Андрэй Стрыжак: Мэта пераследу за данаты — знішчэнне беларускай салідарнасці
У сувязі з распачатай рэжымам Лукашэнкі кампаніі пераследу айцішнікаў за данаты ў фонды салідарнасці кіраўнік фонду BYSOL Андрэй Стрыжак выклаў у фэйсбуку сваё бачанне сітуацыі. Ён акрэсліў зону бяспекі і зону рызыкі, параіў, што ў такім выпадку рабіць, расказаў, чаго дабіваецца рэжым і як сітуацыя ўплывае на працу яго каманды.
Андрэй Стрыжак усім тым, хто данаціў на BYSOL у 2020—2022 гадах, прапануе вызначыць, у якой зоне яны знаходзяцца: у зоне бяспекі ці ў зоне рызыкі. І для кожнага выпадку прапануе канкрэтныя крытэрыі.
У зоне бяспекі, паводле яго, знаходзяцца тыя, хто:
- данаціў з карты замежнага банка (за выключэннем расійскіх);
- данаціў праз сайт BYSOL з карты замежнага банка (за выключэннем расійскіх) ці праз Paypal.
Тым не менш, нават такім людзям, калі яны знаходзяцца за мяжой, Стрыжак усё адно не рэкамендуе наведваць найбліжэйшым часам Беларусь.
У той жа час у зоне рызыкі апынаюцца тыя, хто:
- данаціў з карты беларускага банка праз Facebook. Праўда, у такім выпадку сілавікі бачаць толькі сам факт даната на нешта, у выпісцы з банка данат выглядае як Facebook London — Fundraising. Аднак гэта ратавала б толькі тады, каб усё рабілася ў адпаведнасці з законам і сілавікі вымушаныя былі б збіраць рэальныя доказы, а практыка сведчыць пра зусім іншае;
- данаціў праз сайт BYSOL з карты беларускага банка да ўвядзення санкцый і блакавання такой магчымасці. У зоне рызыкі таксама плацяжы з картаў расійскіх банкаў.
Мэты распачатай цяпер рэжымам кампаніі, на думку Стрыжака, наступныя:
- пасеяць недавер да бяспекі публічных збораў;
- стварыць ілюзію зліваў/узломаў/уласнай усёмагутнасці;
- знішчыць нашу салідарнасць, якую ўлада ўспрымае як пагрозу.
Тым, хто знаходзіцца ў зоне рызыкі, Стрыжак рэкамендуе пакінуць Беларусь. Кансультацыі, як гэта можна зрабіць, і магчымасць візавай падтрымкі ў выпадку пераследу даступныя праз гарачую лінію ў тэлеграме @help_bysol.
Што тычыцца захадаў, якія робяцца цяпер непасрэдна фондам, то, паводле Стрыжака, цяпер:
- вядуцца перамовы аб выдаленні/утойванні старонак збору сродкаў, якія запускаліся фондам у 2020—2021 гадах, каб засцерагчы донараў праз Facebook. На гэты момант опцыя выдалення старонак збору сродкаў недаступная.
- данаты трэба рабіць бяспечнымі спосабамі:
— з картаў замежных банкаў праз сайт BYSOL;
— праз Paypal (за выключэннем картаў беларускіх банкаў);
— з картаў замежных банкаў праз Facebook (з адключэннем опцыі адлюстравання даната на ўласнай старонцы).
Пры гэтым Андрэй Стрыжак запэўніў, што, нягледзячы на ўсе атакі і спробы знішчыць беларускую салідарнасць, ягоная каманда працягвае сваю працу і пастаянна ўдасканальваецца.
Кожны ўдар уладаў старанна аналізуецца, кожны інцыдэнт кладзецца ў аснову расследавання і па кожнай няштатнай сітуацыі праводзіцца праверка, недахопы і вузкія месцы сістэмы ліквідуюцца.
Каментары