Крыніцы: Янчэўскі прыдумаў, каб праграмістаў за данаты 2020-га не садзілі, але здзіралі кампенсацыю ў дзесяціразовым памеры
Як стала вядома «Нашай Ніве», спецслужбы скончылі апрацоўку даных аб данатах у фонды BySol і ByHelp у 2020—2021 годзе. Гаворка пра тыя пераводы, якія рабіліся з беларускіх карт, калі фонды яшчэ не былі прызнаныя лукашэнкаўцамі «экстрэмісцкімі». Наданне законам «зваротнай сілы» стала ў Беларусі сістэмай.
Апошнія тыдні ў ІТ-кампаніі прыходзяць лісты з Камітэта дзяржаўнай бяспекі са спісамі супрацоўнікаў, якія ў 2020—2021-м рабілі пераводы ў фонды беларускай салідарнасці BySol і ByHelp, які дапамагае ахвярам палітычных рэпрэсій.
«Натуральна, большасць пераводаў была ад тых, хто мог сабе дазволіць траціць грошы на дапамогу — ад айцішнікаў. За фінансаванне «экстрэмісцкай дзейнасці» прадугледжваецца турэмнае зняволенне. Але кіраўнік ПВТ Усевалад Янчэўскі прыдумаў хітры ход», — расказаў «Нашай Ніве» чалавек з Парка высокіх тэхналогій.
«Янчэўскі дамовіўся з КДБ, што садзіць людзей не будуць, таму што сфера і так перажыла шмат шокаў за апошнія два гады і страціла вядучыя кампаніі і кадры. Калі ж тысячы людзей — а данацілі дзясяткі тысяч людзей — будуць ведаць, што над імі вісіць меч пасадкі за данат, то здарыцца чарговая хваля міграцыі. Янчэўскі прыдумаў схему, якая спадабалася наверсе», — дадае суразмоўца.
Лукашэнкаўцы цяпер рассылаюць па ІТ-прадпрыемствах спісы супрацоўнікаў і прымушаюць іх, «каб пазбегнуць далейшых праблем», перавесці суму даната ў дзесяцікратным памеры на ўказаны рахунак.
Рахункі розныя.
Што будзе з тымі, хто адмовіцца плаціць па мульціплікатары, невядома.
Частку з тых, хто ахвяраваў, выклікаюць на размовы ў КДБ.
«Лічыцца, што правільная тактыка тут — прыкідвацца дурачком і казаць, што быў не ў курсе пра «злачынную дзейнасць «Байсол» і «асабліва не ўчытваўся ў тое, на што просяць грошы — думаў, што ахвярую на дапамогу інвалідам», — кажа суразмоўца.
Лукашэнкаўцам вядомыя тыя пераводы, якія рабіліся з беларускіх плацежных карт і рахункаў, калі фонд яшчэ не быў прызнаны лукашэнкаўцамі «экстрэмісцкім». Пераводы з карт, эмітаваных замежнымі банкамі, яны бачыць не маглі.
Фонды BySol і ByHelp дапамаглі дзясяткам тысяч ахвяр палітычных рэпрэсій і іх сем'ям — арыштаваным і звольненым з працы. Эфектыўнасць і адвага, з якой дзейнічаў фонд, зрабіла яго адной з галоўных цэляў для лукашэнкаўскіх спецслужбаў.
Наданне законам «зваротнай сілы» стала ў Беларусі сістэмнай з'явай.
Кіраўнік BySol Андрэй Стрыжак выключае ўцечку дадзеных пра людзей, якія данацілі, з баз даных фонду. Ëн мяркуе, што гаворка пра данаты з рахункаў у беларускіх банках.
«Мы настойліва рэкамендуем пакінуць краіну тым, каго выклікаюць на «размову». Ніхто не ведае, чым яна скончыцца канкрэтна для вас», — напісаў Стрыжак у сваім тэлеграм-канале.
«Наша Нiва» — бастыён беларушчыны
ПАДТРЫМАЦЬВаскрасенскі: Трэба, каб Сікорскі прывёз падарунак Лукашэнку. А Бяляцкі і 20 завадатараў выйдуць апошнімі26
Каментары