Na papiarednich vybarach jon sabraŭ usiaho 3% hałasoŭ.
Na vybarach prezidenta Šry-Łanki pieramohu atrymaŭ apazicyjny deputat parłamienta Anura Kumara Dysanajakie. Jon źjaŭlajecca lidaram partyi Narodny front vyzvaleńnia, jakaja aficyjna prytrymlivajecca marksiscka-leninskaj ideałohii, piša Radyjo Svaboda.
Pavodle danych vybarčaj kamisii Šry-Łanki, Dysanajakie atrymlivaje kala 42% hałasoŭ, apiaredžvajučy inšaha apazicyjaniera Sadyta Premadasu z 32% i dziejnaha prezidenta Raniła Vikramasinhchie, jaki nabraŭ 17%. Vikramasinhche ŭžo pryznaŭ svaju parazu.
Na papiarednich vybarach Dysanajakie nabraŭ usiaho 3% hałasoŭ.
Adnak u 2022 hodzie Šry-Łanka sutyknułasia z mahutnym ekanamičnym kryzisam. Masavyja pratesty tady pryviali da ŭciokaŭ z krainy i adstaŭki prezidenta Hatabai Radžapaksy. Vikramasinhchie, jaki tady pryjšoŭ da ŭłady, pravodziŭ balučyja reformy.
Dysanajakie pabudavaŭ svaju kampaniju na abiacańniach baraćby z karupcyjaj.
U chodzie kampanii, jak adznačajuć naziralniki, jon admoviŭsia ad radykalnych łozunhaŭ, zajaviŭšy, što praciahnie supracoŭnictva ź Mižnarodnym valutnym fondam i nie budzie abjaŭlać defołt, a pasprabuje damovicca ab rekanstrukcyi doŭhu i pryciahnieńni inviestaraŭ. Jon paabiacaŭ zmahacca ź biednaściu i sacyjalnym rassłajeńniem.
Marksiscka-leninskija partyi vałodajuć paraŭnalna vialikaj papularnaściu ŭ šerahu krain Azii — akramia krain, dzie Kampartyi aficyjna źjaŭlajucca viadučymi siłami, havorka idzie i ab parłamienckich demakratyjach, u pryvatnaści ab Indyi i Niepale. U Niepale Kamunistyčnaja partyja znachodzicca va ŭładzie.
U Mahilovie mužčyna adbivaŭsia ad hubazikaŭcaŭ nažom
Kamientary