Жыхар Бабруйска атрымаў два гады хіміі за абразу Лукашэнкі. Размову ў відэачаце запісаў і выклаў былы міліцыянт
25 жніўня суд Бабруйска і Бабруйскага раёна прызнаў 31-гадовага Рамана Стацэвіча вінаватым у здзяйсненні злачынства, прадугледжанага арт.368 КК. Суддзя Антон Дудаль прысудзіў яго да двух гадоў «хіміі», хаця пракурорка Хадневіч прасіла пазбавіць яго волі на год, пішуць праваабаронцы.
Рамана Стацэвіча прызналі вінаватым у публічнай абразе Аляксандра Лукашэнкі. Згодна з абвінавачаннем, 1-3 мая ён праз публічны відэачат па відэасувязі з незнаёмым яму раней Канюшыкам наўмысна абразіў Лукашэнку з выкарыстаннем ненарматыўнай лексікі.
Канюшык пры гэтым праводзіў маніторынг інтэрнэту, каб выявіць крытыкаў улады. Згодна з тэкстам абвінавачання, Стацэвіч усведамляў, што размова можа быць запісаная Канюшыкам і перададзеная ўпаўнаважаным асобам, а таксама распаўсюджаная ў шырокім доступе.
Канюшык запісаў і выклаў размову 3 мая пад назвай «Омерзительный тип» на сваім канале «Дзед барадзед» на ютубе.
Канюшык праз хваробу ў 1997 годзе пакінуў службу, аднак падтрымлівае дзяржорганы, уладу, ідэю парадку ў краіне, таму дапамагае ёй, наколькі магчыма, выконвае грамадзянскі абавязак. Напрыклад, «дапамагае АУС выкрываць асоб, якія пашыраюць ідэі падарваць аўтарытэт прадстаўнікоў ўлады і ідэю ўтварэння хаосу і хваляванняў у нашай Рэспубліцы Беларусь».
Таму ён стварыў свой канал «Дзед Барадзед», дзе спрабаваў данесці да жыхароў розных краін тое, што ў Беларусі жывуць мірныя і спакойныя людзі, якія не хочуць вайны.
Канюшык патлумачыў, што размясціў відэа на канале, каб людзі «апамяталіся», перасталі падтрымліваць апазіцыю, таму што ў такім выпадку ўзнікае барацьба паміж грамадзянамі.
Ён таксама адзначыў, што даруе, калі Стацэвіч яго абразіў, але ягоныя абразы ў бок Лукашэнкі дараваць немагчыма.
Абвінаваўца запрасіла для Стацэвіча адзін год пазбаўлення волі ў калоніі строгага рэжыму. У апошнім слове Раман Стацэвіч пагадзіўся, што зневажаць любога чалавека няправільна. Аднак ён размаўляў з чалавекам сам-насам.
«Атрымліваецца, мы адкаціліся на 70 гадоў назад, калі можна ціха зняць чалавека, які мне не дагодны, вывесці яго на правакацыйныя размовы, запісаць гэта і выкласці на старонцы або пайсці ў міліцыю. Не было такога, што Канюшык папярэдзіў мяне, што ён блогер і здымае мяне. Публічнымі запісы зрабіў менавіта Канюшык».
Суддзя Антон Дудаль вынес прысуд: два гады хіміі.
Ва Украіне загінула 24-гадовая беларуская добраахвотніца Марыя Зайцава19
Каментары