Žančynu-mera na Filipinach abvinavačvajuć u špijanažy na Kitaj. Vyśvietliłasia, što jana nie taja, za kaho siabie vydavała
Niezvyčajnaja špijonskaja historyja jak napamin pra toje, jakimi składanymi mohuć być hulni śpiecsłužbaŭ. Adkryłasia, što žančyna pryjechała na Filipiny z baćkami-kitajcami, kali pa dakumientach była jašče padletkam. I była źviazana sa złačynnaj supolnaściu, jakaja ŭ tym liku rabiła płastyčnyja apieracyi nielehalnym mihrantam.
Elis Lił Huo (Alice Leal Guo) u 2022 hodzie pieramahła na vybarach mera horada Bamban (nasielnictva kala 80 tysiač) na poŭnač ad stalicy Filipin Maniły ŭ pravincyi Tarłak.
U sakaviku 2024 hoda joj vystavili adrazu niekalki abvinavačańniaŭ. Siarod ich vykarystańnie padroblenaha paśviedčańnia asoby, špijanaž na karyść Kitaja i prynaležnaść da sindykata filipinskaha afšornaha ihralnaha apieratara (POGO).
Usio pačałosia z taho, što śledčyja vyjavili, što Huo źjaŭlajecca ŭładalnicaj ziamielnaha ŭčastka, na jakoj raźmieščana anłajn-kazino sietki POGO (Philippine Offshore Gambling Operator — Filipinski afšorny apieratar azartnych hulniaŭ).
Nasamreč, za šyldaj kazino chavaŭsia centr anłajn-machlarstva. U sakaviku minułaha hoda ŭłady praviali rejd na abjekt i vyzvalili kala 700 rabotnikaŭ, u tym liku 202 hramadzian Kitaja i 73 inšych zamiežnikaŭ, jakich prymušali vydavać siabie za internet-paluboŭnikaŭ.
Złačynnyja hrupoŭki, jakija pracavali pad šyldaj POGO, taksama stvaryli balnicy, jakija prapanoŭvali płastyčnyja apieracyi ŭciekačam, jakija chočuć źmianić tvar.
Na Huo byŭ zarehistravany viertalot i aŭtamabil Ford Expedition, jaki znajšli na terytoryi adnoj z kampanij, što ŭvachodziać u POGO. Sama Huo śćviardžaje, što ŭsiu hetuju majomaść jana pradała da svajho abrańnia ŭ 2022 hodzie.
Što viadoma ab minułym Elis Huo
U mai 2024 hoda sprava Huo apynułasia ŭ centry ŭvahi sienackaj kamisii. Kiraŭnica kamisii źviarnuła ŭvahu, što imia Ho ŭspłyło tolki padčas vybaraŭ 2022 hoda. Heta vielmi niezvyčajna dla filipinskaj pravincyi, dzie miascovyja čynoŭniki časta źviazany z palityčnymi dynastyjami.
Sam prezident Filipin Fierdynand Markas adznačyŭ, što viedaje bolšaść palitykaŭ u pravincyi Tarłak, ale nichto ź ich nie viedaje mera Bambana.
Akramia hetaha, ab Huo niama nijakich zapisaŭ ab naradžeńni ŭ balnicy abo školnych zapisaŭ na Filipinach.
Padčas rasśledavańnia ŭ sienacie Ho pryznałasia, što jaje paśviedčańnie ab naradžeńni było zarehistravanaje ŭ miascovych orhanach ułady tolki tady, kali joj było 17 hadoŭ.
Pavodle słoŭ žančyny, heta źviazana z tym, što jana naradziłasia doma, a nie ŭ balnicy. Žančyna śćviardžaje, što maci kinuła jaje, kali jana była jašče niemaŭlom, i jana vyrasła z baćkam na śvinafiermie.
Pa słovach Huo, jana navučałasia doma, ale pry hetym nie zmahła ŭzhadać nazvu arhanizacyi, jakaja zajmałasia jaje chatnim navučańniem, i nazvała tolki adnaho sa svaich nastaŭnikaŭ.
Huo skazała, što joj było soramna, što jana niezakonnanarodžanaja, i mienavita tamu jana bolšuju častku času pravodziła na siamiejnaj śvinafiermie i dapamahała baćku ŭ biznesie.
Nie taja, za kaho siabie vydaje
Paźniej vyśvietliłasia, što imiony baćki i maci, jakija paznačany ŭ paśviedčańni ab naradžeńni Huo, vydumanyja. Nasamreč takich ludziej nie isnavała.
Byli vyjaŭlenyja dakumienty, u adpaviednaści ź jakimi Elis Huo nasamreč moža być Huo Chua Pin, jakaja ŭjechała na Filipiny 12 studzienia 2003 hoda, kali joj pa dakumientach było 13 hadoŭ, razam z baćkami pa śpiecyjalnaj inviestarskaj vizie. Jaje data naradžeńnia pa tych dakumientach — 31 žniŭnia 1990 hoda.
Padčas dalejšaha rasśledavańnia byŭ znojdzieny dakumient z Nacyjanalnaha biuro rasśledavańniaŭ, jaki źmiaščaje fatahrafiju inšaj žančyny pa imieni Elis Li Huo. Žančyna maje takuju ž datu naradžeńnia, što zapisana ŭ paśviedčańni ab naradžeńni abvinavačanaj — 12 lipienia 1986 hoda.
Paźniej śledčyja vyśvietlili, što ŭ abvinavačanaj takija ž adbitki palcaŭ, jak i va ŭładalnika kitajskaha pašparta Huo Chua Pin.
10 lipieni kamitet sienata rasparadziŭsia vydać ordar na aryšt Elis Huo. Ale žančyna schavałasia ad pravaachoŭnikaŭ.
Sprava nabyła šyroki rozhałas, žančynu stali abvinavačvać u špijanažy na Kitaj. Hetamu spryjaje i napružanaść u adnosinach pamiž Maniłaj i Piekinam z-za sprečnych terytoryj u Paŭdniova-Kitajskim mory.
Kamientary