Жыхары аграгарадка, што будуецца ў пасёлку Коханава Талачынскага раёну, перакрылі дарогу будаўнічай тэхніцы. На такія радыкальныя меры яны пайшлі з‑за таго, што вуліцы ператварыліся ў непраходную дрыгву.
 |
Жыхары аграгарадка, што будуецца ў пасёлку Коханава
Талачынскага раёну, перакрылі дарогу будаўнічай тэхніцы. На такія радыкальныя меры яны пайшлі з‑за таго, што вуліцы ператварыліся ў непраходную дрыгву.
Сёлетняй вясной аграгарадок паплыў у літаральным сэнсе слова. У часе праверкі прадстаўнічай камісіяй упраўленьня капітальнага будаўніцтва Талачынскага райвыканкаму аказалася, што дамкі сьпехам паставілі ў самых нізкіх мясьцінах.
Абышлася нядбаласьць праектавальнікаў, замоўцаў і ўсемагчымых наглядчыкаў і правяральшчыкаў у капейчыну. Дакладную суму назваць пакуль цяжка. Вядома толькі, што давядзецца будаваць абвадны канал.
Да ўсяго будаўнікамі і землекапальнікамі былі ўшчэнт разьбітыя дарогі. Да тутэйшых жыхароў ня можа праехаць ні хуткая, ні пажарнікі, ні міліцыя, ні чыноўнікі.
Мясцовыя ўлады зьвярнулі ўвагу на пратэстоўцаў і паабяцалі, што пусьцяць будаўнічую тэхніку па іншай вуліцы.
Каментары