі для самалётаў «Белавія»2
Каментары