Прэм'ер-міністр Украіны Аляксей Ганчарук заявіў, што ўрад працуе над вывучэннем пытання аб правядзенні летніх Алімпійскіх гульняў ва Украіне і Беларусі, паведамляе АіФ-Украіна.
«На маю думку, гэтая ідэя сапраўды заслугоўвае глыбокага вывучэння. Урад цяпер працуе над тым, каб вывучыць гэтую сітуацыю з розных пунктаў гледжання і прапанаваць канцэпт нашым партнёрам, калі гэтая ініцыятыва ў хуткім часе можа быць рэалізавана … Гэта важны і адказны іміджавы крок. Такія маштабныя праекты спрыяюць інфраструктурнаму абнаўленню дзяржавы, росту турыстычнай прывабнасці і нацыянальнага прэстыжу ў свеце ў цэлым», — сказаў Ганчарук на пасяджэнні Аргкамітэта па падрыхтоўцы і ўдзелу спартсменаў Украіны ў Алімпіядзе-2020 у Токіа.
Прэм'ер даручыў вывучыць вопыт Беларусі ў правядзенні II Еўрапейскіх гульняў і вопыт еўрапейскіх краін — у правядзенні Алімпіяды. А таксама выпрацаваць дакладны план у адпаведнасці конкурсным патрабаванням, устаноўленым Міжнародным алімпійскім камітэтам.
У ліпені 2019 года прэзідэнт Украіны Уладзімір Зяленскі ініцыяваў падрыхтоўку да заяўкі на правядзенне Алімпіяды.
«Нам патрэбны пэўны план, што мы, скажам, гатовыя за 3-4 гады ўсё пабудаваць, і тады можам быць у чарзе і прыняць Алімпіяду. Мы павінны быць амбіцыйнымі», — падкрэсліў тады прэзідэнт Украіны.
У верасні Аляксандр Лукашэнка прапанаваў правесці летнія Алімпійскія гульні сумесна з Украінай ці Расіяй. Паводле яго слоў, ва Украіне ёсць аб'екты футбольнай інфраструктуры, якіх не хапае Беларусі.
Летняя Алімпіяда ў 2020 годзе пройдзе ў Токіа, 2024-га — у Парыжы, у 2028 годзе ў Лос-Анджэласе. Такім чынам, найбліжэйшыя Летнія алімпійскія гульні, на якія можна падаць заяўку, адбудуцца ў 2032 годзе.
Чыноўнікі прагаварыліся, што ў Беларусі засталося толькі 8,8 мільёна чалавек? Гэта няправільная выснова5
Каментары