Славаччына прадае Украіне «Зузаны», якія б'юць на 50 км
Пра паспяховыя перамовы аб набыцці 16 самаходных артылерыйскіх установак паведамляе DennikN са спасылкай на міністра абароны Славакіі Яраслава Надзя. Што гэта за зброя?
Zuzana-2 зʼяўляецца прадстаўніком сямейства славацкіх самаходных артылерыйскіх установак, карані якіх сыходзяць у сямідзясятыя гады мінулага стагоддзя. Тады ў Чэхаславакіі была створана САУ ShKH vz. 77 DANA, якая адрознівалася незвычайнай архітэктурай і досыць высокімі характарыстыкамі. У 90-х гадах у Славакіі на аснове гэтага ўзору распрацавалі самаходную гаўбіцу ShKH Zuzana. Галоўным яе адрозненнем была новая 155-міліметровая гармата, адаптаваная пад стандарты НАТО. Пазней развіццё канцэпцыі працягнулася, у выніку чаго ў 2008 годзе зʼявілася САУ Zuzana-2.
Вага ўстаноўкі амаль 34 тоны, аднак магутны рухавік Tatra дазваляе рухацца па дарогах на хуткасці да 90 км/г, а пры руху па-за дарогамі пераадольваць водныя перашкоды глыбінёй да 1,2 метра. Запас ходу — 650 км. Баявое аддзяленне выканана максімальна аўтаматызаваным, экіпаж, які складаецца з 4 чалавек, нават не датыкаецца да боепрыпасаў. Корпус выкананы з брані, якая вытрымлівае кулі калібру 14,5 мм. Гармата калібра 155 мм пры выкарыстанні актыўна-рэактыўных снарадаў дазваляе наносіць удары па цэлях на адлегласці да 50 км. Сістэма кіравання агнём дазваляе працаваць з лічбавымі картамі, а таксама дае магчымасць наносіць удар па цэлі, накіроўваючы некалькі снарадаў па розных траекторыях. Запас снарадаў — 40 штук. Zuzana-2 робіць 6 стрэлаў за хвіліну. Устаноўка мае сістэмы фільтравання і вентыляцыі, якія дазваляюць весці тактычныя дзеянні нават у забруджанай зоне.
Для абароны самой артылерыйскай устаноўкі выкарыстоўваюцца кулямёт калібру 12,7 мм і гранатамёты РПГ-75.
Forbes: Сваё ўзбраенне Украіне можа перадаць Кіпр
Украіна перамагае ў бітве беспілотнікаў
Ці пойдуць танкі на сметнік гісторыі? Магчымае наступства ўкраінскай вайны
Дзяніс Мельянцоў і яго рэалпалітык: ён сапраўды памяняў погляды ці проста раней маскіраваўся?47
Каментары