Беларусам прапануюць рабіць уклады ў юанях тэрмінам ад 35 да 364 дзён пад 1,5—3% гадавых. «Наша Ніва» пацікавілася ў эканаміста, наколькі выгадным можа быць такі ход, а таксама даведалася, уклады ў якой валюце аказаліся найбольш выйгрышнымі сёлета.
Кітайская валюта строга рэгуляюецца ўладамі
Культура юаня ў Беларусі толькі пачынае зараджацца. Кітайская валюта прыходзіць у масы шмат у чым дзякуючы таму, што пасля пачатку вайны і ўвядзення санкцый Расія і Беларусь замест звыклых даляраў і еўра сталі прыглядацца ў бок валют сяброўскіх краін, перш за ўсё Кітая.
«Выбар у бок Кітая быў зроблены з прычыны таго, што ён беларускімі ўладамі разглядаецца як важны гандлёвы партнёр, з вялікім рынкам. Хоць сам прыход да юаня адбываецца перш за ўсё не з эканамічных меркаванняў, а з-за санкцый.
Кітайская валюта строга рэгулюецца з боку ўладаў, юань не з'яўляецца свабодна канвертаванай валютай, яго доля ў ЗВР іншых краін таксама складае невялікую частку адносна даляра і еўра. Таму ў гэтага рашэння ёсць як як свае плюсы, так і мінусы», — тлумачыць эксперт BEROC Настасся Лузгіна.
Банкі таксама адрэагавалі на такую пераарыентацыю на валютным рынку і сталі прапаноўваць ўклады ў юанях фізічным асобам. Спярша такія прапановы пачалі набіраць папулярнасць у Расіі. Цяпер жа юаневыя ўклады дабраліся і да Беларусі (такія ёсць у банку ВТБ). А некалькі дзён таму ў нас быў выдадзены першы крэдыт у юанях.
«Лагічней разглядаць уклады ў далярах або беларускіх рублях»
Эканаміст лічыць, што ўклады ў кітайскай валюце маюць права на існаванне, але называць іх надта выгаднымі яна не бярэцца.
«Па-першае, 1,5-3% гадавых — гэта вельмі нізкая стаўка, пры якой даходнасць па такім ўкладзе можа сыходзіць у адмоўны дыяпазон. Калі, напрыклад, да даляра беларускі рубель умацаваўся больш, чым на 3 % у параўнанні з пачаткам года, то ў дачыненні да юаня ўмацаванне склала блізу 10%. Зыходзячы з гэтага, лагічней разглядаць уклады ў далярах ЗША або беларускіх рублях.
Працэнтныя стаўкі па далярах (да 5% гадавых) перакрываюць дэвальвацыю даляра да беларускага рубля, а стаўкі ў рублях часцяком перакрываюць яшчэ і ўзровень інфляцыі. Таму, улічваючы нізкую працэнтную стаўку, уклады ў юанях могуць быць выгадныя хутчэй тым, каму неабходна мець грошы менавіта ў гэтай валюце», — адзначае Лузгіна.
Калі ж неабходнасці захоўваць сродкі ў кітайскай валюце няма, то ўклады ў далярах ці беларускіх рублях будуць больш выгаднымі.
Сярод іншых мінусаў укладаў у юанях эксперт называе магчымае пагаршэнне спраў у эканоміцы Кітая, якое можа быць выклікана пагаршэннем адносін паміж Кітаем і яго асноўным гандлёвым партнёрам — ЗША — з-за сітуацыі вакол Тайваня.
Таксама эканаміст адзначае сур'ёзную залежнасць Кітая ад замежных энерганосьбітаў і запаволенне росту развіцця эканомікі на фоне кавідных абмежаванняў, якія дагэтуль дзейнічаюць у Кітаі.
«Незразумела, як у такіх умовах далей будзе працаваць кітайская эканоміка і як улады будуць рэгуляваць курс. Даляр і еўра ў гэтым выпадку з'яўляюцца больш прагназавальнымі, паколькі іх курс рэгулюецца рынкам, а не адміністрацыйным шляхам, як гэта адбываецца ў Кітаі. Усё гэта накладвае дадатковыя рызыкі, звязаныя з юанем», — адзначае эксперт.
Якія ўклады аказаліся самымі выгаднымі?
Што датычыць найменш выгадных укладаў, то па выніках года імі аказаліся ўклады ў еўра, бо ўмацаванне беларускага рубля ў адносінах да еўрапейскай валюты на цяперашні момант складае каля 20%.
«Атрымліваецца, што калі хтосьці год таму адкрыў уклад у еўра, то праз год, пры пераводзе грошай з еўра ў беларускія рублі, ён атрымае прыкметна менш грошай, чым гэта было год таму. Так атрымалася за кошт таго, што за гэты перыяд моцна змяніліся суадносіны ў пары даляр-еўра», — тлумачыць эканаміст.
У сувязі з гэтым ўклады ў далярах па выніках года аказаліся значна больш выгаднымі за уклады ў еўра.
Выгаднымі аказаліся таксама ўклады ў беларускіх рублях, дзе працэнтныя стаўкі традыцыйна вышэйшыя, чым у валюце. Акрамя таго, больш, чым на 3% даляр дэвальваваўся да рубля. Агулам атрымліваецца, што чалавек, які год таму адкрыў ўклад у нацыянальнай валюце і сёння можа зняць грошы, пры абмене іх на даляры ці еўра атрымае больш, чым ён меў у валютным выражэнні год таму.
Тым не менш патэнцыйным укладчыкам эканаміст рэкамендуе дыверсіфікаваць грошы і адкрываць уклады ў розных валютах, напрыклад беларускіх рублях і далярах.
«Наша Нiва» — бастыён беларушчыны
ПАДТРЫМАЦЬЧытайце таксама:
Беларускі банк упершыню выдаў крэдыт у юанях
Літва будзе дабівацца ўраўнавання санкцый для Расіі і Беларусі, а мытня зробіць праверку грузаў стражэйшай
Павелічэнне ставак і скарачэнне льгот. Якія падатковыя змены чакаюць нас у 2023 годзе
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»12
Каментары