«Na žal, miescaŭ niama». Niahledziačy na chejt u internecie, na «CharčFest» z Buzavaj u Lidzie — ažyjataž
Biełarusy krytykujuć lidski «CharčFest» u internecie, ale, zdajecca, jon usio ž źbiare niamała hledačoŭ. U haścinicy «Lida» ŭžo niama svabodnych miescaŭ. Mnohija kvatery na sutki zaniatyja, a na astatnija ceny vyraśli ŭ niekalki razoŭ. Hrodna.life pravieryŭ, ci jość ažyjataž na žytło ŭ Lidzie pierad pryjezdam Volhi Buzavaj i ci možna paraŭnoŭvać jaho z ažyjatažam minułych fiestyvalaŭ.
«CharčFest» projdzie ŭ Lidzie 31 žniŭnia zamiest viadomaha ŭ minułym fiestyvala Lidbeer. Na jaho raniej pryjazdžali dziela biełaruskaha, ruskaha i ŭkrainskaha roku i viasiołaj atmaśfiery. Ale ŭ Lidskaha rajvykankama ŭłasnaje bačańnie.
Śviata sioleta prymierkavali da Dnia horada i dadali «kałarytu»: vystupleńni kalektyvaŭ z rasijskij haradoŭ-pabracimaŭ, ideałahična vyvieranyja placoŭki i hučny słohan «V Lidie vsie v łučšiem vidie!»
Kamientatary: «Pačakaju, kali stanie Baćkafestam»
«Heta toje, što my zasłuhoŭvajem?», — pacikaviŭsia Jaŭhien u kamientarach pad navinoj ab tym, što ŭ Lidu na «CharčFest» jedzie Volha Buzava. Z bolš čym 30 kamientaroŭ pad publikacyjaj u Instagram znajšoŭsia tolki adzin niejtralny: «Tyja, chto pišuć, što nie pajeduć. Vy ličycie, što chtości zasmucicca ad hetaj infarmacyi?», — napisała Maryna. Stanoŭčych vodhukaŭ niama zusim.
U biełarusaŭ u sacsietkach bolš za ŭsio niehatyvu ŭ suviazi z novym fiestyvalem u Lidzie vyklikali dva momanty. Pieršy — chedłajnier fiestyvalu Volha Buzava. Jašče ŭ 2017 hodzie śpiavačka naviedvała anieksavany Rasijaj Krym, paśla vykazvałasia ŭ padtrymku Pucina, a ŭ 2022 hodzie padtrymała vajnu Rasii suprać Ukrainy. U vyniku Buzava trapiła ŭ sankcyjny śpis Ukrainy.
Druhoje, što niepryjemna ździviła, — nazva fiestyvalu. Adny adznačyli, što słova «charč» vyklikaje nie zusim pryjemnyja asacyjacyi, źviazanyja ź plaŭkom. Inšyja, iranizujučy, prapanavali ŭ nastupnym hodzie dadać śviatu jašče bolš «dziaržaŭnaści», nazvaŭšy jaho «Sielhascharčfest» abo «Biełkaapsajuzfest». «Pačakaju, kali stanie Baćkafestam», — napisaŭ Viktar.
Za noč u hateli — «dvajnaja cana». Ale miescaŭ u dzień fiestyvalu ŭsio roŭna niama
Akazałasia, što niehatyŭna da «CharčFestu» nastrojeny daloka nie ŭsie biełarusy. I ŭ apošni dzień leta ŭ Lidzie moža być šmatludna. Hrodna.life pastaraŭsia znajści svabodnaje žytło na čas praviadzieńnia fiestyvalu. U haścinicy i kvatery my źviartalisia pad vyhladam patencyjnych klijentaŭ.
U haścinicy «Lida» ŭ centry horada z 29 žniŭnia pa 1 vieraśnia zabraniravać numar nielha. Usie astatnija dni dastupnyja, košt numaroŭ pačynajecca ad 62 rub.
U spartyŭna-haściničnym kompleksie «Lida drajv», što ŭ šaści kiłamietrach ad centra horada, svabodnyja numary jość tolki z 30 pa 31 žniŭnia — na 1 vieraśnia ŭžo ŭsio zaniata. Za pražyvańnie ŭ śviaty «dvajny košt», paviedamlaje haspadar Maksim. Dvuchmiesny numar kaštuje 180 rub., trochmiesny — 192 rub.
Kvater zastałosia mała, cana — ad 100 da 250 rub.
Na servisie «Ariendodom», jaki prapanuje kvatery na sutki pa ŭsioj Biełarusi, jość tolki dva varyjanta ŭ Lidzie — za 70 i 90 rub. Pry anłajn braniravańni daty, jakija nas cikaviać, — svabodnyja. Ale pry asabistaj pierapiscy z ahientam nam adkazali, što «na žal, volnych kvater niama».
Na sajcie Realt.by jość adrazu niekalki varyjantaŭ za 70 rub. ad haspadyni Dzijany. «Usio zaniata», — adkazvaje haspadynia.
Svabodnaje žytło atrymlivajecca znajści na sajcie Kvartiranasutki.by, ale tolki z treciaj sproby. Sutki ŭ kvatery na vulicy Tuchačeŭskaha abyducca ŭ 100 rub.
Na «Kufar» z 30 žniŭnia pa 1 vieraśnia dastupnyja šeść varyjantaŭ, koštam ad 45 da 60 rub. Praŭda, pry sprobie braniravańnia, cana rezka ŭzrastaje. Naprykład, u kvatery za nibyta 40 rub., adna noč abydziecca ŭžo ŭ 110 rub. Samy darahi varyjant — na praśpiekcie Pieramohi. Kvatera za 60 rub. sutki ŭ śviatočnyja dni kaštuje 250 rub.
Za šeść hadoŭ ceny ŭpali ŭ dva razy
Fiestyval Lidbeer prachodziŭ u Lidzie z 2015 pa 2019 i ŭ 2023 hodzie. Open-ejr staŭ vizitnaj kartkaj horada — pasłuchać viadomyja rok-hurty pryjazdžali z usioj krainy.
Samymi papularnymi byli fiestyvali ŭ 2017−2019 hadach. Tady braniravać žytło treba było za miesiacy da śviata. Tyja, kamu paščaściła mienš, zastavalisia ŭ kiempinhach abo byli vymušany źjazdžać ź Lidy pozna ŭviečary paśla kancertu.
U 2018 hodzie, kali chedłajnieram staŭ hurt «Leninhrad», numary ŭ haścinicach «Lida» byli zabraniravany za dva miesiacy da fiestyvalu, pisaŭ «Viačerni Babrujsk». Dvuchmiesny numar kaštavaŭ $60 — zaraz adna noč u standartnym numary abyšłasia b u $19. U dołarach cana ŭpała ŭ dva razy, a ŭ rublach — u try.
Cana kvatery na sutki ŭ centry horada pačynałasia tady ad $120 i dasiahała $200, adznačaŭ TUT.BY. Sioleta cana žytła za adnu noč varjirujecca ad $30 da $80.
U 2019 hodzie, kali ŭ Lidzie vystupali «Splin» i «Čajf», miesca ŭ haścinicach razabrali jašče napačatku hoda, a arenda kvater padaražeła sa zvyčajnych $30−35 da $180−200.
Dabracca ź Minska ŭ Lidu prablematyčna, z Hrodna — lohka
U lepšyja hady fiestyvalu Lidbeer byli prablemy i z tym, kab uviečary vyjechać z horada. Naprykład, u 2018 hodzie hości, jakija pryjechali na svaich mašynach, stajali ŭ paŭtarahadzinnym zatory.
Składana acanić, kolki ludziej pryjedzie słuchać Buzavu na svaich aŭto. Ale možna pahladzieć, jak raskuplajucca bilety na maršrutki ŭ Lidu na dzień fiestyvalu.
Na sajcie ahrehatara «Atłas» biletaŭ pa maršrutu Minsk — Lida zastałosia niašmat. 30 žniŭnia svabodnyja miescy jość da 10 ranicy. Bilety na ŭsie nastupnyja rejsy raskupleny. Na 31 žniŭnia biletaŭ niama ŭvohule. Nazad ź Lidy ŭ Minsk na 1 vieraśnia ŭsie miescy ŭ «Atłasie» razabranyja.
Situacyja pa maršrutu Hrodna — Lida vyhladaje inakš: i na 30, i na 31 žniŭnia šmat dastupnych biletaŭ. Ahrehatar nie daje infarmacyju pra rejsy na vierasień, ale na sajcie Infobus.by bilety Lida — Hrodna na pieršy dzień vosieni dastupnyja.
Byŭ Lidbeer, a stali «Dažynki»
U pieryjad roskvitu Lidbeer jaho naviedvali da 120 tys. čałaviek, na placoŭkach pracavali amal 200 handlovych kropak, a samo śviata štohod pavialičvałasia ŭ haściach na 20−40%.
Hałoŭnym punktam była scena la Lidskaha zamku — u roznyja hady na joj vystupali Neuro Dubel, «Krambambula», Nizkiz, J:MORS, «Bi-2», «Okiean Jelzi», «Splin», «Čajf» dy inšyja.
Za paŭtara tydnia da praviadzieńnia «CharčFestu» Lidski rajvykankam apublikavaŭ padrabiaznuju prahramu śviata. I jana bolš padobnaja da čarhovych «Dažynak», čym na fiestyvali minułych hadoŭ.
Hałoŭnyja mierapryjemstvy razharnucca na Dažynačnaj płoščy — raspačniecca ŭsio z kancertnaj prahramy lidskich kalektyvaŭ i «haściej z haradoŭ-pabracimaŭ Rasijskaj Fiederacyi». Padčas śviata ŭznaharodziać najlepšych supracoŭnikaŭ pradpryjemstvaŭ rajona i razyhrajuć siarod lidčan siem televizaraŭ.
Paśla nievialikaha pierapynku na scenu vyjduć kavier-hrupy ź Minska i Hrodna. Zaviaršycca ŭsio vystupleńniem Volhi Buzavaj, fiejervierkam i bitvaj dydžejaŭ.
Kamientary