«Зялёная карта» хутка ўсё. Як будуць афармляцца страхавыя полісы на аўто для выезду за мяжу?
З чэрвеня беларусы згубяць магчымасць афармляць «Зялёную карту» для выезду на аўто ў ЕС. Перасоўвацца па Еўропе на сваёй машыне можна будзе толькі пасля афармлення поліса ў замежных страхавых кампаніях. Як і па якіх цэнах давядзецца страхаваць аўтамабілі для выезду за мяжу?
Тэрмін дзеяння абавязацельстваў па ўзаемным прызнанні «Зялёнай карты» скончыцца 1 чэрвеня.
Ад гэтага часу застрахаваць аўтамабіль і іншыя транспартныя сродкі для паездкі па Еўропе можна будзе толькі ў замежных страхавых кампаніях. Гэта можа быць, як адмысловы поліс прыгранічнага страхавання, так і страхоўка звычайнага ўзору, калі кампанія гатова застрахаваць аўтамабіль, зарэгістраваны ў іншай краіне.
Ці стануць страхоўкі даражэйшымі?
«Зялёная карта» ў Беларусі прадавалася па цэнах ад 30 да 425 еўра. Самая танная каштуе 30 еўра і мае тэрмін дзеяння ў 15 дзён. Месячная страхоўка на легкавое аўто каштуе 50 еўра. Застрахавць аўтамабіль на большы тэрмін ужо немагчыма. Для даведкі, «Зялёная карта» на тры месяцы прадавалася за 145 еўра, на паўгода за 230, а на год за 425 еўра.
Цяпер беларусам давядзецца страхаваць транспарт непасрэдна ў Польшчы, Літве або Латвіі.
У Літве цэны на страхоўкі для легкавых аўто, зарэгістраваных у Беларусі, выглядаюць наступным чынам:
15 дзён — 21 еўра, месяц — 36 еўра, тры месяцы — 108 еўра.
У Польшчы застрахаваць беларускі аўтамабіль можна па цэнах ад 37 еўра за трыццаць дзён. Страхоўка на тры месяцы абыдзецца ў 97 еўра, на паўгода — 165, гадавы полюс каштуе 225 еўра.
Як бачым, у фінансавым плане беларускія аўтааматары нічога не губляюць. Праз розніцу ў цэнах многія аўтамабілісты, якія працяглы час ездзілі на аўто з беларускай рэгістрацыяй за межамі Беларусі, і раней страхавалі свае аўто ў ЕС. Адзіны мінус, з якім яны маглі сутыкнуцца, хаваўся ў тым, што пасля прыезду на радзіму ім усё адно даводзілася купляць страхоўку ў Беларусі.
Рэч у тым, што ў нас на заканадаўчым ўзроўні было прапісана, што зарэгістраваны ў краіне аўтамабіль пры выездзе за мяжу мусіць мець «Зялёную карту», аформленую ў беларускай страхавой кампаніі.
Пасля 1 чэрвеня беларускія памежнікі больш не змогуць гэтага патрабаваць.
Тым не менш, прынамсі пакуль не зразумела, з якімі складанасцямі могуць сутыкнуцца беларускія аўтамабілісты пасля даты ікс. Калі страхавыя кампаніі суседніх краін ЕС арганізуюць афармленне полісаў наўпрост каля пунктаў пропуску на мяжы з Беларуссю, то скасаванне пагаднення не прынясе дадатковых клопатаў.
Некаторыя страхавыя кампаніі ў Польшчы і Літве дазваляюць набыць страхоўку дыстанцыйна. Галоўнае — вырашыць пытанне з аплатай.
А вось хто безумоўна прайграе ад скасавання пагаднення паміж Беларуссю і 32 краінамі Еўропы — дык гэта беларускія страхавыя кампаніі. «Зялёныя карты» складалі 21,8% у аб'ёме страхавых узносаў па абавязковым страхаванні грамадзянскай адказнасці.
З 1 чэрвеня ў беларускіх страхавых кампаній застаецца магчымасць афармляць «Зялёныя карты», які будуць дзейнічаць на тэрыторыі Расіі і некаторых іншых краін. Усяго ў пагадненні аб «зяленай карце» удзельнічальнічае 48 краін, 32 з іх афіцыйна апавясцілі аб скасаванні двухбаковага пагаднення з РБ і РФ, пачынаючы з 1 чэрвеня 2023 года. Украіна разарвала пагадненне аб узаемным прызнанні гэтых страхавых сертыфікатаў, выдадзеных беларускімі і расійскімі страхавымі кампаніямі, яшчэ 5 красавіка 2022 года.
*Прыведзеныя ў артыкуле цэны на страхавыя полісы для аўто з замежнай рэгістрацыяй у Польшчы і Літве могуць адзрознівацца ў залежнасці ад канкрэтнай страхавой кампаніі.
У чатах беларусы дзеляцца кантактамі для афармлення поліса ў Польшчы (+48791267772, Viber, Telegram, WhatsApp) і Літве (+37064731577, Viber, Telegram).
«Наша Нiва» — бастыён беларушчыны
ПАДТРЫМАЦЬЯк адрозніваюцца цэны на новыя аўто ў Еўропе і Беларусі
Lada паказала свой першы электрамабіль. Яго будуюць на базе Dacia Logan MCV родам з 2006 года
«Прадаецца ў сувязі з пераездам». Ці шмат беларусаў прадае машыны з-за эміграцыі?
Каментары
Яшчэ як змогуць!