Što aznačaje dla Biełarusi adziny rynak enierharesursaŭ z Rasijaj?
Dniami Uładzimir Pucin rasparadziŭsia padpisać damovu ab abjadnanym enierharynku Biełarusi i Rasii. Spytali ŭ ekanamista, što staić za hetymi pahadnieńniami.
Viartańnie da starych damoŭ
Ekśpiert BEROC Źmicier Kruk adrazu źviartaje ŭvahu na toje, što havorka idzie nie pra fakt padpisańnia dakumienta, a tolki pra hatoŭnaść jaho padpisać. Inšy niuans — u dakumiencie havorycca pra adziny rynak tolki elektraenierhii, a nie pra całkam ahulny enierharynak (jaki ŭklučaje taksama naftu z hazam).
Ekanamist nahadvaje, što jašče ŭ damovie ab JEAES byŭ zaćvierdžany termin stvareńnia adzinaha abjadnanaha rynku elektraenierhii va ŭsim JEAES — da 1 lipienia 2019 hoda.
«Potym terminy ssunulisia, a zatym zabylisia. Paźniej hetyja pytańni pierajšli ŭ šerahi dvuchbakovych adnosin pamiž Biełaruśsiu i Rasijaj u ramkach tak zvanaj Sajuznaj dziaržavy.
U dekrecie ad 2021 hoda ab pahłyblenaj intehracyi znoŭ byli zaćvierdžanyja novyja terminy stvareńnia asobnych enierharynkaŭ: elektraenierhii, haza, nafty i naftapraduktaŭ (adziny rynak elektraenierhii musiŭ zapracavać z 1 studzienia 2024 hoda, ale terminy znoŭ ssunuli — NN).
Ciapier u pucinskim ukazie havorka idzie mienavita ab rynku elektraenierhii», — adznačaje Kruk.
Žadańnie adno — atrymlivać resursy pa ŭnutryrasijskich cenach
Adziny rynak elektraenierhii — tolki pieršy krok u hetych pahadnieńniach, bo najbolš važny punkt dla Łukašenki — rynak hazu. Tyja źnižki na haz, jakija ciapier atrymlivaje režym, najbolš istotnyja dla padtrymki ŭstojlivaści ekanomiki Biełarusi.
«Adziny rynak enierhanośbitaŭ ułady razhladajuć jak sinonim adnolkavych cen na haz i naftu. Tamu pad stvareńniem niejkaha ahulnaha rynku pa fakcie chavajecca tolki adno žadańnie — atrymlivać resursy pa ŭnutryrasijskich cenach», — ličyć Kruk.
Vychad na adziny rynak takim čynam musić dadać stabilnaści, bo ciapier Biełarusi kožnyja dva hady davodzicca vybivać źnižki, a pry stvareńni adzinaha rynku enierhanośbitaŭ cana zastavałasia b nizkaj pa zmoŭčańni.
Tamu hałoŭnym inicyjataram padobnych pahadnieńniaŭ, pa słovach ekanamista, źjaŭlajecca mienavita biełaruski bok, jaki ŭsio zaćvierdziŭ jašče 27 listapada 2023 hoda.
«Jany śpiašalisia stvaryć adpaviednuju zakanadaŭčuju bazu, kab heta zapracavała da 2024 hoda, ale rasijski bok tolki ciapier paviedamiŭ, što hatovy padpisać damovu».
Z ulikam usich akaličnaściej, ekanamist miarkuje, što havorki pra niejki praryŭ iści nie moža.
«Rasiejcy pakul tolki vykazvajuć namier ab tym, što jany hatovyja vykanać svaje abaviazki, jakija padpisali faktyčna jašče ŭ 2021 hodzie».
Ekśpiert źviartaje ŭvahu, što rasiejcy praciahvajuć praźmierna zaciahvać terminy. Jany vykarystoŭvajuć hetuju vudačku dziesiacihodździami, kab ciahnuć Biełaruś u svaju arbitu.
«A ŭ biełaruskaha boku nie šmat pola dla manieŭru, tamu jany praciahvajuć čakać. Jany siadziać ubaku i faktyčna prosta nazirajuć za tym, ci vykanaje Rasija tyja abiacanki, jakija na siabie ŭziała».
Ekanamist adznačaje, što ŭsie hetyja kroki choć i dazvalajuć režymu ŭtrymlivać ekanomiku ŭ bolš-mienš prymalnym stanie, robiać Biełaruś usio bolš zaležnaj ad Rasii.
Praz hetuju zaležnaść Biełaruś vymušana iści tolki pa toj ściežcy, jakuju paznačaje Rasija.
Pamiatajecie pravakatara i danosčyka Jaŭhiena Kakojtu? Jon ciapier taksama palitviazień13
Kamientary