Juryju Ziankoviču dadali jašče 2 hady źniavoleńnia. Ciapier jon znachodzicca ŭ SIZA KDB
Fihurant «spravy zmoŭščykaŭ» Juryj Ziankovič amal 3,5 hoda ŭtrymlivajecca ŭ źniavoleńni. Za hety čas jaho ŭžo trojčy sudzili pavodle kryminalnych artykułaŭ i pieraviali na turemny režym.
Apošni raz, u žniŭni, jaho abvinavacili ŭ «złosnym niepadparadkavańni administracyi turmy» i dadali jašče 2 hady pazbaŭleńnia voli.
Pavodle «Viasny», u źniavoleńni na palitviaźnia ŭvieś čas akazvajecca cisk: jaho šmat razoŭ źmiaščali ŭ ŠIZA, pazbaŭlali pieradač i nie dazvalali «atavarvacca». Na znak pratestu Juryj niekalki razoŭ trymaŭ haładoŭku. Akramia hetaha, u palitviaźnia surjozna pahoršyłasia zdaroŭje.
Niekalki miesiacaŭ tamu pa nieviadomych pryčynach jaho pieraviali ŭ SIZA KDB. U vieraśni pa BT vyjšaŭ film, u jakim mocna schudnieły Ziankovič raskazvaŭ pra toje, jak u 2021 hodzie nibyta chacieŭ «zachapić uładu».
Amierykanski juryst Juryj Ziankovič razam ź inšymi fihurantami «spravy zmoŭščykaŭ» byŭ zatrymany ŭ krasaviku 2021 hoda. Paśla hetaha KDB i FSB zajavili, što nibyta praduchilili zamach na Łukašenku i jahonych synoŭ, a taksama ab «raskryćci dziaržaŭnaha pieravarotu». Ziankovič — adziny ź piaci abvinavačanych pa hetaj spravie, chto zaklučyŭ ździełku sa śledstvam. Jon całkam pryznaŭ svaju vinu.
Jaho pryznali vinavatym pa č. 1 art. 357 KK (zmova z metaj zachopu dziaržaŭnaj ułady niekanstytucyjnym šlacham), č. 1 art. 361-1 KK (stvareńnie ekstremisckaha farmavańnia i kiraŭnictva im), č. 3 art. 361 KK (publičnyja zakliki da zachopu dziaržaŭnaj ułady), č. 3 art. 130 KK (raspalvańnie sacyjalnaj varožaści). U vieraśni 2022 hoda Juryju pryznačyli 11 hadoŭ kałonii va ŭmovach uzmocnienaha režymu.
Praz try miesiacy palitviaźnia sudzili ŭžo pa novaj kryminalnaj spravie. Ziankoviča abvinavačvali ŭ «abrazie pradstaŭnika ŭłady» (art. 369 KK). Padstavaj dla hetaha stali «abraźlivyja kamientary ŭ telehram-kanale, pryznanym ekstremisckim». U śniežni 2022 hoda sud Miadziela dadaŭ jamu jašče paŭhoda źniavoleńnia.
Termin palitviazień spačatku adbyvaŭ u babrujskaj kałonii №2. Administracyja kałonii prymušała palitviaźnia vynosić viodry z ekskremientami i myć prybiralniu, a kali toj admoviŭsia — adpraŭlali ŭ ŠIZA. Palitviazień tady abviaščaŭ haładoŭku. Paźniej Juryju ŭzmacnili pakarańnie i pavodle rašeńnia babrujskaha suda pieraviali na turemny režym u Mahiloŭ.
Pa infarmacyi pravaabaroncaŭ «Viasny», u mahiloŭskaj turmie №4 jaho pazbavili pieradač, taksama jamu nielha było mieć hrošy na rachunku dla «atavarki». Da Juryja znoŭ pastajanna čaplałasia administracyja i doŭhi čas utrymlivała jaho ŭ ŠIZA. Praz heta palitviazień abjaŭlaŭ niekalki razoŭ haładoŭki. Aproč usiaho, jon moh kamunikavać tolki sa śviatarom. Advakata da jaho nie dapuskali z sakavika 2024 hoda.
«Ciabie b baćka praklaŭ»: maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary