Astapienia nazvaŭ try pamyłki biełaruskaj apazicyi

Zasnavalnik Centra novych idej, palitołah Ryhor Astapienia ŭ novym vypusku TOKu raskazaŭ, jakija asnoŭnyja pamyłki ŭ dziejnaści biełaruskaj apazicyi jon bačyć.

Pieršuju prablemu Astapienia vobrazna akreślivaje jak «nie razabralisia, dzie piedali».

«Kali siadaješ u mašynu, treba spačatku razabracca, jak pracujuć piedali. Ja dumaju, što ŭ demakratyčnaha ruchu byli peŭnyja ciažkaści z hetym», — havoryć analityk i pierachodzić da padziej 2020 hoda.

«Kali vy revalucyjanier (revalucyjanierka), treba adpaviedna pračytać nie čat analitykaŭ Cichanoŭskaj, a knižki Lenina ci Marksa, kab daviedacca, što ŭ revalucyjnaj situacyi ciśnie na haz. I zajmajsia telehrafami, mastami i hetak dalej. U revalucyjnaj situacyi treba, kaniešnie, cisnuć. Prosta, ja dumaju, šmat u čym u demakratyčnaha ruchu jość pačućcio, što revalucyjnaja situacyja prychodzić na raz-dva. (…) Jano tak nie pracuje.

Tamu, adpaviedna, kali syšła revalucyjnaja situacyja, to šmat u kaho było pačućcio, što nam treba ŭ jaje viarnucca, treba niejak sprabavać jaje pierajhrać. I heta, kaniešnie, nie pracuje. Kali ty vyjšaŭ z revalucyjnaj situacyi, ty nie možaš žyć pa tych ža praviłach».

Na pohlad analityka, vialikuju škodu nanieśli sproby eskałacyi z boku demakratyčnaha ruchu. U jakaści prykładu jon pryvodzić situacyju z paškodžańniem kaštoŭnaha rasijskaha samalota A-50, kali Azaraŭ zajaviŭ, što heta sprava ruk biełaruskich partyzan. Astapienia adznačaje, što takimi dziejańniami padstavili ludziej, jakija byli padpisany na płan «Pieramoha» («ich imia vykarystoŭvajuć dziela niejkich svaich metaŭ, jany na heta nie padpisvalisia»), u krainie ŭzmacnilisia represii. U svaju čarhu siłavyja viedamstvy atrymali dadatkovaje finansavańnie na toje, kab kupiravać pahrozy režymu.

«U suchim astatku my majem pavieličeńnie roli siłavikoŭ, udar pa ŭłasnych ludziach, udar na mižnarodnaj arenie», — reziumiruje Astapienia.

Inšy prykład — zajavy ab tym, što na Biełaruś mohuć zajści padraździaleńni biełaruskich dobraachvotnikaŭ.

«Heta naohuł dziŭna, što ŭ nas u miedyja ludzi prychodziać i havorać: «My źbirajemsia zrabić dziaržaŭny pieravarot». Kali ty źbiraješsia jaho zrabić, ty nie prychodziš u telik i nie kažaš: «Uklučajcie kamiery, zaraz u mianie budzie važnaja zajava». To-bok, usio, što ty robiš u hety momant, ty prosta pavialičvaješ biudžet siłavych viedamstvaŭ».

Druhaja pamyłka, jakuju adznačaje analityk, — heta nierazumieńnie, jak pravieści źmieny ŭ Biełarusi.

«Šyrokija ekanamičnyja sankcyi, kanstytucyjnaja reforma ad Uładzimira Pucina, narodny ŭltymatum, zachod z Ukrainy ŭ Biełaruś niejkich atradaŭ. Uvieś čas idzie jak by praces vydumvańnia niejkaj pałki-ratavałki, jakaja raptam usio źmienić. Ciapier pra order u Haahu razmovy iduć. Usio heta vielmi dziŭna. (…)

Jość proćma vidavočnych pytańniaŭ: što vy prapanujecie ludziam? Jak vy źbirajeciesia siłavikoŭ pieraciahvać na svoj bok? Pazityŭny paradak dnia, pra jaki kažuć čatyry hady, što buduć zajmacca, — im nichto nikoli nie zajmaŭsia.

U takich umovach, kali ty ŭvieś čas vydumlaješ dla siabie niejkija pałki-ratavałki, tabie dosyć składana bracca za niejkija kankretnyja kroki, jakija mohuć prynieści [karyść] tut i ciapier. Tamu što ty nibyta zajmaješsia zmahańniem z režymam i nie bačyš, što adbyvajecca».

«Demakratyčny ruch nie pryjarytyzavaŭ temu palitviaźniaŭ, tamu što jon u hety momant zajmaŭsia orderam z Haahi», — ličyć Astapienia.

Na jaho dumku, tema sankcyj i palitviaźniaŭ nie mohuć iści ŭ źviazcy:

«Kali ty chočaš vydzielić [temu] palitźniavolenych, tabie treba, kab chtości ŭziaŭ i pazvaniŭ Alaksandru Łukašenku. Nichto nie choča zvanić, kali ty ŭvieś čas kažaš, što Alaksandr Łukašenka nielehitymny. (…)

Tamu dla ludziej heta nie pryjarytet. Kali ty prychodziš na sustreču i kažaš: «U mianie tolki adna zadača — vyzvaleńnie palitviaźniaŭ», — to tady zrazumieła, što ludzi pačynajuć inakš pra heta dumać. Tady — «Okiej, davajcie budziem šukać varyjanty, jakim čynam možna heta zrabić. Možna taksama padumać pra sankcyi, jakija ź ich balučyja, jakija nie balučyja». U lubym razie — jość adna tema, jakuju ty možaš vyrašać».

Treciaj pamyłkaj analityk nazyvaje «pytańnie bolšaści».

Na jaho pohlad, kab my pabačyli niejkija ŭstojlivyja źmieny ŭnutry Biełarusi, nieabchodna, kab demakratyčny ruch mieŭ padtrymku bolšaści nasielnictva.

Zadaču demakratyčnaha ruchu analityk bačyć u zavajavańni prychilnaści asnoŭnaj masy ludziej — «niejtrałaŭ», jakija situatyŭna pierachodziać na adzin ci druhi bok u zaležnaści ad taho, jak składvajucca padziei. Pry hetym važna razumieć, što ŭ hetaj hrupy jość ułasnyja ekanamičnyja intaresy. I, naprykład, sankcyi nie mohuć być padtrymany bolšaściu, bo heta im supiarečyć:

«Biełaruś — biednaja kraina. Biełarusy nie mohuć sabie dazvolić jašče bolšaj biednaści. I tamu jany nie buduć padtrymlivać niejkija kroki, jakija buduć supiarečyć hetamu intaresu».

Hladzicie całkam: 

• 11
• 7
• 0
• 10
• 2
• 1
• 1
• 0