U vyniku źniščeńnia sistemy koštam u 100 miljonaŭ dołaraŭ u USU źjavicca spryjalny «pavietrany kalidor» dla efiektyŭnaha vykarystańnia dalnabojnych kryłatych rakiet.
Pra źniščeńnie rasijskaj radyjołakacyjnaj stancyi «Niebo-M» balistyčnymi rakietami ATACMS paviedamili ŭ pres-słužbie Hienieralnaha štaba USU. Miesca ataki nie ŭdakładniajecca.
Śćviardžajecca, što heta istotna źnižaje mahčymaści rasijskaj armii pa vyjaŭleńni, supravadžeńni i pierachopu aeradynamičnych i balistyčnych celaŭ i dazvolić stvaryć spryjalny «pavietrany kalidor» dla efiektyŭnaha prymianieńnia kryłatych rakiet Storm Shadow i SCALP-EG.
«Niebo-M» — vielmi składany dla paražeńnia abjekt, jaki moža pracavać va ŭmovach aktyŭnaha radyjoelektronnaha padaŭleńnia, skanujučy haryzont u pošukach pavietranych abjektaŭ na siarednich i vialikich vyšyniach i na adlehłaści da 600 kiłamietraŭ. Adnačasova sistema moža adsočvać da 200 celaŭ.
Śćviardžajecca, što hetaja sistema, akramia balistyčnych rakiet, samalotaŭ, viertalotaŭ i bieśpiłotnikaŭ, moža vyjavić małapamiernyja i małazaŭvažnyja celi, u tym liku vykananyja pa technałohii «stełs». A chutkaść jaje razhortvańnia zajmaje ŭsiaho 15 chvilin.
Prajektavańnie sistemy pačałosia ŭ 1999 hodzie, a vytvorčaść była naładžanaja ŭ 2010-m. Na ŭzbrajeńnie «Niebo-M» była pryniataja ŭ 2012-2013 hadach. RŁS maje niekalki madyfikacyj, raźličanych na pracu ŭ mietrovym, decymietrovym i santymietrovym dyjapazonach.
Pa najaŭnaj u Hienieralnaha štaba USU infarmacyi, u rasijan zastałosia ŭsiaho 10 dziejnych sistem hetaha typu, košt kožnaj ź jakich aceńvajecca bolš čym u 100 miljonaŭ dołaraŭ ZŠA.
Kamientary