Krynicy: Jančeŭski prydumaŭ, kab prahramistaŭ za danaty 2020-ha nie sadzili, ale ździrali kampiensacyju ŭ dziesiacirazovym pamiery
Jak stała viadoma «Našaj Nivie», śpiecsłužby skončyli apracoŭku danych ab danatach u fondy BySol i ByHelp u 2020—2021 hodzie. Havorka pra tyja pieravody, jakija rabilisia ź biełaruskich kart, kali fondy jašče nie byli pryznanyja łukašenkaŭcami «ekstremisckimi». Nadańnie zakonam «zvarotnaj siły» stała ŭ Biełarusi sistemaj.
Apošnija tydni ŭ IT-kampanii prychodziać listy z Kamiteta dziaržaŭnaj biaśpieki sa śpisami supracoŭnikaŭ, jakija ŭ 2020—2021-m rabili pieravody ŭ fondy biełaruskaj salidarnaści BySol i ByHelp, jaki dapamahaje achviaram palityčnych represij.
«Naturalna, bolšaść pieravodaŭ była ad tych, chto moh sabie dazvolić tracić hrošy na dapamohu — ad ajcišnikaŭ. Za finansavańnie «ekstremisckaj dziejnaści» praduhledžvajecca turemnaje źniavoleńnie. Ale kiraŭnik PVT Usievaład Jančeŭski prydumaŭ chitry chod», — raskazaŭ «Našaj Nivie» čałaviek z Parka vysokich technałohij.
«Jančeŭski damoviŭsia z KDB, što sadzić ludziej nie buduć, tamu što śfiera i tak pieražyła šmat šokaŭ za apošnija dva hady i straciła viadučyja kampanii i kadry. Kali ž tysiačy ludziej — a danacili dziasiatki tysiač ludziej — buduć viedać, što nad imi visić mieč pasadki za danat, to zdarycca čarhovaja chvala mihracyi. Jančeŭski prydumaŭ schiemu, jakaja spadabałasia naviersie», — dadaje surazmoŭca.
Łukašenkaŭcy ciapier rassyłajuć pa IT-pradpryjemstvach śpisy supracoŭnikaŭ i prymušajuć ich, «kab paźbiehnuć dalejšych prablem», pieravieści sumu danata ŭ dziesiacikratnym pamiery na ŭkazany rachunak.
Rachunki roznyja.
Što budzie z tymi, chto admovicca płacić pa mulciplikatary, nieviadoma.
Častku z tych, chto achviaravaŭ, vyklikajuć na razmovy ŭ KDB.
«Ličycca, što pravilnaja taktyka tut — prykidvacca duračkom i kazać, što byŭ nie ŭ kursie pra «złačynnuju dziejnaść «Bajsoł» i «asabliva nie ŭčytvaŭsia ŭ toje, na što prosiać hrošy — dumaŭ, što achviaruju na dapamohu invalidam», — kaža surazmoŭca.
Łukašenkaŭcam viadomyja tyja pieravody, jakija rabilisia ź biełaruskich płaciežnych kart i rachunkaŭ, kali fond jašče nie byŭ pryznany łukašenkaŭcami «ekstremisckim». Pieravody z kart, emitavanych zamiežnymi bankami, jany bačyć nie mahli.
Fondy BySol i ByHelp dapamahli dziasiatkam tysiač achviar palityčnych represij i ich siemjam — aryštavanym i zvolnienym z pracy. Efiektyŭnaść i advaha, ź jakoj dziejničaŭ fond, zrabiła jaho adnoj z hałoŭnych celaŭ dla łukašenkaŭskich śpiecsłužbaŭ.
Nadańnie zakonam «zvarotnaj siły» stała ŭ Biełarusi sistemnaj źjavaj.
Kiraŭnik BySol Andrej Stryžak vyklučaje ŭciečku dadzienych pra ludziej, jakija danacili, z baz danych fondu. Ën miarkuje, što havorka pra danaty z rachunkaŭ u biełaruskich bankach.
«My nastojliva rekamiendujem pakinuć krainu tym, kaho vyklikajuć na «razmovu». Nichto nie viedaje, čym jana skončycca kankretna dla vas», — napisaŭ Stryžak u svaim telehram-kanale.
«Naša Niva» — bastyjon biełaruščyny
PADTRYMAĆŠto za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary