«Miarkuju, Makiej by ŭchvaliŭ». Aŭtar pomnika kiraŭniku MZS raskazaŭ, jakija sensy ŭkłaŭ u jaho

Niadaŭna na mahile byłoha ministra zamiežnych spraŭ Biełarusi Uładzimira Makieja źjaviŭsia zaŭvažny pomnik u vyhladzie paŭśfiery. Telehram-kanał «Kułuary» pahavaryŭ z aŭtaram manumienta, skulptaram Alaksandram Šapo.

— U čym hałoŭnaja ideja pomnika?

— Heta taki pierapynieny palot. Ziamny šar — tamu što Uładzimir Makiej pradstaŭlaŭ Biełaruś va ŭsim śviecie. Taki zrez śfiery, tamu što žyćcio čałavieka i dziaržaŭnaha dziejača rezka abarvałasia. Na zrezie namalavana karta Biełarusi i słovy Uładzimira Makieja, jakimi jon časta zakančvaŭ svaje vystupleńni: «Lublu Biełaruś».

Pavialičyć

— Pryciahvaje ŭvahu jašče i bareljef. Profil Uładzimira Makieja na paŭśfiery atrymaŭsia vielmi niestandartnym.

— My abmiarkoŭvali hetyja momanty ŭ pracesie pracy. Ja rabiŭ partret Makieja ŭ bolš žyvoj lepcy. Jon byŭ taki enierhičny, ruchomy čałaviek. I tamu vykanaŭ nie kłasičny partret, jak było pryniata ŭ 50-80-je hady XX stahodździa, a sučasny, teksturny. U im jość puls.

— I padobny.

— Tak, heta było važna. Udava hladzieła, syn hladzieŭ, jany adobryli. Dumaju, Uładzimir Makiej jak čałaviek, jaki sutykaŭsia z suśvietnaj kulturaj, taksama ŭchvaliŭ by aŭtarskaje pračytańnie pomnika.

— Niekatoryja ździŭlenyja pamierami nadmahilla — maŭlaŭ, vielmi vialikaje.

— Tamu što ja i Halina (architektarka Halina Levina — aŭtarka idei pomnika) — manumientalisty. I Makiej byŭ hłybaj, takoj manumientalnaj fihuraj.

Ale, darečy, dyjamietr śfiery ŭsiaho tolki 160 santymietraŭ. I pa vyšyni ŭsio dobra hladzicca. Mnie zdajecca, tam usio arhanična, pryhoža i estetyčna. Prynamsi, nie padobna ni da adnoj pracy, jakuju ja rabiŭ raniej.

Pomnik atrymaŭsia vyrazny, jon adpaviadaje postaci Makieja i jahonaj roli ŭ historyi krainy.

— U internecie ŭžo źjavilisia roznyja mierkavańni nakont pomnika. Jość i krytyčnyja. Jak reahujecie?

— Ja śpiecyjalist, jaki pracuje ŭ halinie skulptury ŭsio svajo žyćcio. I, miakka kažučy, mianie nie asabliva chvaluje mierkavańnie tych, chto ničoha nie razumieje ŭ hetaj vobłaści, nie rabiŭ manumientalnych tvoraŭ i nie viedaje, što takoje mova manumientalnaj skulptury. A asabistyja mierkavańni ŭ prafiesijnych pytańniach — heta hłupstva. Kali łaska, vykazvajcie svajo mierkavańnie pierad televizaram.

Ja niekalki hadoŭ byŭ ekśpiertam roznych manumientalnych savietaŭ. I mierkavańni «padabajecca-nie padabajecca» — heta drenny padychod. My hladzim pierš za ŭsio na kampazicyju, na arhaniku, na harmoniju. Ja ŭ śfiery miedycyny, bataniki ci inžynieryi nie kažu, padabajecca mnie heta ci nie, a daviarajusia prafiesijanałam. Inakš budu vyhladać durniem.

— Niekatoryja sprabujuć pryciahnuć da idei pomnika niejkija składanyja kanśpirałahičnyja teoryi…

— Ničoha pra heta nie viedaju i nie čuŭ. I mnie śmiešna, što ŭ hetym šukajuć niejkija patajemnyja sensy. Ja rabiŭ pracu z adkrytaj dušoj i čystym sercam. I z usim svaim prafiesijnym umieńniem i viedańniem spravy.

— Doŭha pracavali nad pomnikam?

— Doŭha. Eskiz my pradstaŭlali ŭ MZS dastatkova daŭno. Da ŭstanoŭki davoli šmat času prajšło.

— Viedaju, što pomnik rabiła MZS razam ź siamjoj.

— Viadoma. Heta ž byŭ zaŭvažny čynoŭnik. Zaprašali dziaržaŭnych dziejačaŭ i na adkryćcio pomnika ŭ listapadzie, da hadaviny śmierci.

<…>

Ja pradstaŭlaŭ makiet usioj kampazicyi siamji i MZS ź pienapłastu ŭ naturalnuju vieličyniu. Kab vy razumieli, nižni kamień — 2 mietry na 2.30. Heta była vializnaja proma-madel, z zachavańniem usich praporcyj, šryftoŭ.

— Niejkija asabista vašy prydumki ŭ pomniku Uładzimiru Makieju jość?

— Z maich unioskaŭ — heta maleńkaja ptušačka, jakaja siadzić na litary «J». Nibyta duša jaho prylacieŭšaja…

— Niejkija asablivyja pažadańni ad siamji byli?

— Pieršapačatkova pomnik moh być biez partreta. Ale siamja paprasiła, kab partret byŭ.

Uładzimir Makiej sam pa sabie byŭ vielmi vyraznaj piersonaj. I z punktu hledžańnia płastyčnaj vyjavy, mnie zdajecca, heta atrymałasia pieradać.

— Ź jakich materyjałaŭ zrobleny pomnik?

— Hranit i bronza. Jany najlepš stajać u biełaruskim klimacie. Na stahodździ.

• 0
• 0
• 0
• 4
• 0
• 0
• 0
• 0