Viktar But adsiedzieŭ u turmie ZŠA 12 hadoŭ. U 2022 hodzie jaho abmianiali na zorku amierykanskaha baskietbołu Brytni Hrajnier. Ciapier jon viarnuŭsia da handlu zbrojaj, śćviardžaje The Wall Street Journal.
Jak piša vydańnie, žyćcio 57-hadovaha Viktara Buta natchniła na stvareńnie halivudskaha filma «Zbrojevy baron», jaki vyjšaŭ u 2005 hodzie ź Nikałasam Kiejdžam u hałoŭnaj roli.
Chto taki Viktar But
Viktar But naradziŭsia ŭ 1967 hodzie ŭ Dušanbe. Pavodle aficyjnych źviestak, słužyŭ vajskovym pierakładčykam, vałodaje francuzskaj, anhlijskaj, arabskaj, farsi i partuhalskaj movami. U 1980-ch hadach mužčyna byŭ nakiravany na dapamohu anholskim vojskam padčas hramadzianskaj vajny ŭ hetaj krainie.
Paśla raspadu Savieckaha Sajuza But nabyŭ rasijskija vajenna-transpartnyja samaloty i vykarystaŭ ich dla pieravozki miratvorcaŭ Arhanizacyi Abjadnanych Nacyj u Afryku.
Mužčyna ŭpieršyniu pryciahnuŭ da siabie ŭvahu hramadskaści paśla taho, jak u 2005 hodzie ZŠA ŭviali suprać jaho sankcyi za handal zbrojaj z byłym prezidentam Libieryi Čarlzam Tejłaram u abmien na ałmazy.
Ekśpierty AAN taksama abvinavacili jaho ŭ parušeńni mižnarodnaha embarha na pastaŭki zbroi ŭ Anhołu i Demakratyčnuju Respubliku Konha. U 2008 hodzie Buta aryštavali ŭ Tajłandzie padčas tajemnaj apieracyi amierykanskich pravaachoŭnych orhanaŭ.
U 2011 hodzie «handlar śmierciu» byŭ asudžany za zmovu z metaj zabojstva amierykancaŭ i sprobu prodažu zbroi kałumbijskim paŭstancam. Sud pryhavaryŭ jaho da 25 hadoŭ pazbaŭleńnia voli.
Kali ŭ 2022 hodzie Viktar But byŭ vyzvaleny padčas abmienu źniavolenymi, aficyjnyja asoby Biełaha doma nazvali hetaje rašeńnie ciažkim, ale adzinym sposabam vyzvalić zorku amierykanskaha baskietboła Brytni Hrajnier z rasijskaj kałonii. Jany padkreślili, što But užo adsiedzieŭ 12 hadoŭ u amierykanskich turmach.
Daradca pa nacyjanalnaj biaśpiecy Džejk Salivan zajaviŭ tady, što amierykanski ŭrad acaniŭ ryzyki vyzvaleńnia Buta i pryjšoŭ da vysnovy, što jany prymalnyja.
Viartańnie da handlu zbrojaj
Paśla vyzvaleńnia Viktar But ustupiŭ u prakramloŭskuju ŭltrapravuju partyju i ŭ 2023 hodzie atrymaŭ miesca ŭ rehijanalnym zakanadaŭčym schodzie. Zdavałasia b, jon pieraharnuŭ staruju staronku svajho žyćcia.
Adnak, kali ŭ žniŭni emisary chusitaŭ adpravilisia ŭ Maskvu, kab damovicca ab kupli aŭtamatyčnaj zbroi na sumu 10 miljonaŭ dalaraŭ, jany sustreli svajho staroha znajomaha — Viktara Buta. Pra heta vydańniu paviedamiŭ jeŭrapiejski čynoŭnik pa biaśpiecy i inšyja ludzi, znajomyja z hetym pytańniem.
Pavodle infarmacyi krynic, znajomych sa spravaj, ździełka pa prodažy strałkovaj zbroi, pasiarednikam u jakoj vystupaŭ Viktar But, była zaklučana z dvuma pradstaŭnikami chusitaŭ, jakija pryjechali ŭ Maskvu pa aficyjnaj viersii dla pakupki piestycydaŭ i aŭtamabilaŭ. Jany navat naviedali zavod Lada.
Krynicy vydańnia nie viedajuć, ci vialisia pieramovy pa ŭkazańni Kramla ci tolki ź jaho maŭklivaj zhody. Niahledziačy na toje, što chusity imknucca atrymać zbroju rasijskaj vytvorčaści, The Wall Street Journal nie zmahło vyznačyć kankretnuju krynicu płanavanych pastavak.
Pa słovach jeŭrapiejskaha čynoŭnika i inšych ludziej, znajomych z hetym pytańniem, pieršyja dźvie partyi buduć składacca ŭ asnoŭnym z aŭtamataŭ AK-74. Pieršaja partyja zbroi moža być dastaŭlena ŭžo ŭ hetym miesiacy pad prykryćciom pastavak praduktaŭ charčavańnia ŭ port Chadejda, kudy Rasija ŭžo ažyćciaviła niekalki pastavak zbožža.
Vydańnie adznačaje, što padčas pajezdki pradstaŭniki chusitaŭ abmiarkoŭvali i inšyja vidy zbroi, jakija rasijski bok moh by pradać, u tym liku supraćtankavyja rakiety «Karnet» i zienitnuju zbroju. Adnak niama dokazaŭ taho, što But udzielničaje ŭ padobnaj ździełcy.
Ńju-jorkski advakat Styŭ Zisu, jaki pradstaŭlaŭ intaresy Buta ŭ ZŠA, admoviŭsia abmiarkoŭvać z vydańniem, ci sustrakaŭsia jaho klijent z chusitami.
«Viktar But nie zajmajecca transpartnym biznesam užo bolš za 20 hadoŭ… Ale kali b rasijski ŭrad upaŭnavažyŭ jaho sadziejničać pieradačy zbroi adnamu z supiernikaŭ Amieryki, heta nie adroźnivałasia b ad taho, jak kali b urad ZŠA adpraviŭ uzbrajeńnie i zbroju masavaha paražeńnia adnamu z supiernikaŭ Rasii, jak jano zrabiła heta va Ukrainie», — skazaŭ Zisu.
Sam But u kamientary RBK nazvaŭ artykuł u The Wall Street Journal ukidam da dnia naradžeńnia Pucina.
«Što tyčycca majoj pazicyi, to jana nastupnaja — ja liču, što chusity, niahledziačy na niedastatkovaść svaich resursaŭ, davoli ŭmieła robiać svaju pracu. Jany, prynamsi za minuły hod, źbili bolš za 10 amierykanskich raźviedvalnych dronaŭ, i tak, što ŭsie handlovyja sudny, jakija naležać amierykancam abo izrailcianam majuć vialikija składanaści z prachodam u Čyrvonaje mora», — prakamientavaŭ But.
Kamientary
Jość taki biudžetny niesport - kabiečy basketboł.
I voś spadarynia Brytni ŭładkavałasia na biudžetnuju pracu ŭ RSFSR na pasadu basketbalistki. I ŭježnaje i ŭležnaje miesca było, skažu ja vam. Paskačaš ź miačykam pierad pustymi trybunami ŭ słavu Ŭralskaje Horna-Metalurhičnaje Kampanii, a tabie tłusty kavał miasa.
Ale parušyła PRAVIŁA VNUTRIEŃNIEHO RASPORIADKA ZONY praz što była ŭ RSFSR źniavolenaja.
Tym časam kirujučaj ŭ zša trackiskaj partyi spadarynia Hrajner była sacyjalna blizkaja, jak praź biudžetnaść (kamunisty lubiać kali ludzi stajuć zaležnymi lalkami-biudžetnicami) tak i praz seksualnyja husty, jakich spadarynia Hrajner nie chavała.
I dempartyja paličyła palityčna damiesnym vymieniać spadaryniu Hrajner na apisanaha ŭ artykule spadara Buta.
Jak by kamu cikava, adpišyciesia, raspaviadu pra praŭny bok handlu zbrojaj