«Paśla repietycyj płača pa načach». Śpiavačka Asijat Sajhidava syhraje Rahniedu ŭ rasijskaj etna-opiery z Šamanam
Opieru pra kniazia Uładzimira stavić hałoŭny cenzar rasijskaj kultury. Adnoj z hałoŭnych hieraiń stanie połackaja kniazioŭna Rahnieda.
U lutym u Kramloŭskim pałacy adbudziecca premjera etna-opiery «Kniaź Uładzimir» aŭtarstva čynoŭnika administracyi Pucina Siarhieja Novikava i kampazitara Ihara Maćvijenki. Hałoŭnuju rolu vykanaje Shaman, źjavicca ŭ opiery i połackaja kniazioŭna Rahnieda — jaje syhraje maładaja rasijskaja śpiavačka Soja.
Asijat Sajhidavaj 21 hod, jana naradziłasia ŭ Sarataŭskaj vobłaści, muzyčnuju adukacyju atrymlivała ŭ Maskvie. Psieŭdanim Soja jana prydumała nie ŭ honar bobu, a prosta častkova skryžavaŭšy imia i proźvišča — atrymałasia padobna da ptuški.
«Padumała, što «sojka» — heta piavučaja ptuška, i ja taksama piavučaja ptuška. Čamu b nie? Heta vielmi znajomaje słova, tamu, tak, ja — ptuška. Ja nie bob», — raskazvała śpiavačka.
Viadomaj artystkaj Soju nazvać składana, vy naŭrad ci čuli jaje pieśni, choć pijarščyki opiery nazyvajuć jaje ŭzychodziačaj zorkaj. Na instahram śpiavački padpisanyja amal 100 tysiač čałaviek.
Asijat Sajhidava ŭdzielničaje ŭ prajekcie ŭžo niekalki hadoŭ. Pa słovach pradziusara, Soi emacyjna nialohka dajucca repietycyi ŭ roli Rahniedy.
«Paśla kožnaj repietycyi Soja adychodzić pa dva dni. Płača pa načach, tamu što prapuskaje ŭsio praź siabie, vielmi mocna pieražyvaje», — raskazaŭ Maćvijenka «Iźviestijam».
Sama śpiavačka tak adhukajecca pra Rahniedu:
«Za niekalki hadoŭ, jakija prajšli z momantu pačatku majoj pracy nad prajektam, heta stała ŭžo častkaj mianie. Maja hierainia Rahnieda — krutaja dziaŭčyna. Mocnaja, piaščotnaja i ranimaja. Ja navat trochi stała atajasamlivać siabie ź joj».
Pa słovach Maćvijenki, nad etna-opieraj «Kniaź Uładzimir» pracujuć užo dziesiać hadoŭ. Rasijskija ŭłady ličać hety prajekt važnym. Režysioram opiery vystupaje načalnik upraŭleńnia hramadskich prajektaŭ administracyi prezidenta Siarhiej Novikaŭ. Hetaha čałavieka nazyvajuć hałoŭnym cenzaram rasijskaj kultury, mienavita jon, jak ličycca, składaje čornyja śpisy artystaŭ i kuryruje «admienu» dy pieraśled niepažadanych uładam dziejačaŭ kultury.
Akciorski skład padabrali adpaviedny. Rolu kniazia Uładzimira atrymaŭ hałoŭny Z-śpiavak Jarasłaŭ Dronaŭ, viadomy pad psieŭdanimam Shaman. Jašče adzin adept Pucina i vajny lidar hurta «Lube» Mikałaj Rastarhujeŭ syhraje Fiodara Varaha, jakoha nazyvajuć «pieršym na Rusi chryścijanskim pakutnikam».
Źjavicca ŭ pastanoŭcy i Maćvijenka — jamu dastałasia rola vandroŭnika, jaki akazvajecca skandynaŭskim boham Odzinam. Chareahrafiju stavić Iłza Lijepa — baleryna, jakuju pazbavili litoŭskaha hramadzianstva za publičnuju padtrymku Pucina. Darečy, košt pastanoŭki acanili ŭ 40 młn rasijskich rubloŭ (447 tysiač dalaraŭ). 29 młn (325 tysiač dalaraŭ) vydzieliŭ adzin z pucinskich fondaŭ.
Aŭtary śćviardžajuć, što siužet budzie hruntavacca na «Apovieści minułych hadoŭ», inšych krynicach i mastackich tvorach. Abiacajuć pakazać «evalucyju piersanažaŭ, ich baraćbu z zahanami i zdabyćcio viery».
«U pačatku dziejańnia Uładzimir pradstaŭleny jak jašče nie sfarmavany svavolny junak, ale zatym, pieražyvajučy zdrady i straty, jon duchoŭna źmieńvajecca i prychodzić da Boha, da razumieńnia kaštoŭnaści sapraŭdnaj lubovi», — havorycca ŭ sinopsisie.
Jakim čynam u opiery pakažuć viadomuju kožnamu biełaruskamu školniku trahičnuju historyju Rahniedy i Uładzimira, pakul niezrazumieła — padrabiaznaści siužetu trymajuć u tajamnicy. Viadoma, što apaviadańnie pačniecca ŭ varažskich ziemlach, adkul Uładzimir rušyć na vajnu z bratam Jarapołkam. Zavieršycca ŭsio chryščeńniem Rusi.
Uryvak opiery letaś upieršyniu pakazvali na fiestyvali ŭ anieksavanym Krymie.
Kamientary
Zhvałciŭ Rahniedu na vačach baćkoŭ, paśla zabiŭ ich i bratoŭ Rahniedy.
Nu jak pakažuć, užo trochi možna praduhadać: ««U pačatku dziejańnia Uładzimir pradstaŭleny jak jašče nie sfarmavany svavolny junak, ale zatym, pieražyvajučy zdrady i straty, jon duchoŭna źmieńvajecca...»
Nie kryminalnik, a hetaki "paviesa-bałaŭnik", u pačatku duchoŭnaha pošuku. Nikoli nie razumieŭ, jak heta vyrulivajuć dla siabie tyja, chto jaho ličyć śviatym.
Chacia varta pahladzieć, kali Rastarhujevu vybjuć adno voka i raspnuć na drevie.