Tramp pierajmianoŭvaje Mieksikanski zaliŭ, ćviorda namierany viarnuć Panamski kanał i «razumieje pačućci Rasii»

Siarod inšaha Donald Tramp zajaviŭ, što maje namier vyrašyć ukrainski kanflikt za paŭhoda: «Spadziajusia, što za šeść miesiacaŭ atrymajecca».

Što da samich pryčyn rasijska-ŭkrainskaj vajny, to jahonaje bačańnie było dastatkova blizkaje da aficyjnaha rasijskaha. 

Pavodle słoŭ Trampa, vajna va Ukrainie pačałasia, bo Bajden skazaŭ, što hetaja kraina moža ŭstupić u NATA:

«Rasija šmat hadoŭ kazała, što NATA nikoli nie zmoža ŭmiešvacca ŭ spravy Ukrainy. Heta było jak vysiečana na kamieni. A Bajden skazaŭ: nie, jany pavinny mieć mahčymaść ustupić u NATA. Tady NATA prosta na parozie ŭ Rasii. Ja mahu zrazumieć ich pačućci z hetaj nahody […]

Kali ja pačuŭ, jak Bajden viadzie pieramovy, ja skazaŭ, što heta skončycca vajnoj, i tak i akazałasia. Nichto nie viedaje pra NATA bolš, čym ja. Kali b nie ja, NATA ciapier by nie isnavała. Ja vyratavaŭ NATA, ale NATA vykarystoŭvaje nas», — zajaviŭ palityk.

Pra adnosiny Ukrainy z Rasijaj jon skazaŭ tak:

«Nasamreč ja liču, što ŭ ich była ździełka. A paśla Bajden parušyŭ jaje. U ich była ździełka, jakaja była b zdavalniajučaj dla Ukrainy i ŭsich astatnich. Ale Bajden skazaŭ: nie, vy pavinny być u stanie ŭstupić u NATA».

Siarod inšaha jon raskrytykavaŭ rašeńni Džo Bajdena, pryniatyja pierad pakidańniem pasady, pakolki jany stvarajuć «składanuju situacyju» dla novaj administracyi i robiać «usio mahčymaje, kab jaje jašče bolš uskładnić».

Što da Pucina, to jon nibyta ŭ kursie hatoŭnaści rasijskaha kiraŭnika da kantaktaŭ ź im, ale ličyć heta nieprymalnym da taho momantu, pakul nie vierniecca ŭ Bieły dom.

Tramp taksama admoviŭsia davać harantyi, što nie budzie vykarystoŭvać ekanamičnyja miery prymusu dla dałučeńnia Hrenłandyi da ZŠA. Tamu što, maŭlaŭ, hety vostraŭ važny dla Štataŭ dziela abarony ad Rasii i Kitaja.

«Ludzi navat nie viedajuć, ci maje Danija zakonnaje prava [na vostraŭ]. Ale kali tak, to jany pavinny admovicca ad jaho, tamu što jon patrebien nam dla nacyjanalnaj biaśpieki, dla abarony volnaha śvietu», — skazaŭ abrany prezident ZŠA.

Akramia taho, Tramp zajaviŭ pra płany viarnuć pad kantrol ZŠA Panamski kanał, pierajmienavać Mieksikanski zaliŭ u zaliŭ Amieryki i ŭvieści «vielmi vialikija» pošliny na impart z Kanady i Mieksiki.

Na pytańnie, ci hatovy Tramp prymianić vajennyja mietady, kab «zrabić Kanadu 51-m štatam ZŠA», jon adkazaŭ, što vajennyja nie, ale ekanamičnyja — tak.

Adnosna situacyi na Blizkim Uschodzie, to Tramp paabiacaŭ, što tam «vybuchnie piekła», kali CHAMAS nie adpuścić zakładnikaŭ da jahonaha viartańnia ŭ Bieły dom, pryznačanaha na 20 studzienia: «Kiepska budzie ŭsim».

• 5
• 6
• 9
• 49
• 0
• 3
• 11
• 0