Machlary, jakija pradajuć tannyja šyny praz Instagram, rychtujucca da novaha siezona. Jak nie trapić na padman
Chutka biełaruskija aŭtaamatary buduć masava pierachodzić na zimovyja pakryški. Machlary, jakija pradajuć pakryški praz Instagram, taksama rychtujucca da novaha siezona.
Tysiačy padpisčykaŭ, pryhožyja zdymki i pryvabnyja ceny
Naviny pra toje, jak machlary pradajuć aŭtamabilnyja pakryški i dyski praz Instagram, pieryjadyčna źjaŭlajucca ŭ ŚMI pačynajučy z 2022 hoda.
Machlarskija akaŭnty zvyčajna majuć davoli vialikuju aŭdytoryju padpisčykaŭ, jakija vykonvajuć adrazu dźvie roli.
Pa-pieršaje, kali ludzi bačać, što za dziejnaściu kampanii sočyć šmat ludziej, to aŭtamatyčna pačynajuć usprymać pradaŭca jak nadziejnaha. Pa-druhoje, niaredka sami padpisčyki stanoviacca achviarami działkoŭ, jakija stajać za hetym akaŭntam.
Praanalizavaŭšy niekalki profilaŭ fejkavych pradaŭcoŭ, možna pryjści da vysnovy, što jany nahnali aŭdytoryju, dziakujučy ŭdziełu ŭ hivach (rozyhryšach) u jakaści sponsaraŭ.
Adkul biarecca aŭdytoryja?
Vynikaje, što machlary płaciać hrošy SMM-ahiencyjam abo napramuju błohieram, jaki pravodziać rozyhryšy ŭ Instagram.
Apošnija daloka nie zaŭždy zajmajucca pravierkaj sponsaraŭ, tamu ŭ śpis akaŭntaŭ, na jakija prosiać padpisacca błohiery ŭ abmien na mahčymaść vyjhrać pryzy, niaredka traplajuć profili, za jakimi stajać machlary.
Tamu, kali vy znachodzicie niejki tavar u Instagram, nie raźličvajcie na toje, što vialikaja kolkaść padpisčykaŭ = harantyja sumlennaści pradaŭca.
Pry analizie profilu varta pahladzieć, kolki razoŭ źmianiałasia nazva akaŭnta, a taksama pravieryć, ź jakoj krainy jaho viaduć.
Machlarskija akaŭnty časta źmianiajuć nazvy, a infarmacyja pra krainu pachodžańnia zvyčajna prychovanaja, što navodzić na dumku, što znachodziacca machlary nie ŭ Biełarusi.
Adšukać hetuju infarmacyju vielmi prosta — dastatkova nacisnuć na nazvu akaŭnta.
Prykmiety machlaroŭ
Taksama varta źviartać uvahu na toje, ci ŭkazany fizičny adras, a taksama kantaktnyja numary telefonaŭ. Praŭda, daśviedčanyja machlary znachodziać, što napisać u jakaści adrasa.
Naprykład, u kastryčniku minułaha hoda ŭ ŚMI pisali pra pradaŭcoŭ tannych pakryšak, jakija nibyta znachodzilisia na ŭskrainie Hrodna pa adrasie: vuł. Miaśnickaja, 3. Naturalna, što nijakaha składa z tannymi šynami ź Jeŭropy tam nie było.
«Da nas takich, jak vy, pakupnikoŭ pa 100 čałaviek na dzień pryjazdžaje. Z roznych kutkoŭ Biełarusi. Usie šukajuć tannuju humu», — adkazvali adnoj z achviar supracoŭniki šynamantažu, jaki znachodziŭsia niepadaloku.
Zvyčajna machlary viaduć usiu kamunikacyju vyklučna praz Instagram abo Telegram.
Apłacić 50 abo navat 100% cany tavaru pierad kuplaj — narmalovaja praktyka, ale machlary prosiać pieravodzić hrošy mienavita na kartku. Pryčym, niekatoryja, kab zabłytać pakupnikoŭ, prosiać zrabić heta praz ARIP, tym samym mimikrujučy pad sapraŭdnych IP abo jurasob. Ale ŭ vyniku jany ŭsio adno prosiać pieraličyć hrošy pa numaru kartki.
Jašče adzin momant, jaki vydaje machlaroŭ, — foty. Pravierka praz Google Lens pakazvaje, što heta nie ŭnikalnyja zdymki, a staryja foty, uziatyja ŭ internecie.
Ale treba razumieć, što machlary nie stajać na miescy, jany robiać rabotu nad pamyłkami i pastajanna ŭdaskanalvajucca, jak možna ŭbačyć u vypadku z ukazańniem adrasu.
Toje samaje i z fota: kab atrymlivać unikalnyja zdymki, niekatoryja prapanujuć svaje pasłuhi pa dapamozie ŭ prodažy vašych pakryšak.
Hałoŭnaje — heta cana
Hałoŭnaje adroźnieńnie sapraŭdnaha tavaru ad taho, što pradajuć machlary, — heta cana. Machlary, jak praviła, prapanujuć nabyć tavary pa cenach ad 30 da 50% ad ich realnaha koštu.
Tak, naprykład, novyja zimovyja šyny Continental WinterContact TS 850 P 225/50R17 2023 hoda vypusku ŭ machlaroŭ kaštujuć usiaho 172 rubli ($53) za štuku. U toj čas, jak u realnych pradaŭcoŭ adna takaja pakryška kaštuje ad 500 rubloŭ (kala 150 dalaraŭ).
Anałahičnaja situacyja ź zimovymi šynami Bridgestone 2024 hoda vypusku. Machlary pradajuć ich pa 168 rubloŭ (kala $50) za štuku, kali realnyja pradaŭca pa 500 rubloŭ (kala $150) za štuku.
Paraŭnaŭšy košt ź inšymi pradaŭcami, možna biespamyłkova vyznačyć, što vy kamunikujecie z machlarami. Ale, jak vyhladaje, štohod znachodzicca nie mała ludziej, jakija vierać u chvalebnyja vodhuki na staronkach machlaroŭ, vialikuju aŭdytoryju i vialikuju ŭdaču, što ŭ vas atrymajecca nabyć niešta ŭ 2-3 razy tańniej, čym jano kaštuje nasamreč.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary