U Kamiency samakatčyk zarubiŭsia ź milicyjanieram. Praź niekalki tydniaŭ u chłopca znajšli dziciačaje porna i padpiski na «ekstremizm»
«Kali tabie robiać zaŭvahu, na jaje treba adreahavać narmalna, adekvatna. A nie ŭklučać niejkaha tam rejndžara, uciakać pa dvarach» — «Ščyra vam skažu, ja siońnia niejak nie ŭ nastroi. Tamu i nie chacieŭ spyniacca».
Miesiac tamu ŭ Kamiency adbyŭsia vypadak: chłopiec jechaŭ na samakacie pasiarod darohi, što nie spadabałasia milicyjanieru.
Videa svajoj razmovy z kapitanam milicyi chłopiec vykłaŭ u internet. Milicyjanier u davoli spakojnaj formie tłumačyć maładzionu, što na elektrasamakacie možna ruchacca tolki pa tratuarach albo viełasipiednych i piešachodnych darožkach.
Chłopiec sprabavaŭ davieści, što ŭ jaho nie było mahčymaści jechać pa tratuary, bo tam vysokija bardziury.
Hetyja słovy ździvili milicyjaniera. Jon zaŭvažyŭ, što spyniŭ chłopca jakraz u tym rajonie, dzie novyja tratuary z «cudoŭnymi źjezdami, zajezdami», prystasavanyja dla zajezdaŭ z kalaskami, viełasipiedami, samakatami.
«Za vas pradumali, kab vy nie leźli na darohu, — zaŭvažaje kapitan i dadaje, što chłopiec dazvoliŭ sabie jechać pa centralnaj vulicy horada pasiarod darohi:
— Kali na tratuary budzie jama, jakuju ty nie možaš abyści ci pierajechać, tolki tady ty možaš vyjści na darohu na adlehłaść nie bolš za adzin mietr ad jaje kraju. A nie jechać pasiarod darohi».
U Biełarusi, u adroźnieńnie ad mnohich inšych krain, padychod nasamreč taki — viełasipiedystaŭ i samakatčykaŭ sprabujuć zahnać na tratuar da piešachodaŭ i nie puskać na darohu da aŭtamabilistaŭ.
Milicyjanier taksama zaŭvažyŭ, što na zaŭvahi supracoŭnika milicyi «treba reahavać, a nie prybaŭlać hazu i sprabavać schavacca».
Chłopiec nie pahadžaŭsia: «Ja nie chavajusia. Ja jedu kudy mnie treba».
«Ty bačyš, što pierad taboj čałaviek u formie, sa zbrojaj. Supracoŭnik milicyi. I jon kaža tabie «Spyniciesia». A ty što robiš?»
Chłopiec adkazaŭ, što nie choča spyniacca i spytaŭ, ci jość zakonnyja patrabavańni, kab jaho spynić.
Pa słovach milicyjaniera, takim zakonnym patrabavańniem źjaŭlajecca imknieńnie spynić pravaparušeńnie, jakoje zaklučajecca ŭ parušeńni Pravił darožnaha ruchu — ruchu pa prajeznaj častcy pry najaŭnaści tratuara.
Milicyjanier papiaredziŭ, što zdymie zapisy ź videakamier pa maršrucie ruchu samakatčyka i pryhraziŭ nastupstvami.
«Kali tabie robiać zaŭvahu, na jaje treba adreahavać narmalna, adekvatna. A nie ŭklučać niejkaha tam rejndžara, uciakać pa dvarach», — znoŭ nahadaŭ kapitan.
«Ščyra vam skažu, ja siońnia niejak nie ŭ nastroi. Tamu i nie chacieŭ spyniacca. Ja paśla balničnaha», — adrezaŭ samakatčyk.
«A kaho heta pavinna chvalavać? Voś ciabie sabje čałaviek. Siadzie ŭ turmu. Ty zastaniešsia invalidam, tamu što ŭ ciabie «niama nastroju». Ty suvymiaraj trochi — nastroj i niebiaśpieku dla žyćcia», —
zaŭvažyŭ milicyjanier i pasprabavaŭ skončyć razmovu:
«Usio, idzi. Papraŭlaj nastroj. Na zaŭvahi treba reahavać. Na pieršy raz ja maju prava tabie vusna zrabić zaŭvahu i nie pryciahvać da adkaznaści. [Kali] nastupnym razam ad ciabie ŭbaču takuju jazdu pa darohach, dzie jość narmalnyja tratuary, pa jakich možna jechać narmalna, ty budzieš pryciahnuty da adkaznaści».
Ale na hetym razmova nie skončyłasia. Samakatčyk znoŭ staŭ śćviardžać, što tam, dzie jon jechaŭ, niama mahčymaści zajechać na tratuar. A milicyjanier praciahnuŭ śćviardžać, što tam jość skosy i novy tratuar. Dyjałoh praciahvaŭsia jašče niekalki chvilin.
«Usio, my možam doŭha spračacca z hetymi bardziuram. I jašče raz kažu — na zaŭvahi supracoŭnika milicyi treba reahavać. I kali tabie havorać spynicca, to treba spynicca», — pasprabavaŭ skončyć razmovu kapitan.
«A kali ja nie chaču spyniacca. Što mnie rabić?», — nie supakoiŭsia samakatčyk.
«Padumać pra nastupstvy taho, što ty nie chočaš niečaha rabić. Va ŭsiaho jość nastupstvy. Navat kali jany dla ciabie nie vidavočnyja. I jany ŭrešcie nastupiać», — adkazaŭ milicyjanier i paraiŭ chłopcu pahladzieć videa ŭ internecie, dzie pakazana, čym moža skončycca takaja niebiaśpiečnaja jazda.
U kancy videa chłopiec demanstruje listok niepracazdolnaści na imia Siamiona Hrycuka, jaki paćviardžaje, što chłopiec byŭ na balničnym z 11 pa 16 vieraśnia 2024 hoda.
Vidae chłopiec vykłaŭ u adnoj z sacyjalnych sietak i paŭdzielničaŭ u jaho abmierkavańni. «Pavahi nul za maje ž padatki» — vykazaŭ svaju pazicyju chłopiec.
Padobnaja razmova ŭ kancy 2010-ch, kali siłaviki sprabavali paviarnucca tvaram da ludziej, mahła b skončycca abmierkavańniem u internecie. Ale na dvare 2024 hod, kali represiŭny aparat adčuŭ usiedazvolenaść.
Jak paviedamili prałukašenkaŭskija telehram-kanały, da chłopca pryjšli. Śćviardžajecca, što jon «adhrob kuču administratyvak i značnyja štrafy».
Ale i na hetym sprava nie skončyłasia. U telefonie 24-hadovaha samakatčyka milicyjaniery nibyta znajšli «kuču padpisak» na ekstremisckija kanały i dziciačuju parnahrafiju.
U jakaści dokazu pryvodzicca zabluranaje videa z telefonam, dzie vidać śpis kantaktaŭ i padpisak telehrama. Siarod ich i niejki kanał, dzie raźmieščana videa dla darosłych. Ci byŭ na jaho padpisany chłopiec, niezrazumieła. Jak i toje, ci pierasyłaŭ jon kamuści padobnyja videa.
Što za «ekstremisckija kanały», taksama niezrazumieła. Siłaviki pakazali ekran telefona z nadpisam pra toje, što niejki materyjał zabłakavany na terytoryi Biełarusi.
Dzie znachodzicca ciapier Siamion Hrycuk i što jamu inkryminujecca, siłaviki nie paviedamlajuć.
U Kamiancy mužčyna zasnuŭ prosta na prajeznaj častcy. Jaho nichto nie moh pabudzić
Pad Astraŭcom 57-hadovaja žančyna na elektrasamakacie ŭrezałasia ŭ aŭtamabil
U Mahilovie zrabili niezvyčajny tratuar
U Minsku kurjer na elektrasamakacie ŭciakaŭ ad DAI — VIDEA
Padletki katalisia ŭčatyroch na adnym samakacie. Milicyja znajšła videa i pryjšła da ich u kaledž
Kamientary
Chočieš zvoni po niemu, chočieš podpisyvaj na luboj kanał i stroči kommientarii.
Biez problem na vaš tielefon, ot vašieho imieni podpisaťsia na nužnyj kanał biez vašieho viedoma i iz vašieho akkaunta, kak i nastročiť nužnych kommientarijev.
A možno i jeŝio proŝie, otobrať u vas tielefon, razbłokirovať jeho, ustanoviť tielehram jeśli nie ustanovlen, podpisať na nužnyj kanał hladia vam v hłaza, napisať kommientarii i diełať s vami vsio, čto duša krasauca požiełajet.
Nie važna ni data, ni vriemia, ni hdie vy byli.